သျှမ်းပြည်တောင်ပိုင်း မိုင်းကိုင်မြို့နယ် တုံလောကျေးရွာအုပ်စု ပန်ပွဲကျေးရွာရှိ မြေပဲစိုက်ခင်းအတွင်း လက်နက်ကြီး တစ်လုံးကျရောက် ပေါက်ကွဲသဖြင့် ပြည်သူများ စိုးရိမ်ထိတ်လန့်နေကြောင်း စုံစမ်းသိရှိရသည်။
ယနေ့(အောက်တိုဘာ ၁၁) ရက် နံနက် ၄ နာရီကျော်ဝန်းကျင်တွင် စိုင်းတိ၏ မြေပဲစိုက်ခင်းအတွင်း RPG 2 လက်နက်ကြီး အမျိုးအစား ကျပြီး ပေါက်ကွဲခဲ့ကြောင်း ဒေသခံများက ပြောသည်။
“လက်နက်ကြီးက ဘယ်ကနေ ပစ်လိုက်လဲတော့ မသိရဘူး၊ စိုင်းတိ မြေပဲစိုက်ခင်းထဲမှာကို ကျပြီးပေါက်ကွဲတာ၊ လက်နက်ကြီး ကျတဲ့နေရာက တွင်းကြီးတစ်ခုလိုဖြစ်သွားတယ်၊ တိရိစ္ဆာန်တွေ လူတွေ ထိခိုက်မှုတော့ မရှိဘူး၊ ဘယ်အဖွဲ့အစည်းရဲ့ လက်နက်ကြီးမှန်းလည်း မသိရဘူး” ဟု ပန်ပွဲကျေးရွာ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြော သည်။
လက်ရှိ အချိန်ကာလသည် ဒေသခံပြည်သူများ တောင်ယာသွား ပြောင်းချိုးနေကြသည့် အချိန်ဖြစ်သည့် အတွက် ယခုလို အကြောင်းရင်းမသိ လက်နက်ကြီး ယာခင်းထဲ ကျရောက်ပေါက်ကွဲခြင်းသည် စိုးရိမ်ထိတ်လန့် နေရကြောင်းလည်း ပန်ပွဲကျေးရွာမှ အသက် ၂၅ ဝန်းကျင် အမျိုးသားတစ်ဦးက ပြောသည်။
“ထိခိုက်ပျက်စီးမှုမရှိပေမဲ့၊ အခုလို အချိန်က တောင်ယာသွား ပြောင်းချိုးနေကြရတဲ့ အချိန်ဖြစ်တယ်၊ တကယ်လို့ ရွာသားတွေ ယာခင်းထဲ ရှိနေတဲ့အချိန် လက်နက်ကြီး ကျလာရင် ဘယ်လိုလုပ်မလဲ ဒါတွေကို စိုးရိမ်ရတယ်၊ တိုက်ပွဲတွေလည်း ဖြစ်ခဲ့ဖူးတော့ ကျနော်တို့ ပြည်သူကတော့ ကြောက်နေရတာပဲ” ဟု ၎င်းက ပြောသည်။
မိုင်းကိုင်မြို့နယ်အတွင်းတွင် သျှမ်းလက်နက်ကိုင် တပ်ဖွဲ့ အပြင် အာဏာသိမ်း စစ်ကောင်စီ တပ်ဖွဲ့ နှင့် မြောက်ပိုင်း မဟာမိတ် တပ်ဖွဲ့များ သွားလာလှုပ်ရှားနေသည့် နေရာဖြစ်ကြောင်း သတင်းသိရသည်။
အဆိုပါ လက်နက်ကိုင်တပ်ဖွဲ့ များပြားစွာရှိသည့်အတွက် ထိတွေ့တိုက်ပွဲများ၊ လက်နက်ကိုင် တပ်ဖွဲ့များ တပ်ဆင်ထားသည့် မြေမြှုပ်မိုင်းများကြောင့် ပြည်သူများ ထိခိုက်သေဆုံးမှုများလည်း မကြာခဏ ဖြစ်ပွားလေ့ရှိ ကြောင်း သတင်းသိရသည်။
Leave a Comments