လားရှိုးမြို့နယ်အတွင်း သျှမ်းလူငယ်များနေ့ Tai Youth Day အထိမ်းအမှတ် ကျင်းပရန်အတွက် လားရှိုး သျှမ်းလူငယ်အဖွဲ့အစည်းများမှ ကိုယ်စားလှယ်များ ယနေ့မွန်းလွဲပိုင်းက လားရှိုးမြို့သျှမ်းစာပေနှင့်ယဉ်ကျေးမှုရုံး တွင် တွေ့ဆုံဆွေးနွေးခဲ့ကြသည်။
ဖေဖေါ်ဝါရီလ ၂၆ ရက် မွန်းတည့် ၁၂ နာရီ ခွဲအချိန်မှစ၍ လားရှိုးမြို့နယ်အတွင်းရှိ သျှမ်းလူငယ်ဖွဲ့ ၁၅ ဖွဲ့မှ ကိုယ်စားလှယ် လူငယ် ၅၁ ယောက် တက်ရောက်သည့် အစည်းအဝေး တွင် လူငယ်များချစ်ခင်ရင်းနှီးမှု ရှိစေရန်၊ ချိတ်ဆက်အား ကောင်းစေရန် အတွက် မတ်ချ်လ ၁ ရက်နေ့တွင်ကျရောက်မည့် သျှမ်းလူငယ်များနေ့ Tai Youth Day အထိမ်းအမှတ် ကျင်းပရန် ဆုံးဖြတ်ခြင်းဖြစ်သည်။
သျှမ်းလူငယ်များနေ့ အထိမ်းအမှတ်အခမ်းအနားဖြစ်မြောက်ရေး အတွက် ပြောရေးဆိုခွင့်ရှိသူ နန်းငင်းဟွမ် က – “ Tai Youth Day ကို ကျမတို့ လားရှိုးသျှမ်းလူငယ်တွေနဲ့ TYN ပူးပေါင်းပြီးတော့ လားရှိူးမြို့မှာ ကျင်းပမှာ။ Talk Show အစီအစဉ်လေး နဲ့ အမေး အဖြေ အစီအစဉ်လေးရှိမယ်။ မြို့ထဲရှိလူကြီး၊ လူငယ်တွေပါမယ်။ တစ်ခြားမြို့တွေမှာလည်း Tai Youth Day ကျင်းပဖို့ သျှမ်းလူငယ်တွေကို တိုက်တွန်းချင်ပါတယ်။ ” -ပြောသည်။
လွတ်လပ်ရေးကြိုးပမ်းစဉ်က သျှမ်းလူငယ်အရေး ဦးဆောင်သူ၊ သျှမ်းလူငယ်ကျန်းမာရေးအဖွဲ့ ထူထောင်သူ၊ သျှမ်းအမျိုးသားအလံတော်သီချင်းရေးစပ်သီကုံးသူ သီပေါနယ်ရှင်စော်ဘွားကြီး၏ ပညာရေး၊ ကျန်းမာေ ရးဝန်ကြီး ဒေါက်တာခွန်ဘဉာဏ်အား ဂုဏ်ပြုမှတ်တမ်း တင်ရန်အတွက် ၄င်း၏မွေးနေ့ဖြစ်သော မတ်လ ၁ ရက်နေ့ကို အစွဲပြု၍ သျှမ်းလူငယ်များနေ့ Tai Youth Day အဖြစ် နိုင်ငံလုံးဆိုင်ရာ သျှမ်းလူငယ်ပူပေါင်းဆောင်ရွက်ရေးအသင်း TYN မှ သတ်မှတ်ကာ ၂၀၁၉ ခုနှစ်က စယ်လန့်တွင် ပထမ ဆုံးအကြိမ်ကျင်းပခဲ့သည်။
(ယိင်းယိင်း ရေးသားပေးပို့သည်)
