သျှမ်းဝတ်စုံကိုယ်စီ နဲ့ လူငယ်တွေဟာ မြေနီလမ်းအတိုင်း တက်ကြွတဲ့ ခြေလှမ်းတွေ နဲ့ လမ်းလျှောက်လာကြပါတယ်။

သူတို့ဟာ ညောင်ပင်ကြီးအောက်မှာ ပြုလုပ်တဲ့ ဟောပြောပွဲတစ်ခုကို ဦးတည်ပြီး လာနေကြတဲ့ လူငယ်တွေဖြစ်ပါတယ်။

အဲ့ဒီနေရာကတော့ သျှမ်းပြည် လားရှိုးခရိုင် သီပေါမြို့နယ် မိန်းခေးကျေးရွာအုပ်စု ဓမ္မသုခကျောင်းကွင်းပြင်မှာ ပြုလုပ်တဲ့ သျှမ်းလူငယ်များနေ့ အခမ်းအနားဖြစ်ပြီး တက်ရောက်လာတဲ့သူတွေဟာ ၅၄၀ ကျော်ရှိပါတယ်။

အဲ့ဒီ သျှမ်းလူငယ်များနေ့ ပွဲဟာ ၄ ကြိမ်မြောက် ပြုလုပ်တဲ့ပွဲဖြစ်ပြီး၊ စာပေဟောပြောပွဲ နဲ့ အားကစားပွဲတွေကိုပါ ထည့်သွင်းထားပါတယ်။

“ ဒီ သျှမ်းလူငယ်များနေ့အတွက် ကျနော်တို့ အစီစဉ်ကတော့ စာပေဟောပြောပွဲပါတယ်။ ပြီးတော့ နေ့လည်ဆိုရင်လည်း အားကစားပေါ့။ ညအချိန်ကျတော့ ဖျော်ဖြေပွဲတွေရှိတယ်”လို့ ပွဲစီစဉ်သူ စိုင်းထွန်းအောင်က ပြောပါတယ်။

စာပေဟောပြောပွဲမှာလည်း သျှမ်းစာရေးဆရာ ဟိဏ်းကာယန်း၊ သဘာဝပတ်ဝန်းကျင် ပညာရှင် စိုင်းခေးဆိုင် ၊ အမျိုးသမီးအရေးဆောင်ရွက်သူ နန်းခမ်းယုံ နဲ့ စာရေးကော်မိန်း တို့က လူငယ်တွေအတွက် စာပေဟောပြောခဲ့ပါတယ်။

အဲ့ဒီ ဟောပြောပွဲထဲတွင် သျှမ်းစာရေးဆရာ ဟိဏ်းကာယန်းက “ လူငယ်တွေက လူကြီးတွေရဲ့ မျှော်လင့်ချက် ဖြစ်တယ်။ ကလေးတွေအတွက်က အတုယူစရာ ဖြစ်တယ်။ တကယ်လို့ လူငယ်တွေက အတွေးခေါ်တွေ မှားသွားပြီဆိုရင် လူကြီးတွေ အတွက်လည်း မျှော်လင့်စရာမရှိဘူး။ ပြီးတော့ ကလေးတွေအတွက်လည်း အတုယူစရာမကောင်းဘူးလေ” လို့ ဟောပြောပွဲမှာ ပြောဆိုခဲ့ပါတယ်။

စာပေဟောပြောပွဲတွင် ဟိဏ်းကာယန်းက လူငယ် နှင့် ရည်ရွယ်ချက်၊ ပညာရေးအကြောင်း ၊ စိုင်းခေးဆိုင် က သဘာဝအကြောင်း နှင့် အနုပညာရေးပိုင်း၊ နန်းခမ်းယုံက ဘဝအတွေ့အကြုံ နှင့် အမျိုးသမီးလူငယ်တွေအတွက် ခွန်အား ၊ စာရေးကော်မိန်းက စာပေရေးရာ နှင့် စည်းလုံးခြင်း စတဲ့ ခေါင်းစဉ်အသီးသီးကို ဟောပြောခဲ့ပါတယ်။

စာပေပညာရှင် ၊ သျှမ်းပြည်အလံတင် အမျိုးသားသီချင်း “ခေးတိုင်းခေးရာဇာ” ရေးသားသူ ဒေါက်တာဘဉာဏ် အား ဂုဏ်ပြုတဲ့အနေနဲ့ သူ့မွေးနေ့ ဖြစ်တဲ့ မတ်လ ၁ ရက်ကို သျှမ်းလူငယ်များနေ့ Tai Youth Day အဖြစ်သတ်မှတ်ရန် ၂၀၁၇ ခုနှစ်က ပဲခူးတိုင်း တောကျွဲအင်းမြို့တွင်ကျင်းပသော Tai Youth Conference ညီလာခံကြီးမှာ ဆုံးဖြတ်ခဲ့ကြပါတယ်။

အာဏာသိမ်းပြီးနောက်ပိုင်း လူငယ်တွေ အများအပြား ဖမ်းဆီးခံခဲ့ရပြီး နယ်မြေခြားသို့ ထွက်ပြေးတိမ်းရှောင်နေရတဲ့ အတွက်ကြောင့် ယခင်ကလို လူငယ်တွေ များပြားမှု မရှိတော့ကြောင်း စိုင်းထွန်းအာင်က အခုလိုပြောပါတယ်။

“ ကျနော်တို့ ဦးဆောင်တဲ့သူတွေ ပြန်လာတွေ့ဆုံဖို့ကလည်း ခက်ခဲမှုရှိတယ်။ ကိုဗစ် နဲ့ နိုင်ငံရေးကြောင့်လည်း ပါတာပေါ့ ။ အာဏာသိမ်းတာကြောင့် ကျနော်တို့ လူငယ်တွေ ဆန္ဒပြလို့ ဖမ်းခံရတာလည်းရှိတယ်။ တစ်ချို့ကလည်း ထွက်ပြေး တိမ်းရှောင် နေရတာရှိတယ်” လို့ စိုင်းထွန်းအောင်က အခုနှစ်အတွက် ပြုလုပ်ရတဲ့ ပွဲအခက်အခဲကြောင်းကို ပြောပြတာဖြစ်ပါတယ်။

လက်ရှိ နိုင်ငံရေးအခြေနေကြောင့် လူငယ်တွေ ထွက်ပြေးတိမ်းရှောင်နေရပြီး ပညာရေးပိုင်း ကောင်းမွန်စွာ ဆက်လက်သင်ကြားခွင့်မဲ့နေပါတယ်။

ထွက်ပြေးတိမ်းရှောင်နေရတဲ့ လူငယ်တွေ နဲ့ ပညာသင်ကြားခွင့်မဲ့နေတဲ့ လူငယ်တွေ အတွက် နန်းခမ်းယုံက ဇွဲမလျော့ဘဲ လုပ်သွားပါက အောင်မြင်သွားနိုင်ကြောင်း ဟောပြောသွားခဲ့ပါတယ်။

“ ကျမတောင် ၉ တန်းနဲ့ကျောင်းပြီးပြီး လူ့အသိုင်းဝိုင်းထဲမှာ အကူညီပြုနိုင်ခဲ့တယ်။ ကျမ ဘဝတိုးတက်ဖို့ လုပ်နိုင်ခဲ့တယ် ဆိုရင် ဒီနားမှာ ထိုင်နေတဲ့ လူငယ်တွေကလည်း ပညာရေးပိုင်း မကောင်းခဲ့လို့ အားငယ်မနေဘဲ လူ့အသိုင်းဝိုင်းထဲ အလုပ်လုပ်ချင်တယ်ဆိုရင် ဖြစ်နိုင်တယ်လို့ ကျမကတော့ လူငယ်တွေကို အားပေးချင်ပါတယ်” လို့ နန်းခမ်းယုံက ဟောပြောထားပါတယ်။

လူငယ်တွေဟာာ နောင်တစ်ချိန်မှာ လူကြီးဖြစ်လာပြီး ကိုယ့်လူမျိုး၊ ကိုယ့်နိုင်ငံ တာဝန်ထမ်းဆောင်ရမယ့် သူတွေဖြစ်တာကြောင့် လူငယ်တွေအနေနဲ့ ကိုယ့်လူမျိုးရေး၊ ကိုယ့်နိုင်ငံရေး အကြောင်းကို စိတ်ဝင်စားပြီး ပါဝင်ပူးပေါင်းဆောင်ရွက်သင့်ကြောင်းကို ပွဲစီစဉ်သူ ယိင်းကွမ်လျန်က ပြောပါတယ်။

“ အခုခေတ်လူငယ်က နောင်တစ်ချိန်မှာ လူကြီးဖြစ်မဲ့သူတွေပေါ့။ အခုခေတ်လူငယ်တွေက ကိုယ့်လူမျိုးတွေကို စိတ်မဝင်စားဘူးဆိုရင် ဘယ်သူက လာလုပ်မလဲပေါ့။ လူငယ်တွေကိုမှာချင်တာတော့ ကိုယ်မလုပ်ရင် ဘယ်သူလုပ်မလဲ။ ပြီးတော့ ကိုယ့်တိုင်းပြည်အတွက် ကိုယ့်သမိုင်းကို ဘယ်လိုရေးကြမလဲပေါ့နော်” ဟု ယိင်းကွမ်လျန်က ပြောပါတယ်။