မတ်လ ၁ ရက်နေ့တွင်ကျရောက်သော သျှမ်းလူငယ်များနေ့ Tai Youth Day အထိမ်းအမှတ်အဖြစ် မြန်မာနိုင်ငံလုံးဆိုင်ရာ ရှမ်းလူငယ်ကွန်ရက် Tai Youth Network မှဦးဆောင်ကာ ချစ်ကြည်ရေး ဘောလုံးပြိုင်ပွဲနှင့် စာပေဟောပြောပွဲ ကျင်းပမည်ဖြစ်ကြောင်းသိရသည်။

သျှမ်းပြည်မြောက်ပိုင်း မူစယ်မြို့နယ် စယ်လန့်အုပ်စုတွင် ကျင်းပမည်ဖြစ်ပြီး သျှမ်းလူငယ်များ စည်းလုံးညီညွတ်ရေးနှင့်ချစ်ကြည်ရင်းနှီးမှုကိုပြသရန်ဖြစ်ကြောင်း၊ ရှေ့ဆက်တွင်လည်း ချစ်ကြည်ရင်းနှီးမှုပိုမိုရရှိလာအောင်ဖြစ်ကြောင်း ဆိုပါသည်။

ဖေဖော်ဝါရီလ ၂၆ ရက်နေ့ အနယ်နယ်အရပ်ရပ်မှ သျှမ်းလူငယ်များ စယ်လန့်အုပ်စုတွင်တွေ့ဆုံကာ မိတ်ဆက်ခြင်းပြုရန်၊ ဖေဖော်ဝါရီ ၂၇ နှင့် ၂၈ ရက်နေ့တို့တွင် စယ်လန့်လူငယ်၊ မူစယ်လူငယ် TYN နှင့် နမ့်ခမ်းလူငယ်အဖွဲ့တို့ ချစ်ကြည်ရေးဘောလုံးကန်ကြမည်ဖြစ်ပြီး မတ်လ ၁ ရက်နေ့တွင်မူ ဗဟုသုတဖြစ်စေသည့် ဟောပြောပွဲကျင်းပမည်ဖြစ်ကြောင်း သိရသည်။

သဘာဝပတ်ဝန်းကျင်ထိန်းသိမ်းရေးနှင့်ပတ်သက်ပြီးဟောပြောမည့် စိုင်းခေးဆိုင်က -“ ကျနော်က သဘာဝပတ်ဝန်းကျင်ထိန်းသိမ်းရေးနဲ့ပတ်သက်ပြီး ဟောပြောမှာ။ အမှိုက်ကိုစနစ်တကျစွန့်ပစ်တတ်ဖို့ သစ်ပင်သစ်တောမြတ်နိုးတတ်ဖို့စတာတွေကို လူငယ်တွေနဲ့ပူးပေါင်းပြီးလုပ်ဆောင်သွားရင် ထိရောက်မယ်လို့ ယူဆ ပါတယ်။ ” – ဟု သျှမ်းသံတော်ဆင့်အားပြောသည်။

သဘာဝပတ်ဝန်းကျင်ထိန်းသိမ်းရေးအတွက်လှုပ်ရှားသူ စိုင်းခေးဆိုင် အပြင် သျှမ်းပေစာဖတ်ကြားရေးတွင် ကျွမ်းကျင်သူ စလေးကော်မိန်း ၊ အမျိုးသားလွှတ်တော်ကိုယ်စားလှယ်စိုင်းဝမ်းလျန်းခမ်းတို့လည်း ဟောပြော မည်ဖြစ်ကြောင်းသိရသည်။

ရှမ်းတိုင်းရင်းသားများဒီမိုကရေစီအဖွဲ့ချုပ် SNLD ၏ အမျိုးသားလွှတ်တော်ကိုယ်စားလှယ်စိုင်းဝမ်းလျန်းခမ်းက -“နိုင်ငံရေးကို မသိရင် အဘက်ဘက်မှာ နောက်ကျနိုင်ပြီး နိုင်ငံရေးနားလည်ရင် ဘယ်အပိုင်းမှာပဲဖြစ်ဖြစ် လူတကာထက် နှာတဖျားတော့ သာလိမ့်ပါမယ်လို့ ထင်မြင်ယူဆပါတယ်ခင်ဗျ ”- ဟု သျှမ်းသံတော်ဆင့်အားပြောသည်။

စာပေပညာရှင် ၊ သျှမ်းပြည်အလံတင် အမျိုးသားသီချင်း ခေးတိုင်းခေးရာဇာ ရေးသားသူ ဒေါက်တာဘဉာဏ် အားဂုဏ်ပြုသောအားဖြင့် ၄င်း၏ မွေးနေ့ဖြစ်သော မတ်လ ၁ ရက်နေ့ကို သျှမ်းလူငယ်များနေ့ Tai Youth Day အဖြစ်သတ်မှတ်ရန် ၂၀၁၇ ခုက ပဲခူးတိုင်း တောကျွဲအင်းမြို့တွင်ကျင်းပသော Tai Youth Conference ညီလာခံကြီးတွင် ဆုံးဖြတ်ခဲ့ကြသည်။ ၂၀၁၈ ခုနှစ်က ပထမအကြိမ် သျှမ်းလူငယ်များနေ့အထိမ်းအမှတ်အဖြစ် သီပေါ- ကျောက်မဲ ကားလမ်းညာဘက်ခြမ်းရှိ သီပေါစော်ဘွားများနှင့်ဆွေတော်မျိုးတော်များအုဋ်ဂူနှင့် ဒေါက်တာဘဉာဏ် နှင့်ဇနီး တို့၏ အုဋ်ဂူတွင် သျှမ်းလူငယ်များတွေ့ဆုံကာ ဒေါက်တာဘဉာဏ်၏ အတ္ထုပ္ပတ္တိ အကြောင်းဟောပြောခြင်း ၊ အုဋ်ဂူများအား ပြုပြင်မွမ်းမံခြင်းများပြုလုပ်ခဲ့သည်။