ထိုင်း-မြန်မာနယ်စပ် မိုင်းတုံမြို့နယ် ပုံပါကျင်မြို့သို့ သွားရာလမ်းပေါ်တွင် စိတ်ကြွဆေးပြား ငါးသန်းနီးပါးကို အမျိုးသားတစ်ဦးနှင့်အတူ ဖမ်းဆီးရမိကြောင်း “ဝ” အဖွဲ့က ယနေ့ (စက်တင်ဘာ ၂၁)ရက်တွင် သတင်းထုတ်ပြန်သည်။

ယမန်နေ့ (စက်တင်ဘာလ ၂၀) ရက် ညနေ ၆ နာရီခွဲတွင် မိုင်းတုံမြို့နယ် ပုံပါကျင်မြို့ ကျေးရွာတွင် မသင်္ကာဖွယ်လူများ တင်ဆောင်လာသည့် ယာဉ်တစ်စီးကို တွေ့ရှိခဲ့ကြောင်း လိုက်ရှာခဲ့ရာ နန်ဖိုင်ကျေးရွာအနီးတွင် ပျောက်ဆုံးသွားခဲ့ကြောင်း သိရသည်။

သတင်းပေးသူထံမှ ရရှိထားသော ယာဉ်နံပါတ်ကိုအခြေခံ၍ သံသယရှိသည့် လမ်းကြောင်းများကို လုံခြုံရေးတပ်များက ပိတ်ဆို့ရှာဖွေခဲ့ကြရာ ယမန်နေ့ ည ၈ နာရီတွင် ထိုင်း-မြန်မာနယ်စပ်၌ မူးယစ်ဆေးဝါး ရောင်းဝယ်နေသူများကို တွေ့ရှိခဲ့ကြောင်း ဆိုသည်

သို့သော် မူးယစ်ကုန်ကူးသူများသည် စစ်ဆေးမှုမခံဘဲ နယ်စပ်သို့ ထွက်ပြေးသွားသဖြင့် ၎င်းကို လိုက်ရှာနေချိန်တွင် မူးယစ်ဆေးကုန်ကူးသူ အသက် ၃၇ နှစ်အရွယ် အမျိုးသားကို စိတ်ကြွဆေးပြား (၄,၇၉၀,၀၀၀) ပြားနှင့်အတူ ကားကိုပါ ဖမ်းဆီးရမိခြင်း ဖြစ်သည်။

အဆိုပါအမျိုးသားသည် ပုံပါကျင်မြို့ မိုင်းဟန်ကျေးရွာအုပ်စု၊ နားကောင်းမှူးရွာမှ အရပ်သားတစ်ဦးဖြစ်ကြောင်း သိရသည်။

“ဝ” တပ်ဖွဲ့ဆက်ဆံရေးအရာရှိ ဦးညီရမ်းက ယခုဖမ်းဆီးမှုတွင် ကျန်နေသေးသော မူးယစ်ဆေး ကုန်ကူးသူများကို ဆက်လက်ရှာဖွေလျက်ရှိကြောင်း ၎င်း၏ လှုမှုကွန်ရက်စာမျက်နှာတွင် ရေးသားဖော်ပြထားသည်။