သီပေါမြို့တွင် စစ်ဘေးရှောင်များနေရပ်ပြန်ကုန်ပြီဖြစ်ကြောင်း စစ်ရှောင်ကူညီရေးအဖွဲ့ပြော

0

၂၀၁၈ နှောင်းပိုင်းကစပြီး တိုက်ပွဲစတင်ပြင်းထန်လာသော မြောက်ပိုင်းမဟာမိတ်တပ်ဖွဲ့နှင့် RCSS တို့ကြား တိုက်ပွဲကြောင့် နေရပ်မှစစ်ဘေးတိမ်းရှောင်ကာ ဘုန်းကြီးကျောင်းများသို့ ခိုလှုံခဲ့ရသည့် သီပေါမြို့ရှိ လက်ကျန်စစ်ရှောင်များမှာ ယနေ့မနက်ပိုင်းက ပြန်သွားကြပြီဖြစ်ကြောင်းသိရသည်။

Photo by Ko Sai /နားလွယ်ရွာ လုံးလှဖွန်းဂိုဒေါင်မှ စစ်ဘေးရှောင်များ ပျော်ပျော်ပါးပါးနေရပ်ပြန်ကြစဉ်
Photo by Ko Sai /နားလွယ်ရွာ လုံးလှဖွန်းဂိုဒေါင်မှ စစ်ဘေးရှောင်များ ပျော်ပျော်ပါးပါးနေရပ်ပြန်ကြစဉ်

ဧပြီလ ၉ ရက် နံနက် ၉ နာရီအချိန်က သီပေါမြို့နယ် ၀မ့်နားလွယ်ရွာ လုံးလှဖွန်းဂိုဒေါင်တွင် ကျန်ရှိသော လက်ကျန်စစ်ရှောင် ၅၁ ဦး နေရပ်သို့ပြန်ကြခြင်းဖြစ်ကြောင်း စစ်ဘေးရှောင်ကူညီရေးကော်မတီကပြောသည်။

“သီပေါမြို့စစ်ရှောင်စခန်းကိုရောက်ရှိနေတဲ့စစ်ရှောင်အားလုံးဒီကနေ့ဘဲပြန်ကုန်ပြီဖြစ်ပါတယ်။ တိုက်ပွဲတွေငြိမ်သွားတာ တပတ် ၂ ပတ်လောက်ရှိပါပြီ။ ဒေသတွင်းမှာ အကုန်အေးချမ်းငြိမ်သက်ပြီလို့ ယုံကြည်ပါတယ်” – ဟု သျှမ်းသံတော်ဆင့်အားပြောသည်။

လက်ကျန်စစ်ရှောင် ၅၀ ကျော်မှာ ကွန်းဆော့အုပ်စု လွယ်မောက်ရွာမှ ရွာသားများဖြစ်ကြသည်။ လွန်ခဲ့သောမတ်လဆန်းကတည်းက အဆိုပါ လုံးလှဖွန်းဂိုဒေါင်သို့ရောက်ရှိခိုလှုံခဲ့ကြခြင်းဖြစ်သည်။

Photo by Ko Sai /နားလွယ်ရွာ လုံးလှဖွန်းဂိုဒေါင်မှ စစ်ဘေးရှောင်များ ပျော်ပျော်ပါးပါးနေရပ်ပြန်ကြစဉ်
Photo by Ko Sai /နားလွယ်ရွာ လုံးလှဖွန်းဂိုဒေါင်မှ စစ်ဘေးရှောင်များ ပျော်ပျော်ပါးပါးနေရပ်ပြန်ကြစဉ်

“နေရပ်ပြန်ရတော့ပျော်တာပေါ့။ တိုက်ပွဲတွေထပ်မဖြစ်ပါစေနဲ့လို့ဘဲကျမတို့ ဆုတောင်းပါတယ်။ ဒါမှကောင်းကောင်းလုပ်ကိုင် ရှာဖွေစားသောက်နိုင်မှာ”- ဟုလည်း နေရပ်ပြန်သည့် စစ်ရှောင်တဦးကပြောသည်။

၂၀၁၉ နှစ်ဆန်းပိုင်းမှ မတ်လအထိ ၃ လ တာကာလအတွင်း တိုက်ပွဲများ စစ်ရေးတင်းမာမှုများကြောင့် နေရပ်မှစွန့်ခွါထွက်ပြေးရသော ကျေးလက်ဒေသခံ ၃၀၀၀ ကျော်ရှိခဲ့ပါသည်။ သီပေါမြို့ရှိ စစ်ရှောင်စခန်း ၉ နေရာတွင် အသီးသီးခိုလှုံခဲ့ကြသည်။ တိုက်ပွဲများဖြစ်ပွါးစဉ် စစ်ဘေးရှောင်များရှိသကဲ့သို့ သေကြေဒဏ်ရာ ရရှိသော ဒေသခံများလည်းရှိခဲ့ပါသည်။

သို့သော် မတ်လ လယ်ပိုင်း သျှမ်းလက်နက်ကိုင်တပ်အချင်းချင်း အပစ်ရပ်နိုင်ရေးဆွေးနွေးရန် ၂ ဖက်တပ်များ ပစ်ခတ်မှုရပ်စဲထားဖို့ညွှန်ကြားချက်ထုတ်ပြီးနောက်ပိုင်း တိုက်ပွဲများတဖြည်းဖြည်းစဲသွားကာလက်ရှိအချိန်တွင် လုံးဝနီးပါး ငြိမ်သက်သွားပြီဖြစ်သည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE