သျှမ်းပြည်မြောက်ပိုင်း မူဆယ်မြို့နယ် စယ်လန့်ကျေးရွာအုပ်စုတွင် ယနေ့ နိုဝင်ဘာ (၁၇) ရက် မနက်ပိုင်းအချိန်၌ ပစ်ခတ်သံကြားရကြောင်း ဒေသခံများ ထံ စုံစမ်းသိရသည်။
အဆိုပါ ပစ်ခတ်သံကြားသည့် ဒေသသည် တအောင်း(ပလောင်) အမျိုးသားလွှတ်မြောက်ရေး တပ်မတော် (TNLA) လှုပ်ရှားရာ ဒေသဖြစ်ကြောင်း ဒေသခံများ ပြောပြချက်အရ သိရသည်။
“ပစ်ခတ်သံကြားရတာ ဟုတ်ပါတယ်။ ဘယ်အဖွဲ့လည်းတော့ သေချာမသိဘူး။ TNLA နဲ့တပ်မတော်နဲ့ လား ဒါမှမဟုတ် မြောက်ပိုင်းမဟာမိတ် တပ်ဖွဲ့တွေနဲ့လားဆိုတာတော့ အတည်ပြု လို့မရသေး” ဟု စယ်လန့်ဒေသခံ စိုင်းအိုက် က သျှမ်းသံတော်ဆင့် ကိုပြောသည်။
အဆိုပါ ပစ်ခတ်မှုကို တအောင်း(ပလောင်) လွှတ်မြောက်ရေးတပ်မတော် (TNLA) ကို ဆက်သွယ်မေးမြန်းရာ ၎င်းတို့သည် အစိုးရ တပ်မတော်နှင့် တိုက်ပွဲမဖြစ်ပွားခဲ့သည်မှာ ၃ ပတ်ကျော် ရှိပြီဖြစ်ကြောင်း တားအိုက်ကျော် က သျှမ်းသံတော်ဆင့် ကိုပြောသည်။
“ကျနော့်ဆီမှာ အချက်လက်တွေ မတက်လာသေးဘူး။ ကျနော်တို့ တိုက်ပွဲမဖြစ်တာ ၃ ပတ်ကျော် ၁ လ နီးပါးလောက်ရှိပါပြီ။” ဟု (TNLA) ၏ပြောရေးဆိုခွင့်ရှိသူ မိုင်းအိုက်ကျော် က သျှမ်းသံတော်ဆင့် ကိုပြောသည်။
မူဆယ်မြို့နယ်တွင်း အစိုးရတပ်မတော် တပ်မ(၈၈) နှင့် (၉၉ )၊ တိုင်းရင်းသားလက်နက်ကိုင် တပ်ဖွဲ့ဖြစ်သည့် TNLA နှင့် သျှမ်းပြည် ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS/SSA)တို့ လှုပ်ရှားသည့် နယ်မြေဖြစ်ကြောင်း သိရသည်။
