သျှမ်းပြည်နယ် အရှေ့ပိုင်း တာချီလိတ်မြို့နယ် မိုင်းဖုန်း(ခ) ကျေးရွာ အုပ်စု ပါလိုင် ကျေးရွာတွင် ဇူလိုင် ၂ ရက် ညနေပိုင်းက မြန်မာနိုင်ငံသား ၂ ဦး နှင့် ထိုင်းနိုင်ငံသား ၆ ဦးထံ လက်နက်ခဲယမ်းများ ဖမ်းဆီးရမိကြောင်း သတင်းရရှိသည်။

အဆိုပါ ကျေးရွာ အတွင်း ထိုင်းနိုင်ငံသား ၆ ဦး တရားမဝင် နေထိုင်နေသည်ဟု သတင်းရရှိပြီး တာချီလိတ်ရဲများဝင်ရောက်စစ်ဆေးရာ မြန်မာနိုင်ငံသား အမျိုးသားတဦး၊ အမျိုးသမီး တဦး အပါအဝင် ထိုင်းနိုင်ငံသား အမျိုးသား ၃ ဦး နှင့် အမျိုးသမီး ၃ ဦး စုးပေါင်း ၈ ဦး အား လက်နက် ခဲယမ်း များနှင့်အ တူ ဖမ်းဆီးရမိကြောင်း မြန်မာ နို်င်ငံရဲတပ်ဖွဲ့ ထုတ်ပြန်ချက်တွင်ရေးသားထားသည်။

ဖမ်းဆီးရမိသည့် လက်နက် ခဲယမ်းများမှာ ခြောက်လုံးပြူး သေနတ် ၂ လက်၊ 9 MM ပစ္စတို သေနတ် ၃လက်၊ AK 47 သေနတ် ၃ လက်၊ M16 သေနတ် ၂ လက်၊ ၁၂ ဗို့ တလုံးထိုး သေနတ် ၃ လက်၊ M12 တလက်၊ M22 ရိုင်ဖယ် တလက် နှင့် ကျည် မျိုးစုံ စုစုပေါင်း (၁၉ ၅၀) တောင့် သိမ်းဆည်းရမိကြောင်း ထုတ်ပြန် ချက်တွင် ဖော်ပြထားသည်။

ထို့့အပြင် VIGO မော်တော်ယာဉ် ၃ စီး၊ MARK-X အမျိုးအစားယာဉ် တစီး တို့့ကိုလည်း သိမ်းဆည်းရမိခဲ့သည်။

အဆိုပါ လက်နက်ခဲယမ်းများနှင့် အတူ ဖမ်းဆီး ရမိသူ ၈ ဦး ကို ဥပေဒ အရ အရေးယူနိုင်ရန် စီစဉ်နေကြောင်း သိရသည်။

တာချီလိတ်မြို့နယ် အတွင်း ထိုင်းနိုင်ငံသားများ၊ တရုတ်နိုင်ငံသားများ တရားမဝင် လာရောက် နေထိုင် ခြင်းများစွာရှိနေကြောင်း၊ သက်ဆိုင်ရာမှ သေချာ စွာ စိစစ်သင့်ကြောင်းလည်း တာချီလိတ်ဒေသခံ များက ပြောသည်။

“ တရုတ်၊ ထိုင်းတွေ အိမ်ခန်းငှားရင် တရားဝင် လာတာလား။ ဒါမှ မဟုတ် တရားမဝင် လာတာလားဆိုတာ အိမ်ရှင်တွေ ကလည်း စစ်ဆေးသင့်တယ်။နောက် တရားမဝင် ရဲ့ နောက်ဆက်တွဲ ပြဿနာတွေ အရမ်းများတယ်” ဟု တာချီလိတ်ဒေသခံ တဦး က ပြောသည်။