သျှမ်းပြည်တောင်ပိုင်း လွိုင်လင်ခရိုင်အတွင်းတွင် အာဏာသိမ်း စစ်ကောင်စီတပ်ဖွဲ့မှ ကားလမ်းမကြီးတစ်လျောက် ရှောင်တခင် စစ်ဆေးပြုလုပ်ပြီး ပြည်သူများထံ ပိုက်ဆံတောင်းယူမှုများ ပြုလုပ်နေကြောင်း သတင်းသိရသည်။
ယခုလ ဒုတိယပတ်အတွင်း ကျေးသီး နှင့် မိုင်းနောင်ကြား ကားလမ်းမ ဘေးတစ်နေရာတွင် အာဏာသိမ်း စစ်ကောင်စီတပ်ဖွဲ့မှ လမ်းသွားလာသည့် မော်တော်ယာဥ်များကို တားမြစ်စစ်ဆေးပြီး ပိုက်ဆံတောင်းမှု ပြုလုပ်ခဲ့ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ကျေးသီးနဲ့ မိုင်းနောင်ကြားက လမ်းဘေးတစ်နေရာမှာ စစ်ကောင်စီ တပ်ဖွဲ့က စစ်ကားနဲ့ ထိုင်ခုံနဲ့ လာစောင့်ပါတယ်၊ စစ်သားအင်အားတော့ သိပ် မများဘူး၊ ဘယ်ကလာလဲ ဘယ်ကိုသွားမလဲဆိုတာပဲမေးပြီး လက်ဘက်ရည်ဖိုးဆိုပြီး ကျနော် ပိုက်ဆံ ၂၀၀၀ ကျပ် ပေးလိုက်ရတယ်။ အဲ့လမ်းမှာ အမြဲတမ်းလာစောင့်နေတာတော့မဟုတ်ဘူး” ဟု ၎င်းအမျိုးသားက ပြောသည်။
အဆိုပါ စစ်ကောင်စီတပ်သားတို့သည် လမ်းသွားလမ်းလာပြည်သူများထံ ပိုက်ဆံတောင်းသည့်အခါတွင် ၂၀၀၀ နှင့် အထက် တောင်းခံနေကြပြီး တချို့ဈေးသည်များ နှင့် အရေးပေါ်ကိစ္စသွားလာခြင်းများ ပြုလုပ်သည့် ပြည်သူ များအတွက် အခက်အခဲဖြစ်ကြောင်း ၎င်းက ပြောသည်။
ထို့အပြင် ယခု လဆန်းပိုင်းတွင် လဲချားမြို့နယ် မှ လားရှိုးဘက်သွားသည့် ခရီးသည်တင် ကားသမားကိုလည်း လဲချား – ပင်လုံလမ်းကြား၌ စစ်ကောင်စီတပ်သားများက တားမြစ်ပြီး ပိုက်ဆံတောင်းခဲ့ကြောင်း သိရသည်။
“ကျနော်တို့က ဒီလမ်းကို အမြဲတမ်းသွားလာနေကြလေ၊ ဒါပေမဲ့ ပြီးခဲ့တဲ့တခေါက် ကျနော်လဲချားကထွက်တော့ ပင်လုံမရောက်ခင်မှာ စစ်သားတွေက သံဆူးကြိုးကာနဲ့ လမ်းကို ပိတ်ထားပြီး ပိုက်ဆံတောင်းတာ ကြုံခဲ့ရတယ်၊ မြို့ဝင်မြို့ထွက်နဲ့ တပ်ရှိတဲ့ နေရာကလွဲရင် ပိုက်ဆံပေး ရတယ် ဆိုတာ မရှိခဲ့ပါဘူး” ဟု တောင်ကြီး -လားရှိုး ကားမောင်းတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သားများ ပင်လုံမြို့၊ လွိုင်လင်မြို့၊ လဲချားမြို့၊ ကျေးသီး၊ မိုင်းနောင်၊ နမ့်စန် နှင့် ကွန်ဟိန်းစသည့် ကားလမ်းတလျောက်တွင် စစ်ဆေးမှုပြုလုပ်ပြီး ပိုက်ဆံကောက်ယူနေကြောင်း သိရသည်။
Leave a Comments