သျှမ်းပြည်မြောက်ပိုင်း သီပေါမြို့နယ်အတွင်း လက်နက်ကိုင်တပ်ဖွဲ့များ ပစ်ခတ်တိုက်ခိုက်မှုများကြောင့် ရွာသား ၃၀၀ ကျော်နေရပ်မှ စွန့်ခွါထွက်ပြေးနေရကြောင်း သိရသည်။

မြောက်ပိုင်းမဟာမိတ်တပ်ဖွဲ့ဝင် SSPP/SSA နှင့် RCSS/SSA တပ်ဖွဲ့တို့ကြားပစ်ခတ်တိုက်ခိုက်မှုများကြောင့် သီပေါမြို့နယ် ခိုင်းဟျိုးအုပ်စုအတွင်း စစ်ဘေးရှောင် ၃၀၀ ကျော် နေရပ်မှ စွန့်ခွါထွက်ပြေးနေရခြင်းဖြစ်သည်။

ဒီဇင်ဘာလ ၂၅ ရက် မနက်ပိုင်းက သီပေါမြို့နယ် တွန်ကျိုင်းရွာနှင့် ခိုင်းဟျိုးရွာသား ၁၅၀ ကျော်နားမခေါ်ရွာ ဘုန်းကြီးကျောင်းသို့လည်းကောင်း၊ ၁၄၀ ကျော် မှာ နောင်ကော့ဘုန်းကြီးကျောင်းသို့လည်းကောင်း စစ်ဘေး ရှောင်များရောက်ရှိခိုလှုံနေရကြောင်းသိရသည်။

နားမခေါ်ဘုန်းကြီးကျောင်းရောက် စစ်ဘေးရှောင်တဦးက -“ မနေ့က (၂၄ ရက်နေ့က ) တိုက်ပွဲတွေစဖြစ်တာ။ တွန့်ကျိုင်းရွာထဲကိုလက်နက်ကြီးကျည်ကျတယ်။ နေအိမ်တလုံးမီးလောင်တယ်။ ဘုန်းကြီးကျောင်း တကျောင်းလည်းပျက်စီးတယ်။ သေကြေဒဏ်ရာရမှုတော့မရှိဘူး ။ ရွာသားတွေတော့ မနေ့ညနေကတည်းက စပြီးထွက်ပြေးတယ်။ ဒီနေ့မနက်လည်း တဖွဲဖွဲ ထွက်ပြေးလာနေတယ် ”- ဟု သျှမ်းသံတော်ဆင့်အားပြောသည်။

လက်ရှိတွင် စစ်ဘေးရှောင်များအား ကူညီကယ်ထုတ်ရန်အတွက် လူမှုကူညီရေးအသင်းအဖွဲ့မှ ကား ၄ စီး ( သီပေါမှ ၃ စီးနှင့် နမ့်လန်မှ ၁ စီး) ဟိုနားရွာသို့ ရောက်ရှိစောင့်ဆိုင်းနေကြောင်းသိရသည်။

စစ်ဘေးရှောင်များအား ကူညီပေးနေသည့် စစ်ရှောင်ကူညီရေးအဖွဲ့ဝင်တဦးက – “ဒီနေ့ ကျနော်တို့ ဟိုနားရွာမှာ သွားပြီးစောင့်ဆိုင်းတယ်။ ရွာသားတွေ တဖွဲဖွဲထွက်လာတယ်။ ရွာသားတွေအပြောအရတော့ လက်နက်ကိုင်တပ်ဖွဲ့ ၂ ဖက်လုံးက တပ်ဆုတ်ပေးတာ မရှိတဲ့ခါကျတော့ ရွာမှာ အမျိုးသမီးတွေ ကလေးတွေနဲ့ သက်ကြီးရွယ်အိုတွေ ရွာမှာကျန်ခဲ့တယ်။ မထွက်လာနိုင်သေးဘူး။” – ဟု သျှမ်းသံတော်ဆင့်အားပြောပြသည်။

ယခုနှစ်နှောင်းပိုင်းအတွင်း သီပေါမြို့နယ်အတွင်း တိုက်ပွဲများ ဆက်တိုက်ဖြစ်ပွါးနေမှုကြောင့် ရွာသားများမှာ တနှစ်ပတ်လုံးစစ်ဘေးရှောင်နေရကြောင်း၊ လာမည့်နှစ်အတွက် စားနပ်ရိက္ခာပူပန်ရကြောင်း ရွာသားများက ပြောဆိုနေကြပါသည်။

၂၀၁၈ ဒီဇင်ဘာ ၂၁ ရက်နေ့က အစိုးရ တပ်မတော်ကာကွယ်ရေးဦးစီးချုပ်ရုံး ထုတ်ပြန်ချက်တွင် တပ်မတော် အနေဖြင့် သျှမ်းပြည်အတွင်းအခြေစိုက် စစ်တိုင်းကြီးလေးတိုင်းအပါအဝင် ၂၀၁၉ ခု ဧပြီလ ၃၀ ရက်နေ့အထိ စစ်ရေးဆိုင်ရာလှုပ်ရှားမှုများအားလုံး ရပ်ဆိုင်းထားမည်ဟုဆိုသည်။ ဒါ့အပြင် တိုင်းရင်းသားလက်နက်ကိုင် အဖွဲ့ အချင်းချင်း တဖွဲ့နှင့်တဖွဲ့ အပြန်အလှန်အင်အားသုံးပြု၍ တိုက်ခိုက်ခြင်း၊ ဒေသခံတိုင်းရင်းသားများအပေါ် အနိုင် ကျင့်ခြင်းများကို မပြုလုပ်ရေး တာဝန်ယူထိန်းသိမ်းဆောင်ရွက်ရန် လိုအပ်သည်ဟုဆိုသည်။ မထိန်းသိမ်းဘဲ ပြုလုပ်ပါက တပ်မတော်အနေဖြင့် လိုအပ်သလို တားဆီးဆောင်ရွက်သွားမည်ဟု ထုတ်ပြန်ထားပါသည်။