သျှမ်းပြည်တောင်ပိုင်း ခိုလမ်မြို့နယ်ခွဲတွင် စျေးအနီးနေအိမ်တလုံးမီးလောင်မှုဖြစ်ပွါးရာ ဒေသခံများစိုးရိမ်ထိတ်လှန့်မှုဖြစ်ပွါးခဲ့ကြောင်းသိရသည်။
မတ်လ ၁၃ ရက် ယနေ့နေ့လည်ပိုင်းက ရပ်ကွက် ၄ ရှိ ဦးလုံးဆုပညာ ပါ့နန်းခမ်းအောင်တို့၏နေအိမ်အား မီးလောင်မှုဖြစ်ပွါးခဲ့ခြင်းဖြစ်ကြောင်း၊ သို့သော် လူထုထိခိုက်ဒဏ်ရာရမှုတော့မရှိခဲ့ကြောင်း မီးလောင်သည့်အိမ်အနီးတွင်နေထိုင်သည့် ခိုလမ်ဒေသခံလူငယ် စိုင်းဆေ က သျှမ်းသံတော်ဆင့်အားပြောသည်။
“၂ ထပ်ခွဲရှိတယ်သူတို့အိမ်က။ အိမ်အပေါ်ထပ်မှာဝုန်းခနဲမြည်ပြီး မီးထ လောင်တာ။ မီးသတ်ကား ၂ စီးနဲ့ ဒေသခံလူထုအင်အားနဲ့ငြိမ်းသတ်လို့ ၁ နာရီလောက်အကြာမှာမီးညွှန့်ကျိုးသွားတယ်။ အိမ်အောက်ထပ်မှာက အသုံးအဆောင်ကုန်ပစ္စည်းရောင်းတယ်လေ။ တော်သေးတယ်မီးမကူးလို့။အဲတာကြောင့် ဆုံးရှုံးမှုတော့ သိပ်မများဘူး။ ဖြစ်ချင်တာက အိမ်ရှင်ကခရီးထွက်နေတယ်။ ဆိုင်စောင့်အမကြီးတယောက်နဲ့ ကလေး ၂ ယောက် ၃ ယောက်ဘဲရှိတယ်။ ” – ဟု စိုင်းဆေကပြောသည်။
အခင်းဖြစ်ပွါးချိန်တွင် နေအိမ်အပေါ်ထပ်တွင် လူမနေကြောင်း ၊ ဆိုင်အတွင်းတွင်သာရှိနေကြကြောင်း ဆိုင်စောင့်သည့် ပါ့နန်းခမ်း ကပြောသည်။
မီးလောင်မှုဖြစ်ပွါးရသည့်အကြောင်းရင်းကိုမူ စုံစမ်းနေဆဲဖြစ်ပြီး မီးထိန်းစက်ကြောင့်ဖြစ်သည်ဟု အာဏာပိုင်များက ကနဦးမှတ်ချက်ပြုထားကြောင်းလည်းသိရသည်။
မီးလောင်မှုဖြစ်ပွါးသည့်အိမ်သည် စျေးအနီး မြို့လယ်ပိုင်းတွင် ကျနေပြီး မီးလောင်နေချိန် လေလည်းတိုက်ခတ်သဖြင့် မီးကူးစက်မည်ကို ဒေသခံများက စိုးရိမ်ထိတ်လှန့်နေကြသည်ဟုလည်းသိရပါသည်။
Leave a Comments