သို့-
သျှမ်းသံတော်ဆင့် အယ်ဒီတာ မှတဆင့်
ရှမ်းပြည်နယ်အစိုးရ ၊ ပြည်ထောင်စုအစိုးရသို့
ကျမ တို့ရွာဟာ လားရှိုးမြို့အရှေ့ဘက် မိုင် ၆၀ လောက်ဝေးပါတယ်။ လားရှိုး – မိုင်းယော် – မိုင်းကျက် အသွားလမ်း မိုင်းကျက်ရွာမ ကြီးရဲ့ အနောက်ဘက် ၉ မိုင်လောက်ဝေးပါတယ် ကျမတို့ရွာက။ တခြား ရွာတွေတော့ မသိဘူး။ ကျမတို့ ဒီအနီးအနား ရှိတဲ့ ရွာ သုံးရွာ (နားပုံ၊ ဟိုခိုင်း၊ ပိန်းဆိုင်း – မိုင်းကျက် အုပ်စုဝင်) – အိမ်ခြေ ၁၃၀ လောက်ရှိပါတယ်။ အဲဒါကို တအိမ် ကျပ် ၆ ထောင် ပေးရမယ် ဆိုပြီး ကေတီအေ ပြည်သူ့စစ်အဖွဲ့က လာရောက်ဆင့်ဆိုတယ်။ အဲဒီ ငွေခြောက်ထောင် က –
(၁) လူ အတွက် တအိမ် ကျပ် ၁ ထောင်၊
(၂) အိမ် အတွက်တအိမ် ကျပ် ၁ ထောင်၊
(၃) ယာ အတွက် တအိမ် ကျပ် ၁ ထောင်၊
(၄) လယ်တွက် တအိမ်ကျပ် ၃ ထောင် စုစုပေါင်း ကျပ်ခြောက်ထောင်ပေးရပါတယ်။
ဇွန်လ ဆန်းပိုင်းလောက်က လာရောက်ဆင့်ဆိုထားပြီး ၊ ဇွန် ၂၁ က မပေးမနေရ ဆိုပြီး လာကောက် သွားပါတယ်။
အခု ပိုက်ဆံ လာကောက်တဲ့တပ်က ကချင်ပြည်သူ့စစ် ကေတီအေ ၊ မိုင်းယော်တိုက်နယ် နောင်ဆမ်ပူးကျေးရွာ အခြေစိုက် တပ်မှူးကမ်ဆိုင်း ရဲ့ တပ်ဖွဲ့ဝင်တွေလို့သိရပါတယ်။
ကျမ တို့တောသူတောင်သားတွေက ပိုက်ဆံ လက်ထဲ မရှိဘူးလေ။ ဆီဖိုး၊ ဆားဖို့ အတွက် ဒီအချိန် မှိုရှာပြီး ရောင်းရတယ်။ တချို့အိမ်ဆို မိုးတွင်း စားစရိတ်အတွက် လောင်ထားတဲ့ ဆန်တွေ၊ ပြောင်းတွေ ရောင်းပြီး သူတို့ကိုပေးရပါတယ်။ ကျမတို့ကတော့ မွေးထားတဲ့ ကြက်ရောင်းပြီး ပေးရပါတယ်။ တောဆိုတော့ အချင်း ချင်းရောင်းစားလဲမရ မိုင်းကျက်ရွာမ ကို တက်ရောင်းရတယ်။ သူများ မလိုတဲ့ ချိန် သွားရောင်းတော့ စျေးလဲ နှိမ်ခံရပါတယ်။
ကျမတို့တောသူတောင်သားတွေ အတွက် အခက်အခဲ ရှိနေတဲ့ အကြောင်းကို နိုင်ငံတော် အုပ်စိုးတဲ့သူ တွေ သိစေချင်ပါတယ်။ ကျမ တို့ သက်သာအောင် ကူညီဆောင်ရွက်ပေးစေလိုပါတယ်ရှင်။
အခက်အခဲ ကြုံတွေ့နေရတဲ့
မိုင်းကျက်ရွာသူ ခလေး ၅ ယောက် မိခင်
