တိုက်ပွဲများရပ်တန့်ပြီး လက်နက်ကိုင်ခေါင်းဆောင်များအမြန်ဆုံးတွေ့ဆုံဆွေးနွေးရန် သျှမ်းပြည်အရပ်ဖက်အဖွဲ့ ငြိမ်းချမ်းရေးဖိုရမ်မှတိုက်တွန်း

လူထုအားပစ်မှတ်ထားပစ်ခတ်မှုမှအမြန်ဆုံးရပ်တန့်ပြီးခေါင်းဆောင်အချင်းချင်းတွေ့ဆုံဆွေးနွေးပေးပါရန် သျှမ်းပြည်တွင်းလက်နက်ကိုင်တပ်ဖွဲ့များအား သျှမ်းပြည်နယ် အရပ်ဖက်အဖွဲ့အစည်းမှ ကြေငြာချက်ထုတ်ပြန် တောင်းဆိုလိုက်သည်။

နို၀င်ဘာလ ၂၈ နှင့် ၂၉ ရက်နေ့တွင် သျှမ်းပြည်တွင်းမြို့နယ်အသီးသီးက အရပ်ဖက်လူမှုအဖွဲ့အစည်း ၏ကိုယ်စားလှယ်များ လူအင်အား ၁၀၀ ကျော်က တောင်ကြီးဟိုတယ်တွင်တွေ့ဆုံမှုပြုခဲ့ပြီးနောက် နို၀င်ဘာလ ၂၉ ရက်နေ့ရက်စွဲဖြင့် အဆိုပါကြေငြာ ချက်ထုတ်ပြန်လိုက်ခြင်းဖြစ်သည်။

တပ်မတော်အပါအဝင် သျှမ်းပြည်နယ်အတွင်းရှိလက်နက်ကိုင်အဖွဲ့အစည်းများ အင်အားဖြည့်တင်းကာပစ်ခတ် တိုက်ခိုက်နေမှုများ ပြုလုပ် နေသည်ကိုရပ်တန့်ပေးရန် မေတ္တာရပ်ခံတောင်းဆိုကြောင်း အဆိုပါကြေငြာချက် တွင်ပါရှိသည်။

အရပ်ဖက်လူမှုအဖွဲ့အစည်းများဖိုရမ်မှ ပြောခွင့်ရ ကို၀င့်ထည်ကောင်းမြတ်က – “တိုက်ပွဲတွေဖြစ်လို့ လူထုက ကြားထဲကနေသေကြေပျက်စီးလာတယ်။ ဒါတင်မက နိုင်ငံရေးအရ ပြည်သူလူထုကိုအသုံးချလာတယ်ဆိုတဲ့ ပုံစံမျိုးတွေကျနော်တို့တွေ့လာရတယ်။ ပြည်သူလူထုကို ထိခိုက်စေတာမျိုးတော့ မလုပ်ကြပါနဲ့ ဆိုပြီးမေတ္တာ ရပ်ခံ တဲ့အနေနဲ့ ကျနော်တို့စာထုတ်ဖြစ်တာပါ” – ဟု သျှမ်းသံတော်ဆင့်သို့ပြောသည်။

ဖြစ်ပွားနေသည့် သျှမ်းပြည်ပြသနာအား အစိုးရ အပါ၀င် နိုင်ငံတကာအား ကြားဝင်ဖြေရှင်းပေးဖို့ မျှော်ကိုးသာ ထက် သျှမ်းပြည်သား လက်နက်ကိုင်အဖွဲ့အစည်းများ အမြန်ဆုံးတွေ့ဆုံဆွေးကြရန် ပိုမိုလိုအပ်ကြောင်းလည်း ဆက်၍ပြောသည်။

“အစိုးရဆိုတာထက် သျှမ်းပြည်နယ်ထဲမှာ လက်နက်ကိုင် အဖွဲ့ အစည်းတွေ တိုင်း ရဲ့ အဖွဲ့ခေါင်းဆောင်တွေ အချင်းချင်းတွေ့ဆုံညှိနှိုင်းတာမျိုးကိုပိုလိုလားတယ်။ အစိုးရက လုပ်ပေးတာတို့ UN လုပ်ပေးတာတို့ထက် ၊ အပြင်မှာပြသနာဖြစ်တာမဟုတ်ဘဲ သျှမ်းပြည်တွင်းက အချင်း ချင်းကြား မှာဖြစ်တဲ့အတွက်ကြောင့် အချင်းချင်းပြေလည်အောင် နိုင်ငံရေးအားဖြင့်ကြည့်တာပေါ့နော်။ နိုင်ငံ ရေး စားပွဲဝိုင်းပေါ်ဆွေးနွေးကြဖို့ပေါ့။ လက်နက်ကိုင်လမ်းစဉ်နဲ့ မဖြေရှင်းပါနဲ့လို့ ။ တတ်နိုင်သမျှ အရပ် သား ပြည်သူကိုထိခိုက်မှုမရှိအောင် စစ်စည်းကမ်းလေးတွေကိုတင်းကျပ်ပေးစေချင်တယ်။ စစ်တိုက်တာက တိုက်ပေါ့။ ဒါပေမယ့် စစ်စည်းကမ်းလေးတွေက ရှိပြီးသားဘဲ။ ပြည်သူအပေါ် ဘယ်လိုသဘောထားရမယ် ဆိုတာ ရှိပြီးသား ဘဲ။ ကိုယ့်တပ်ဖွဲ့ကိုနိုင်အောင်ထိန်းကျောင်းပေးစေချင်တယ်။” – ဟု ကို၀င့်ထည်ကောင်းမြတ်က ပြောသည်။

တိုင်းရင်းသားများအချင်းချင်း စည်းလုံးညီညွတ်မှု မပျက်ရေး နှင့် စစ်ရေးပဋိပက္ခများကြောင့် ပြည်သူလူထု၏ ထိခိုက်ခံစားရမှုများအား လူသားချင်းစာနာထောက်ထားသောအနေဖြင့် စစ်ပွဲများအား အမြန်ဆုံးရပ်တန့်ပေးကြပါရန် မေတ္တာရပ်ခံ တောင်းဆို ကြောင်း ၄င်းတို့၏ ကြေငြာချက်တွင်ပါရှိပါသည်။

သျှမ်းပြည်မြောက်ပိုင်း နမ္မတူမြို့နယ်၊ လားရှိုးမြို့နယ်နှင့် သီပေါမြို့နယ်များအတွင်း ယခု ၂၀၁၈ ခုနှစ်အတွင်း အစိုးရနှင့် တိုင်းရင်းသားလက်နက်ကိုင်တပ်ဖွဲ့ ကြား၊ မြောက်ပိုင်းမဟာမိတ် နှင့် RCSS/SSA တပ်များကြား၊ တိုက်ပွဲ များတနှစ်ပတ်လုံးဖြစ်ပွါးနေသဖြင့် ဒေသခံလူထုတို့ စစ်ဘေးတိမ်းရှောင်နေရသည်ဖြစ်ရာ လယ်ယာလုပ်ငန်း ခွင်များ ကောင်းမွန်စွာမလုပ်ကိုင်ခဲ့ရပေ။ တိုက်ပွဲကြောင့် ဒေသခံလူထု ဖမ်းဆီးခံရခြင်း၊ ထိခိုက်ဒဏ်ရာရခြင်းနှင့် သေကြေခြင်းများရှိခဲ့သည်။