သျှမ်းပြည်တောင်ပိုင်းမိုင်းကိုင်မြို့နယ် အတွင်းရှိ ဖောင်းမိန်းဆည်ပျက်စီးမှုနှင့်ပတ်သက်ပြီး မိုင်းကိုင်မြို့နယ် ပြည်နယ်လွှတ်တော်အမတ် လုံးစိုင်းလုံ က သျှမ်းပြည်နယ်လွှတ်တော် စတင်ကျင်းပသော ပထမရက်တွင် တင်သွင်းမေးမြန်းခဲ့ပါသည်။
အဆိုပါဆည်ပျက်စီးနေမှုအပေါ် ပြန်လည်တည်ဆောက်ပေးမည့်အစီအစဉ် ရှိမရှိ ဒီဇင်ဘာလ ၁၂ ရက်နေ့ တွင်ပြန်လည် စတင်သော ဒုတိယအကြိမ် သျှမ်းပြည်နယ်လွှတ်တော် ၁၂ ကြိမ်မြောက် ပုံမှန် အစည်းအဝေး ပထမနေ့တွင် မိုင်းကိုင်မြို့နယ် မဲဆန္ဒနယ်အမှတ် ၂ ကျားခေါင်းပါတီမှ လွှတ်တော်ကိုယ်စာလှယ် လုံးစိုင်းလုံက မေးမြန်းခဲ့ခြင်းဖြစ်သည်။
“မိုင်းကိုင်မြို့က ဖောင်းမိန်း ဆည်ပေါ့နော်။ အဲတာ အခုဆိုရင် ပျက်စီးနေပါပြီ။ ဒီနှစ်မိုးတွင်းတုန်းကပျက်စီးကုန်ပြီ။ ဆည်မြောင်းတွေဆင်းကြည့်တုန်းကလည်း တိုင်းတာပြီးပြီ။ ဒါမယ့် ခုထိုပြန်မလုပ်ပေးတော့ ဘယ်တော့ပြန်ဆောက်ပေးမလဲပေါ့။ မေးတာပါ။ ”- ဟု လုံးစိုင်းလုံ ကပြောသည်။
မိုင်းကိုင်မြို့အရှေ့ဘက်ရှိ ဖောင်းမိန်းဆည်သည် ဖောင်းမိန်း နောင်မွန်း ၀ိန်းငင်း ရွာမှ ဧက ၄၁၅ ဧကကျော်ရှိလယ်များအား ရေပေးဝေလျှက်ရှိသကဲ့သို့ ရွာသူရွာသားများမှလည်း စိုက်ပျိုးရေးနှင့် သောက်သုံးရေအဖြစ် အသုံးပြု ကြသည်။ ၄င်းပျက်စီးသွားသည့်အချိန်တွင် လယ်ရေသွင်းချိန်ဖြစ် သဖြင့် လယ်သမားများအခက်ကြုံတွေ့ရကြောင်း လုံးစိုင်းလုံက သျှမ်းသံတော်ဆင့်အားပြောပြသည်။
လယ်ယာနှင့်ဆည်မြောင်းဝန်ကြီးဌာနဝန်ကြီး စိုင်းလုံးကျောက်က – ၄င်းဆည်သည် စီမံကိန်းအတွင်းမပါ၀င်သဖြင့် ၊ စီမံကိန်းအတွင်းပါ၀င်မှသာ ထပ်မံစဉ်းစားပေးမည်ဖြစ်ကြောင်း- ဖြေဆိုသဖြင့် လာမည့်နှစ် စိုက်ပျိုးချိန်အတွက် ဒေသခံများစိုးရိမ်နေသည်ဟုသိရသည် ။
ထိုနေ့တွင် ဆည်နှင့်ပတ်သက်သည့်မေးခွန်းအပြင် ယာဉ်စီးကမ်းလမ်းစည်းကမ်းနှင့်ပတ်သက်ပြီး ဒေသခံလူထုအား ကွင်းဆင်းပညာပေးရန်အစီအစဉ် ရှိ မရှိကိုပါ လုံးစိုင်းလုံက ထပ်မံမေးမြန်းခဲ့ကြောင်း ၊ ၄င်းမေးခွန်းအား ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး လှဦးက ဖြေကြားရာတွင် – ယာဉ်ထိန်းအင်အားလုံ လောက်မှုမရှိသေးသဖြင့် လုံလောက်မှုရှိမှသာ မြို့နယ်တိုင်းကွင်းဆင်းပညာပေးမှုပြုလုပ်သွားမည်ဖြစ်ကြောင်း – သိရပါသည်။
သျှမ်းပြည်နယ်အစည်းအဝေးတွင် လွှတ်တော်ကိုယ်စားလှယ် ၁၄၁ ဦးအနက် ၁၂၂ ဦးတက်ရောက်ကြောင်းသိရသည်။
အစည်းအဝေးစတင်သည့်ရက်တွင် ကတိသစ္စာမပြုရသေးသော တပ်မတော်သား ပြည်နယ်လွှတ်တော်ကိုယ်စားလှယ် ရ ဦးက ကတိသစ္စာပြုရန်အတွက် ပြည်နယ်လွှတ်တော်ဥက္ကဌ ရှေ့မှောက်တွင် ကတိသစ္စာပြုလက်မှတ်ရေးထိုးခဲ့ကြောင်းလည်းသိရပါသည်။
