ထိုင်း-မြန်မာနယ်စပ်၊ ချင်းရိုင်ခရိုင်၊ မယ်ဆိုင်မြို့နယ်ရှိ ပထမမြောက် မယ်ဆိုင်နယ်စပ် အကောက်ခွန်စစ်ဆေးရေးဂိတ်တွင် မြန်မာနိုင်ငံသား ယာဉ်မောင်းတစ်ဦး သယ်ဆောင်လာသည့် သစ်သီးခြင်းများအောက်၌ သိုဝှက်သယ်ဆောင်လာသည့် ကီတမင်း ၁၁၁ ကီလိုဂရမ်ကျော်နှင့် ယာဘ (စိတ်ကြွဆေးပြား) ၆ သိန်းပြားကို ဖမ်းဆီးရမိခဲ့ကြောင်း ချင်းမိုင်သတင်းတွင်ဖော်ပြသည်။

ယမန်နေ့ (ဇူလိုင်လ ၅ ရက်) နံနက်ပိုင်းတွင် ဒေသဆိုင်ရာ အာဏာပိုင်များက ညွှန်ကြားချက်များအရ စစ်ဆေးမှုများ တင်းကျပ်နေစဉ် ဖမ်းဆီးရမိခဲ့ခြင်း ဖြစ်သည်။

ဖမ်းဆီးခံရသူသည်သျှမ်းပြည်အရှေ့ပိုင်း၊ တာချီလိတ်မြို့၊ ပုံးထွန်းရပ်ကွက်တွင် နေထိုင်သူ ဦးထွန်းသိန်းဦး (အသက် ၄၂ နှစ်) ဖြစ်ပြီး မြန်မာလိုင်စင် သုံးဘီးဆိုင်ကယ်ဖြင့် မယ်ဆိုင်ဂိတ်သို့ မောင်းနှင်ဝင်ရောက်လာခဲ့ခြင်းဖြစ်သည်။

၎င်းက ထိုင်းနိုင်ငံအတွင်းသို့ ပလတ်စတစ်ခြင်းအလွတ်များသာ သယ်ဆောင်လာခြင်းဖြစ်ကြောင်း ပြောဆိုခဲ့သော်လည်း၊ ယာဉ်နောက်တွဲပေါ်တွင် အထပ်လိုက်တင်လာသည့် သစ်သီးခြင်းများကို အောက်၌ ပုံစံပြောင်းလဲ၍ မူးယစ်ဆေးဝါးများ သိုဝှက်ထားသည်ကို စစ်ဆေးတွေ့ရှိခဲ့ရသည်။

ထိုဖမ်းဆီးမှုမှ လက်ဖက်စိမ်းအိတ် ၁၀၇ အိတ်ဖြင့် ထုပ်ပိုးထားသည့် စုစုပေါင်းအသားတင်အလေးချိန် ၁၁၁.၈၂ ကီလိုဂရမ်ရှိ ကီတမင်းများနှင့် တစ်ထုတ်လျှင် ဆေးပြား ၁၀,၀၀၀ စီပါဝင်သည့် အထုတ် ၆၀ (စုစုပေါင်း စိတ်ကြွဆေးပြား ခန့်မှန်းခြေ ၆၀၀,၀၀၀ ပြား) တို့ကို သိမ်းဆည်းရမိခဲ့သည်။

လက်ရှိတွင် မယ်ဆိုင်အကောက်ခွန်ရုံး နှင့် တာဝန်ရှိသူများက သံသယရှိသူအား အကောက်ခွန်လုပ်ထုံးလုပ်နည်းများကို ရှောင်လွှဲ၍ ကုန်ပစ္စည်းတင်သွင်းမှု၊ ခွင့်ပြုချက်မရှိဘဲ အဆင့် ၁ မူးယစ်ဆေးဝါး (မက်သ်အဖက်တမင်း) နှင့် အဆင့် ၂ မူးယစ်ဆေးဝါး (ကီတမင်း) တို့ကို ပြည်တွင်းသို့ မှောင်ခိုတင်သွင်းမှု စသည့် ရာဇဝတ်မှုဆိုင်ရာ စွဲချက်များဖြင့် မယ်ဆိုင်ရဲစခန်းသို့ လွှဲပြောင်းအပ်နှံကာ ဥပဒေကြောင်းအရ အရေးယူထားသည်။

ထို့အပြင် မူးယစ်ဆေးဝါးတိုက်ဖျက်ရေးအဖွဲ့များမှ ယခု နယ်စပ်ဖြတ်ကျော်မှောင်ခိုကွန်ရက်၏ နောက်ကွယ်မှ ကြိုးကိုင်သူများကို ဖော်ထုတ်နိုင်ရန် ကွန်ရက်တိုးချဲ့ စုံစမ်းစစ်ဆေးလျက်ရှိကြောင်း သိရသည်။

ကိုးကား – Chiang Mai News