သျှမ်းပြည် မိုင်းကိုင်မြို့တွင် မူးယစ်ဆေးဝါးသုံးစွဲပြီး ဆေးကြောင်နေသော အမျိုးသားတစ်ဉီး ဓားကိုင်ရမ်းကားမှုကြောင့် ဆွေမျိုးဖြစ်သူ အမျိုးသား ၂ ဦးနှင့် အမျိုးသမီး ၂ ဦး ဓားခုတ်ခံရပြီး ဒဏ်ရာအပြင်းအထန် ရရှိခဲ့ကြောင်း စုံစမ်းသိရသည်။
ပြီးခဲ့သည့် သြဂုတ်လ ၁ ရက် ည ၆ နာရီဝန်းကျင်တွင် မိုင်းကိုင်မြို့ ရပ်ကွက် ၁ ၌ မူးယစ်ဆေးဝါး သုံးစွဲပြီး ဆေးကြောင်နေသော အမျိုးသားတစ်ဦးက ဆွေမျိုးများကို ဓားဖြင့် လိုက်ခုတ်ခဲ့ခြင်းကြောင့် အမျိုးသား ၂ ဦးနှင့် အမျိုးသမီး ၂ ဦး ထိခိုက်ဒဏ်ရာ အပြင်းအထန် ရရှိခဲ့ကြောင်း ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“အဲ့အမျိုးသားက အရက်ကော မူးယစ်ဆေးကော သုံးတာ။ အရင်တုန်းကလည်း အဲ့လို မူးလာရင် သူ့မိန်းမကို အိမ်ထဲ ထည့်ပိတ်ပြီး ရိုက်နှက်တာမျိုးတွေ လုပ်တယ်။ ခုက ဘာကိစ္စမှ မရှိဘဲ အိမ်ထဲဝင်ပြီး ဒီတိုင်း ဝင်ခုတ်တာ။ ၄ ယောက်မှာ ၂ ယောက်လောက်က အသက်အန္တရာယ် စိုးရိမ်ခဲ့ရတယ်” ဟု ဖြစ်စဉ်သိရှိသူ ၎င်းအမျိုးသားက ပြောသည်။
ထိုဒဏ်ရာရရှိသည့် ၄ ယောက်ထဲတွင် အမျိုးသမီးတစ်ဦးမှာ မျက်နှာနှင့် လက်မောင်း၌ ပြတ်ရှဒဏ်ရာ ပြင်းထန်ခဲ့ပြီး အမျိုးသားတစ်ဦးသည် ဦးခေါင်း၊ နားရွက်နှင့် လက်မောင်းတွင် ဒဏ်ရာအပြင်းအထန် ရရှိထားကြောင်း ၎င်းက ဆိုသည်။
လက်ရှိတွင် ဓားခုတ်ခံရသူ ၄ ဦးစလုံးသည် မိုင်းကိုင်မြို့နယ် ပြည်သူ့ဆေးရုံတွင် ဆေးကုသမှု ခံယူနေပြီး၊ ဓားခုတ်မှု ကျူးလွန်သည့် အမျိုးသားကို သက်ဆိုင်ရာ တာဝန်ရှိသူများက ရဲစခန်းတွင် ဖမ်းဆီးထိန်းသိမ်းထားကြောင်း ဒေသခံများထံမှ သိရသည်။
မိုင်းကိုင်မြို့သည် စစ်ကောင်စီနှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ထိန်းချုပ်သည့် ဒေသဖြစ်ပြီး စစ်အာဏာသိမ်းပြီးနောက်ပိုင်း မူးယစ်ဆေးဝါးသုံးစွဲသူ အများအပြား ရှိလာကြောင်း သိရသည်။
Leave a Comments