သျှမ်းပြည်မြောက်ပိုင်း မူစယ်မြို့နယ်တွင် ရှမ်တိုင်းရင်းသားများဒီမိုကရေစီအဖွဲ့ချုပ် SNLD က ၂၀၁၉ ခုနှစ်အတွက် မြို့နယ်ဥက္ကဌသစ်ရွေးချယ်တင်မြှောက်ရာ ယမန်နှစ်က တာဝန်ထမ်းဆောင်ခဲ့သော မြို့နယ်ဥက္ကဌဟောင်း စိုင်းလှဖေ(ခေါ်)လုံးဆေယွမ်အား ထပ်မံရွေးချယ်တင်မြှောက်က တာဝန်ပေးအပ်လိုက်ကြောင်းသိရသည်။

မတ်လ ၂၄ ရက်နေ့မွန်းလွဲ ၁ နာရီခွဲမှ ညနေ ၄ နာရီအထိ မူစယ်မြို့နယ် SNLD ပါတီဝင်များက တော်ယွက်ရပ်ကွက် တတ်နိုင်းဖောင်ခန်းမတွင် မြို့နယ်ဥက္ကဌအသစ်ရွေးချယ်ခြင်းဖြစ်ကြောင်းပါတီဝင်လူငယ် စိုင်းမြတ် က သျှမ်းသံတော်ဆင့်အားပြောသည်။

“တနှစ်တကြိမ် ပြုလုပ်တဲ့ မြို့နယ်ဥက္ကဌ ရွေးကောက်ပွဲပေါ့ ။ လုံးဆေယွမ်က ပါတီဖွဲ့စည်းပုံနဲ့ ပတ်သက်ပြီး ပြောပြသွားတယ်။ ပြည်သူ့လွှတ်တော်ကိုယ်စားလှယ် စိုင်းဖိုးမြတ်နဲ့ ပြည်နယ်လွှတ်တော်ကိုယ်စားလှယ် စိုင်းကျော်သိန်းတို့က လွှတ်တာ်တွင်းအတွေ့အကြုံကိုရှင်းလင်းတယ်။ မူစယ်လူထုကိုလည်း လွှတ်တော်ကိုလာရောက်လေ့လာဖို့ ဖိတ်ခေါ်တယ်။ လူထုနဲ့ ဘယ်လိုလက်တွဲပြီး အခက်အခဲတွေကိုရင်ဆိုင်ကျော်လွှားမယ်စတာတွေကို ပြောကြားသွားပါတယ် ” – ဟု သျှမ်းသံတော်ဆင့်အားပြောသည်။

၂၀၁၉ အတွက် မူစယ်မြို့နယ် SNLD ပါတီ ဥက္ကဌအဖြစ် စိုင်းလှဖေ၊ ဒုဥက္ကဌအဖြစ် စိုင်းလောဝ်ဆိုင်၊ အတွင်းရေးမှူး စိုင်းမြင့်သိန်း နှင့် လက်ထောက်အတွင်းရေးမှူး နန်းသိန်းကြည်တို့ကိုရွေးချယ်တင်မြှောက်ခဲ့ကြကြောင်းသိရသည်။

အဆိုပါ မြို့နယ်ဥက္ကဌနှင့် အလုပ်အမှုဆောင်များအဖွဲ့ရွေးကောက်ပွဲသို့ ကျားခေါင်းပါတီဝင် ၁၇၀ ကျော်တက်ရောက်ခဲ့ကြောင်းသိရပါသည်။