သျှမ်းပြည်နယ် မြောက်ပိုင်း နမ့်ဆန်မြို့ နယ် နမ့်ခေး ကျေးရွာ အတွင်း လက်နက်ကြီး ကျသဖြင့်အသက် ၉ နှစ်ကျော် ကလေးတဦး ကျည်စများ ထိမှန်ကာ ယနေ့ထိ ကျည်စ မထုတ်ရသေးကြောင်း သတင်းရရှိသည်။
စက်တင်ဘာလ ၁၆ ရက်ကဖြစ်ပွါးသောတိုက်ပွဲကြောင့် နေ့လည် ၂ နာရီ ဝန်းကျင်က လက်နက်ကြီးကျည်စ ထိမှန်သည့် အသက် ၉ နှစ်အရွယ် စိုင်းသူဇာသည် တတိယတန်းတက်ရောက်နေသည့် ကျောင်းသားဖြစ်ပြီး စိုက်ဝင်နေသည့်အဆိုပါကျည်စများအား ယနေ့ထုတ်ပေးသွားမည် ဟု နမ့်ဆန် စစ်ရှောင်များကို ကူညီပေးနေသည့် ဦးအောင်မြင့် က သျှမ်းသံတော်ဆင့် သို့ ပြောသည်။
“ လက်နက်ကြီး စထိတာအခုတော့ ကျည်စ ထုတ်လို့မရသေးဘူး။ အန္တရာယ်တော့မရှိဘူး။ စိုးရိမ်စရာမရှိဘူး။ ဒီနေ့ ကြိုးစားထုတ်မယ်လို့ ပြောတယ်။ မနေ့က ထုတ်လို့မရဘူး။ အခု ဆေးရုံမှာပါပဲ ” ဟု ဦးအောင်မြင့် က ဆိုသည်။
နမ့်ဆန်မြို့ အနီးတွင် မြန်မာ့တပ်မတော် နှင့် တအောင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့သည် စက်တင်ဘာ ၁၃ ရက်နေ့မှ စတင်ကာ တိုက်ပွဲများဖြစ်ပွားခဲ့ပြီး ယနေ့ အချိန်ထိ စစ်ရေး တင်းမာနေကြောင်း သိရသည်။
ထိုတိုက်ပွဲများကြောင့် လက်နက်ထိမှန်သူ လူထုမှာ “ အသက် ၆၀ ကျော် ဦးအိုက်ထွန်း လက်နက်မှန်ပြီးသေဆုံးသွားတယ်။ နောက် နမ့်တွေ ကျေးရွာ က အမျိုးသားတယောက်နဲ့အမျိုးသမီးတယောက် စုစုပေါင်း ၂ ယောက် ဒဏ်ရာရတယ်။ မနေ့က အသက် ၉ နှစ်ကျော်ကလေး တယောက် ဒဏ်ရာရတယ်။ ဒဏ်ရာရတဲ့ ၃ ယောက် စလုံးက အခုနမ့်ဆန်ပြည်သူ့ဆေးရုံမှာ ဆေးကုနေပါတယ် ” ဟု ဦးအောင်မြင့် က ပြောသည်။
တိုက်ပွဲကြောင့် နမ့်ဆန်တွင်လက်ရှိ စစ်ရှောင် ၂၀၀၀ ကျော် ရှိနေပြီး ဇယန်းကြီး ဘုန်းကြီးကျောင်းတွင် ၁၀၀၀ ကျော်၊ ပန်စမိန်း တွင် ၃၅၀ ကျော်၊ ရ၄ မိုင် တွင် ၃၀၀ ကျော်၊ ကယားကြီး ဘုန်းကြီးကျောင်းတွင် ၂၂၇ ဦး၊ ပန်စလီတွင် ၁၅၀ ကျော် တို့ဖြစ်သည်။
အဆိုပါ စစ်ရှောင်များအတွက် စစ်ရှောင်များကို ကူညီပေးနေသည့် ချမ်းမြေ့ လူမှု ကူညီရေး အသင်းမှ ဥက္ကဌ ဦးသိန်းရွှေ က “ လိုအပ်ချက်ကတော့ ဆန်ကတော့ နည်းနည်း အဆင်ပြေတယ်။ စားသောက်ကုန် တွေ လိုအပ်မယ်။ စစ်ရှောင်တွေ များတော့ လိုအပ်ချက်ကတော့ များတယ်” ဟု သျှမ်းသံတော်ဆင့် သို့ ပြောသည်။
နမ့်ဆန်မြို့ တွင် ယခင်က စစ်ရှောင် ၂၀၀၀ ကျော်ထိ မရှိခဲ့ဖူးကြောင်း၊ တိုက်ပွဲများ ဆက်လက်တင်းမာပြီး ဖြစ်ပွားပါက စစ်ရှောင်များ ပိုများလာနိုင်သည် ဟု လည်း ဦးသိန်းရွှေ က ပြောသည်။
ယမန်နေ့က နမ့်ဆန်မြို နှင့် ၃ မိုင် ဝေးကွာသည့် နမ့်ခေးကျေးရွာအနီးတွင်လည်း တိုက်ပွဲများဖြစ်ပွားကြောင်း သိရသည်။
တိုက်ပွဲများ ဖြစ်ပွားနေမှုကြောင့် ပန်စလီ တွင် လာရောက် ခိုလှုံသည့် စစ်ရှာင် ၁၅၀ ကျော်အတွက် စားဝတ်နေရေး အကူအညီ လိုအပ်နေကြောင်း လည်း ဦးသိန်းရွှေ က ပြောသည်။
“ အခု ချိန်ထိ ပန်စလီ က လုံးဝ သွားလို့မရဘူး။ ပန်စရီ က စစ်ရှောင်တွေ အကူအညီ မရသေးဘူး။ ဆန် နဲ့စားသောက်ကုန်တွေ အဓိက လိုအပ်မယ်လို့ ထင်ပါတယ်” ဟု ဦးသိန်းရွှေ က ပြောသည်။
ယနေ့ စက်တင်ဘာ ၁၇ ရက်နေ့ မြောက်ပိုင်းမဟာမိတ် (၄)ဖွဲ့သည် မြန်မာ့တပ်မတော်အဖွဲ့ နှင့် ကျိုင်းတုံမြို့ တွင် တွေ့ဆုံ ဆွေးနွေးမှု ပြုလုပ်နေပါသည်။
သျှမ်းပြည်နယ် မြောက်ပိုင်း အတွင်း ဖြစ်ပွားသည့် တိုက်ပွဲတွင် အရပ်သား ၁၅ ဦး အထက်သေဆုံးကာ ထိခိုက်ဒဏ်ရာရရှိသူ ၃၀ အထက် ရှိကြောင်း သိရသည်။
