တပ်မတော် သတင်းများကို သက်ဆိုင်ရာမှ စိစစ်ပြီးမှသာ ပြည်သူများကို တင်ပြရန်နှင့် စိစစ် ခြင်းမရှိဘဲ ရေးသားသည့် သတင်းဌာနများကို ဥပဒေ နှင့် အညီ ဆောင်ရွက်သွားမည် ဟု တပ်မတော် သတင်းမှန်ပြန်ကြားရေး အဖွဲ့ မှ ယမန်နေ့ ဒီဇင်ဘာ ၂၈ ရက်စွဲဖြင့် ထုတ်ပြန်ကြေညာခဲ့သည်။
သတင်းဌာနများအနေဖြင့် တပ်မတော် သတင်းများအား သက်ဆိုင်ရာ လုံခြုံရေး နှင့် နယ်စပ်ရေးရာဝန်ကြီး များနှင့် တိုင်းစစ်ဌာနချုပ်များမှ တိုင်းဦးစီးဗိုလ်ချုပ်ကြီးများထံ သတင်းစိစစ်အတည်ပြုခြင်းများပြုလုပ်ပြီးမှသာ ပြည်သူများသို့ အမှန်အတိုင်း တင်ပြဆောင်ရွက်ရန် တပ်မတော် သတင်းမှန် ပြန်ကြားရေး အဖွဲ့ ၏ ထုတ်ပြန်ချက်တွင်ရေးသားထားသည်။
ထို့အပြင် ငြိမ်းချမ်းရေး ရရှိရန် ဆောင်ရွက်ချက်များအပေါ် အထင်အမြင်လွဲမှားစေမည့် မဟုတ်မမှန် သတင်း ထုတ်ပြန်မှုများအားမပြုလုပ်ရန် လိုအပ်ကြောင်းလည်း အဆိုပါ ထုတ်ပြန်ချက်တွင်ဖော်ပြထားသည်။
သျှမ်းပြည်နယ် မြောက်ပိုင်း ကွတ်ခိုင်မြို့နယ် အတွင်း ဒီဇင်ဘာ ၂၄ရက်နေ့တွင် တအာင်း (ပလောင်) လွတ်မြောက်ရေးတပ်မတော် (TNLA) နှင့် တပ်မတော်စစ်ကြောင်းများ တိုက်ပွဲများဖြစ်ပွားသည်ဟု ပြည်တွင်း၊ ပြည်ပ မီဒီယာများ က တဖက်သတ် (TNLA) ထုတ်ပြန်ချက်ကို ကိုးကားပြီးရေးသားကြကြောင်း၊ တပ်မတော် နှင့် TNLA ထိတွေ့မှုတိုက်ပွဲမရှိကြောင်း နှင့် ငြိမ်းချမ်းရေး အား ဖြစ်မြောက်မှု အားနည်း စေရန် အတွက် သွေးတိုး လှုံ့ဆော် မှုများ မပြုလုပ်ရန် လိုအပ်ကြောင်း ဒီဇင်ဘာ ၂၅ ရက်တပ်မတော် သတင်းမှန် ပြန်ကြားရေး အဖွဲ့ မှ သတင်းထုတ်ပြန်ခဲ့ပြီး ဖြစ်သည်။
ထိုနည်းတူ သီပေါမြို့နယ်၊ နားမခေါ်ကျေးရွာအုပ်စုအတွင်းရှိ တွန်ကြိုင်းကျေးရွာ အနီးတွင် ၂ ဒီဇင်ဘာ ၂၄ ရက်နှင့် ဒီဇင်ဘာ ၂၅ ရက်နေ့များ၌ သျှမ်းပြည် တိုးတက်ရေးပါတီ SSPP နှင့် သျှမ်းပြည် ပြန်လည်ထူထောင်ရေးကောင်စီ RCSS တို့ ထိတွေ့တိုက်ပွဲဖြစ်ပွားရာတွင် တပ်မတော်စစ်ကြောင်းများက RCSS နှင့် ပူးပေါင်း၍ လက်နက်ကြီး များ ဖြင့် ပစ်ကူပေးတိုက်ခိုက်ခဲ့ကြောင်း SSPP သတင်းနှင့် ပြန်ကြား ရေးဌာနမှ ထုတ်ပြန်မှုအပေါ် ပြည်တွင်း၊ ပြည်ပ မီဒီယာ တချို့ ဖော်ပြမှုများရှိကြောင်း၊ တပ်မတော်အနေဖြင့် မည်သည့် ဘက်မှ ပါဝင်ကူညီပေးခြင်းမရှိကြောင်း လည်း ထုတ်ပြန်ချက်တွင် ဖော်ပြထားသည်။
တပ်မတော်အပေါ်အထင်အမြင်လွဲမှားစေရန် တစ်ဖက် တည်းမှပြောဆိုမှုများကို ကိုးကား၍ ငြိမ်းချမ်းရေး ရရှိ ရန်ဆောင်ရွက်နေမှုအား ပျက်ပြားစေရန် ရေးသား ထုတ်လွှင့်နေခြင်း ဟုလည်း ကြေညာချက်တွင် ရေး သားထားသည်။
တပ်မတော်၏ အနာဂတ်လုပ်ငန်းများနှင့် အများပြည်သူ မသိသင့်မသိထိုက်သော အကြောင်းအရာများ မှလွဲ၍ ကျန်ဖြစ်စဉ်များကို သက်ဆိုင်ရာလုံခြံုရေးနှင့် နယ်စပ်ရေးရာဝန်ကြီးများနှင့် တိုင်းစစ်ဌာနချုပ်များမှ တိုင်းဦးစီးဗိုလ်မှူးကြီးများထံမှ သတင်းရယူရန်နှင့် စိစစ်အတည်ပြုနိုင်ရေး ခွင့်ပြုထားပြီးဖြစ်ကြောင်း တရားဝင် ညွှန်ကြားထားပြီး ဖြစ်သည် ဟု သိရသည်။
