သျှမ်းပြည်မြောက်ပိုင်းမှာဖြစ်ပွါးခဲ့တဲ့တိုက်ပွဲတွေကြောင့် ကလေးငယ်တဦးခေါင်းမှာ လက်နက်ကြီးကျည်စ ထိမှန်ဒဏ်ရာရလို့ နယ်စည်းမခြား လူမှုကူညီရေးအဖွဲ့ကနေ လားရှိုး ဆေးရုံကိုပို့ပေးထားတယ်လို့သိရပါတယ်။

မတ်လ ၄ ရက်နေ့က  မြောက်ပိုင်းမဟာမိတ်တပ်ဖွဲ့နဲ့ RCSS တို့အကြား သီပေါမြို့နယ် (သီပေါ-ကျေးသီး-မိုင်းကိုင် ကြား) လွယ်ငင်းရွာအနီးမှာ တိုက်ပွဲတွေဖြစ်ပွါးခဲ့တာဖြစ်ပြီး လက်နက်ကြီးကျည် ဟာ ရွာထဲမှာကျတာကြောင့် နေအိမ်တလုံးကိုကျည်စ တွေထိမှန်ခဲ့ရာကနေ အသက် ၅ နှစ်အရွယ်ကလေးငယ်တဦးကို ကျည်စ ထိမှန်ခဲ့တာဖြစ်တယ်လို့သိရပါတယ်။

နယ်စည်းမခြား ပရဟိတအဖွဲ့နဲ့အတူ ကလေးငယ်ကိုဆေးရုံပို့ရာမှာ ပါဝင်ကူညီဆောင်ရွက်ပေးတဲ့ မန်လီဒေသခံ မိုင်းစိုင်း ကတော့ -“   လွယ်ငင်းရွာသားလေးပါ။ ကျနော်တို့ မန်လီဘုန်းကြီးကျောင်းကို ရောက်လာတာ ၂ ရက်ရှိပြီ။ ဒဏ်ရာက စိုးရိမ်ရတဲ့အဆင့်တော့မဟုတ်ဘူးဆိုပေမယ့်ကလေးဆိုတော့ လားရှိုးဆေးရုံကိုဆက်ပို့လိုက်တာပါ။ ကလေးက တအာင်းလူမျိုးဆိုတော့ ကျနော်က ကူညီပေးတဲ့ နယ်စည်းမခြားအဖွဲ့နဲ့လိုက်ပြီး ဘာသာပြန်ပေးတာပါ။ ” – လို့သျှမ်းသံတော်ဆင့်ကိုပြောပါတယ်။

လွယ်ငင်းရွာမှာ တအာင်းနဲ့ သျှမ်းလူမျိုးရောနှောနေထိုင်လျှက်ရှိပြီး လက်နက်ကြီးကျည်စ ထိမှန်တဲ့ ကလေးကတော့  မိုင်းအောင်ခမ်း (အသက် ၅ နှစ်) ဖြစ်ပါတယ်။ အဖွားဖြစ်သူနဲ့ နို့စို့အရွယ် ကလေးပိုက်ထားတဲ့ မိခင်ဖြစ်သူတဲ့အတူ နေထိုင်ပါတယ်။

မတ်လ ၄ ရက်နေ့ကဖြစ်ပွါးတဲ့တိုက်ပွဲကြောင့် လွယ်ငင်းရွာသား ၆၀၀ ကျော်ဟာ မန်လီရွာ ဘုန်းကြီးကျောင်းကို ခိုလှုံနေခဲ့ရပါတယ်။ တိုက်ပွဲဆက်မဖြစ်တော့ဘူးဆိုပေမယ့် စစ်ရေးတင်းမာ နေတဲ့အခြေအနေမို့ ကနေ့အထိ ရွာသားတွေဟာ နေရပ်မပြန်နိုင်ကြသေးပါဘူး။ လက်ရှိမှာ သီပေါမြို့နယ်မှာ စစ်ဘေးရှောင် ၂၄၀၀ ကျော်ရှိနေပြီးတော့ စားနပ်ရိက္ခာအထူး လိုအပ်နေတယ်လို့သိရပါတယ်။