သျှမ်းပြည်နယ် အရှေ့ပိုင်း၊ မိုင်းတုံမြို့တွင် တရားမဝင် ထိုင်းနိုင်ငံသားတစ်ဦးကို ရဲများမှာ ငွေညှစ်ပြီး ပြန်လွှတ်လိုက်ကြောင်း ဒေသခံများထံမှသိရသည်။

မိုင်းတုံမြို့အနီးတဝိုက် နားကောင်းမူးနားတွင် တရားမဝင်လာရောက်သည့် ထိုင်းနိုင်ငံသားတစ်ဦးကို ယမန်နေ့ (အောက်တိုဘာလ ၅ ရက်)တွင် ဖမ်းဆီးငွေညှစ်ခဲ့ပြီး အဆိုပါ ထိုင်းနိုင်ငံသားမှာ ထိုင်းနိုင်ငံသို့ ပြန်လို့မရသည့် မှောင်ခိုလုပ်သားတစ်ဦးဖြစ်ပြီး မြန်မာရဲများကို ဘတ် ၇ သိန်းကျော်ပေးခဲ့ရကြောင်း ဒေသခံအမျိးသားတစ်ဦးးကပြောသည်။

“ နားကောင်းမူးနားမှာ မနေ့က ဖမ်းမိတယ်။ ရဲတွေက ဘတ် ၇သိန်းကျော်ပေးခဲ့ရတယ်ပြောတယ်။ ပြီးရင် ပြန်လွှတ်ပေးလိုက်တာတဲ့။” ဟု ဒေသခံအမျိုးသားတစ်ဦးကပြောသည်။

စစ်အာဏာသိမ်းပြီးနောက်ပိုင်း မိုင်းတုံအနီးတဝိုက်ဒေသများတွင် တရားမဝင်တရုတ်နိုင်ငံသားနှင့် ထိုင်းနိုင်ငံသားများ ပိုမိုများပြားလာပြီး ရဲများမှလည်းငွေကြေးယူကာ နေထိုင်ခွင့်ပေးထားကြောင်းနှင့် ငွေလိုအပ်သည့်အချိန်တွင် ဖမ်းဆီးငွေညှစ်နေကြောင်း အဆိုပါအမျိုးသားက ထပ်လောင်းပြောသည်။

ထိုင်းနိုင်ငံနှင့်ထိစပ်နေသည့် မိုင်းတုံတွင် တရားမဝင် လုပ်ငန်းနှင့် တရားမဝင်နေထိုင်နေကြသည့် လူများ ပိုမိုများပြားလာတာကြောင့် မှောင်ခိုစီးပွားရေးပိုမိုလုပ်ကိုင်လာကြကြောင်း သိရသည်။

“ လူက ပိုစုံလာတော့ မှောင်ခိုလုပ်ငန်းတွေ အများကြီးရှိလာတယ်။ လူကုန်ကူးမှုအထိပါ ရှိတယ်။နယ်စပ်ဆိုတော့ ဈေးလည်းကြီး ငွေရှာရလည်းလွယ်တယ်။လိုချင်တာလည်း အကုန်ရတယ်။” ဟု မိုင်းတုံဒေသခံတစ်ဦးက ပြောသည်။

လက်ရှိသျှမ်းအရှေ့ပိုင်းတွင် မိုးအဆက်မပြတ်ရွာသွန်းတာကြောင့် ရေကြီးရေလျှံမှု၊တောင်ပြိုမှုတွေဖြစ်ခဲ့ပြီး တံတာပျက်စီးတာကြောင့် ကုန်သွယ်ရေးမှာ ထိခိုက်နှောင့်နှေးမှုများရှိနေကြောင်း သိရသည်။

ရေကြီးမြေပြိုမှုများကြောင့် အင်တာနက်၊ ဖုန်းလိုင်း နှင့် လမ်းပန်းဆက်သွယ်ရေးတွေ ပြတ်တောက်နေတာကြောင့်မိုင်းတုံနှင့် မိုင်(၃၀) ကျော်ဝေးသည့် ဖုန်းလိုင်းရရှိသည့်နေရာသို့သွားရောက်ကာ အသုံးပြုနေရကြောင်းသိရသည်။

အလုပ်သင် သတင်းထောက် နန်းလရောင် ရေးသားသည်။