သျှမ်းပြည်မြောက်ပိုင်း နမ္မတူမြို့နယ် မန်စံအုပ်စု မိုင်းမုရွာမှာ အစိုးရတပ်နဲ့တပ်ပေါင်းစုတွေကြားတိုက်ပွဲကြောင့် နေအိမ် ၂ လုံးလက်နက်ကြီးကျည်ထိမိ မီးလောင်ပျက်စီးခဲ့ရပါတယ်။

မတ်လ ၂၇ ရက်နေ့လည်ပိုင်းက တပ်ပေါင်းစုခေါ် မြောက်ပိုင်းမဟာမိတ်တပ်ဖွဲ့နဲ့ အစိုးရတပ်မတော်တို့ကြား တိုက်ပွဲကြောင့်နေအိမ် အပေါ် လက်နက်ကြီးကျည်ကျရောက်ထိမှန်ခဲ့တာဖြစ်ပါတယ်။

ဦးလုံးဆန်ပေါ်ရဲ့နေအိမ်နဲ့ စိုင်းနော်မိန်း – နန်းမွမ်းခမ်းရဲ့နေအိမ်တွေဖြစ်ပြီး လူသူထိခိုက် ဒဏ်ရာရမှုတော့မရှိဘူးလို့သိရပါတယ်။

“ပစ္စည်းတွေဘာတွေတော့ ဘာမှမရလိုက်ဘူး။ စပါးတွေရော၊ မြေသြဇာတွေရော၊ လယ်ထွန်စက်တွေ၊ မြက်ရိတ်စက်တွေ၊အိမ်မွေးကြက်ဝက်တွေအကုန်ဆုံးရှုံးသွားတယ်။ ဘာမှမရလိုက်ဘူး။ လူတော့ ပြီးခဲ့တဲ့ရက်တွေကတည်းက မန်စံဘက်ရှောင်နေလို့ရွာမှာမရှိဘူး။ လူတော့မထိဘူး ”- လို့ အိမ်ရှင် တွေကပြောပါတယ်။

တိုက်ပွဲဟာ ယခုတပတ်အတွင်း ဆက်တိုက်ဖြစ်ပွါးနေလို့ ရွာသားတွေဟာ မန်စံအုပ်စု မန်ဟောင်ဘုန်းကြီး ကျောင်းကို ပြီးခဲ့တဲ့ရက်တွေကတည်းကသွားရောက် ခိုလှုံနေကြရကြောင်းသိရပါတယ်။

“ဘယ်သူကပစ်လိုက်တဲ့ကျည်လည်းတော့မသိဘူးလေ။ ဒီမှာက ၃ ဖက် ၃ တန်ရှိနေတာကိုး။ တပ်ပေါင်းစုရယ်၊ RCSS ရယ် အစိုးရတပ်ရယ် ၃ ခုလုံးကရွာဘက်မှာလှုပ်ရှားနေတော့ ။ မနေ့ကလည်း လုံမိတ်ရွာသားတွေ တိုက်ပွဲကြောင့်ထွက်ပြေးတာ မန်မိုင်ရွာနားအရောက် လမ်းမှာသူတို့ထော်လာဂျီဖြတ်သွားတဲ့နေရာနားမှာ လက်နက်ကြီးကျည်ကျလို့ ထော်လာဂျီမှောက်သွားတယ်။ သားအမိမြေးအဖွား ၃ ယောက်ဒဏ်ရာအပြင်းအထန်ရပြီးအခု လားရှိုးဆေးရုံမှာ ” – လို့ စစ်ဘေးရှောင် နန်းအေးက ပြောပါတယ်။

လက်ရှိမှာ မန်စံရွှေစကားဝါမြောက်ကျောင်းမှာ လုံမိတ်ရွာနဲ့ မိုင်းမုရွာကစစ်ဘေးရှောင် ၄၀ ကျော်၊ မန်စံ TEC ဘော်ဒါဆောင်မှာ ကောင်းဟုန်းရွာက စစ်ဘေးရှောင် ရ၀ ကျော်ရှိနေပြီး လက်ရှိမှာ မန်စံမှာ စစ်ဘေးရှောင်ရွာသား စုစုပေါင်း ၁၂၀ ကျော်ရှိနေတယ်လို့သိရပါတယ်။