စစ်ရေးတင်းမာမှုကြောင့် ထိုင်း နယ်စပ် သို့ ထွက်ပြေးတိမ်းရှောင်နေသည့် သျှမ်းပြည်တောင်ပိုင်း လင်းခေးခရိုင် မိုင်းပန်မြို့နယ် ပန်ပိတောင်ပေါ်မှ စစ်ဘေးရှောင် ရွာသား ၃၀၀ ကျော် မှာ ယနေ့နေ့ခင်းပိုင်း နေရပ်သို့ ပြန်ရောက်ပြီဖြစ်ကြောင်းသိရသည်။

မိုင်းပန်မြို့နယ် နားမွန်အုပ်စု မိုက်ပုတ်ရွာ ပန်ပိရွာ နောင်ချိုရွာမှ စစ်ဘေးရှောင် ရွာသား ၃၀၀ ကျော်မှာ ဇန်နဝါရီလဆန်းပိုင်းက သံလွင်အရှေ့ခြမ်း ၀ ထိန်းချုပ်နယ် ထိုင်းနယ်စပ်ရှိ ဟွေ့အော့ နားကောင်းမူး အုပ်စုသို့ တိမ်းရှောင်ခဲ့ရာမှ ရလခတိုင်း ဆင့်ဆိုမှုကြောင့် ဇန်နဝါရီလ ၆ ရက်နေ့က ရလခလက်အောက်ခံတပ်များနှင့် “ ဝ” တပ်ဖွဲ့တို့ ပူးပေါင်းကာ နေရပ်သို့ ပြန်ပို့ခဲ့ခြင်းဖြစ်ကြောင်း သိရသည်။

စစ်ရှောင်များအား နေရပ်ပြန်နိုင်ရေး ကူညီမှုပေးနေသည့် မိုင်းပန် ဒေသခံ စိုင်းလုံ က – “ စစ်ရှောင် ၃၀၉ ယောက်ပါ။ မနေ့က မနက်ပိုင်းက နားကောင်းမူးကနေထွက်လာတယ်။ မိုင်းတုံမှာနေ့လည်စာဝင်စားပြီးတော့မှ တာ့ဆန်းတံတားအထိ ပို့တယ်။ သူတို့ တွေ တာ့ဆန်း တံတားက ခလရ ၂၉၄ မှာညအိပ်တယ်။ ဒီနေ့ မနက်ပိုင်း လင်းခေးဗျူဟာကနေ စစ်ကားကြီး ၁၂ စီးပို့ပြီး သွားကြိုလာတယ်။ – ဟု သျှမ်းသံတော်ဆင့်အားပြောပြသည်။

စစ်ရှောင်များအား မိုင်းပန်မြို့တွင်းမှ နေရပ်ဖြစ်သော ပန်ပိတောင်ပေါ် မိုက်ပုတ်ရွာအထိ စစ်ကား ရ စီးနှင့်အတူ အရပ်သားကားများ စုစုပေါင်းအစီးရေ ၂၀ ကျော်က ပို့ဆောင်ပေးခဲ့ကြောင်းလည်း စိုင်းလုံက ပြောသည်။

“အရပ်သားကားတွေကို တစီး ၁ သိန်းကျော်ပေးငှားပြီးပို့ပေးခိုင်းတယ်လို့ကြားရပါတယ်။ စစ်ရှောင်တချို့တော့ ကြောက်ရွံ့စိုးရိမ်တာရှိနေသေးတယ်။အခြေအနေဘယ်လိုဆက်ရှိမလဲမသိဘူးလေ။ ” – ဟုလည်း ၄င်းကဆက် ပြောသည်။

အဆိုပါ စစ်ဘေးရှောင် များသည် မိုင်းပန်မြို့နယ် အရှေ့တောင်ဘက် ပန်ပိတောင်ကြော တဝိုက် လှုပ်ရှား နေသော RCSS/SSA ၊ မကြာသေးခင်က ထပ်မံရောက်ရှိလှုပ်ရှားလာသော PNLO တပ်များအကြား စစ်ရေး တင်းမာမှု တပ်သားသစ် စုဆောင်းမှုကြောင့် တချို့တဝက်မှာ မိုင်းပန်အနောက်ဘက်ရှိ လင်းခေးမြို့သို့ လည်းကောင်း၊ တချို့တဝက်မှာ မိုင်းပန်မြို့တွင်းသို့လည်းကောင်း တချို့တဝက်မှာ ထိုင်းနယ်စပ်သို့လည်းကောင်း အသီးသီးထွက်ပြေးတိမ်းရှောင်ခဲ့ကြခြင်းဖြစ်သည်။ ဒေသခံများမှာ သျှမ်း၊ ပအို၀်း လူမျိုးများရောနှော နေထိုင်ကြ ကြောင်း ရွာသားများပြောပြချက်အရသိရသည်။

နားမွန်အုပ်စုအတွင်း RCSS/SSA နှင့် PNLO/PNLA တို့သည့် ၂၀၁၈ ခုနစ် မှစတင်က အပြန်အလှန် စစ်ရေး တင်မားမှု ဖြစ်ပွားကာ သျှမ်းဘုန်းကြီးကျောင်းနှင့် ပအိုဝ့်ဘုန်းကြီးကျောင်း လည်း မီးရှို့ ဖျက်ဆီးခံရပြီး အရပ်သားပြည်သူများ မှာ စိုးရိမ်ပူပန်မှုများကြား နေထိုင်နေရသည်။