ပြည်ထောင်စုမြန်မာနိုင်ငံတွင် ကိုဗစ် ၁၉ ရောဂါ ကူးစက်ပျံ့ပွားမှု တဟုန်ထိုး တိုးမြင့်လာနေသဖြင့် ထိုင်း-မြန်မာနယ်စပ်တကျော လုံခြုံရေးတင်းကြပ်ဖို့ ထိုင်းနိုင်ငံ ပြည်ထဲရေးဝန်ကြီး ဌာနက ထုတ်ပြန်ကြေငြာလိုက် သည်။
သြဂုတ်လ ၂၇ ရက်က ထုတ်ပြန်သည့်အဆိုပါအရေးပေါ် ကြေငြာချက်တွင် – ‘လက်ရှိပြည်ထောင်စု မြန်မာ နိုင်ငံအတွင်း COVID-19 ရောဂါကူးစက်သူ မြင့်တက်လာနေကြောင်း၊ ရောဂါကူးစက်ပြန့်ပွားမှု များပြားသည့် ရခိုင်ပြည်နယ် မြို့တော်စစ်တွေတွင် အရေးပေါ် အခြေအနေထုတ်ပြန်ထားရ သည့်အပြင် တလကျော်ကြာ သာ ဖွင့်လှစ်သင်ကြားရသေးသည့် အခြေခံပညာကျောင်းများအားလုံးလည်း ပိတ်ထားလိုက်ရကြောင်း ထုတ် ပြန်ထားသည့်အတွက် ၂ နိုင်ငံကြား နယ်စပ်တရားဝင်ဂိတ်၊ တရားမဝင်ဂိတ်၊ နယ်စပ်မြို့ နယ်စပ်ဒေသခံ များအတွက်သာဖွင့်လှစ်ပေးသည့်ဂိတ်၊ တောလမ်းမှ ခိုးဝင်ဖြတ်သန်းနိုင်သည့် ထိုင်းမြန်မာနယ်စပ်အားလုံး လုံခြုံရေးတင်းကြပ်ဖို့၊ နယ်စပ်နှင့်ထိစပ်နေသည့် ခရိုင် ၁၀ ခုအား အထူးရည်ညွှန်းကာ ’ ထိုင်းပြည်ထဲရေးဝန်ကြီးဌာနက ထုတ်ပြန်ထားခြင်းဖြစ်သည်။
“အစက သြဂုတ်လကုန်လောက်မှာ နယ်စပ်ဂိတ်တရားဝင်ပြန်ဖွင့်ဖို့ ဆွေးနွေးဖူးတယ်။ ဒါပေမယ့်ကပ်ရောဂါ ကူးစက်မှုက စိုးရိမ်နေရဆဲအနေအထား ဆိုတော့ စက်တင်ဘာလကုန်အထိ ထပ်တိုးထားတယ်။ နောက်တလ အတွင်းနယ်စပ်ဂိတ်လဲ ထပ်မဖွင့်သေးတဲ့ သဘောပေါ့။ အခုက မြန်မာမှာ ရောဂါပိုးက တအား ကူးစက်လာနေတော့ နယ်စပ်လုံခြုံရေးအတွက် စောင့်ကြပ်ခိုင်းတာ။ အထူးကြပ်မတ်ဖို့ပေါ့” – ဟု ထိုင်းနယ်စပ်လုံခြုံရေးအရာရှိ တဉီးက သျှမ်းသံတော်ဆင့်သို့ပြောသည်။
ထိုင်းအစိုးရ ရည်ညွှန်းသော ထိုင်း-မြန်မာနယ်စပ် ၁၀ ခရိုင်မှာ – ကန်ကျနပူရီ၊ ချွန်းဖွန်း၊ ချိန်းရိုင်း၊ ချိန်းမိုင်၊ တတ်၊ ပရကျုပ် ခီးရီးခန်၊ ဖိတ်ပူရီ၊ မယ်ဟောင်ဆောင်၊ ရနောင်း၊ ရတ်ချပူရီ ခရိုင်တို့ဖြစ်ပါသည်။
ကိုဗစ် ၁၉ ထိုင်းနိုင်ငံသို့ စတင်ကူးစက်ပျံ့ပွါးစဉ်က နေရပ်ရင်းသို့ပြန်သွားကြသည့် မြန်မာနိုင်ငံမှ ရွှေ့ပြောင်းအလုပ်သမားများလည်း လက်ရှိတွင် ထိုင်းနိုင်ငံသို့ ပြန်၀င်လိုနေကြသည်။
“ထိုင်းမှာတော့ ကျောင်းတွေပြန်ဖွင့်နေပြီမို့ တချို့ကလည်း ကလေးကျောင်းပြန်တက်ဖို့ ပြန်လာချင်ကြ တယ်။တချို့ကလည်း လုပ်ငန်းကိုင်ငန်းက ခွင့်ရက်ပြည့်လို့ပြန်လာချင်ကြတယ်။ ”- ဟု ထိုင်းနိုင်ငံအတွင်း ရွှေ့ပြောင်းအလုပ်သမားများအရေးကူညီဆောင်ရွက်ပေးသည့် စိုင်းနောင့်က ပြောသည်။
ထိုင်းနယ်စပ်တွင် ခိုး၀င်ခိုးထွက်ပြုသူများအား ကျန်းမာရေးဌာနမှ ပြဌာန်းထားသော ဉပဒေအရ ထိရောက်စွာ အရေးယူ ရန်လည်း ထိုင်းအစိုးရ၏ ကြေငြာချက်တွင်ပါရှိသည်။
သီးခြားအတည်ပြုချက်မရသည့် ထိုင်းနိုင်ငံဘက်ခြမ်း နယ်စပ်မြို့မှ ဒေသတွင်းသတင်းများအရ ကျူးလွန်သူအား ပစ်ခတ် တားဆီးဖို့ ထိုင်းနယ်စပ်လုံခြုံရေးတပ်ကို အခွင့်အာဏာပေးထားသည်ဟုလည်း ဆိုပါသည်။
ထိုင်းမြန်မာနယ်စပ်တွင် ကိုဗစ်ကပ်ရောဂါ စိုးရိမ်မှု မရှိစဉ်က မယ်ဆိုင်အမှတ် ၁ နှင့် ၂ ၊ မဲဆောက် အမှတ် ၁ နှင့် ၂ ချစ်ကြည်ရေးတံတား တို့အပြင် နယ်စပ်မြို့ နှစ်နိုင်ငံဒေသခံများအတွက် ဖွင့်လှစ်ထားသည့် တရားဝင်ဂိတ်စခန်းများ၊ တရားမဝင်ဂိတ်စခန်းများ အများအပြား ရှိပါသည်။
လက်ရှိပြည်ထောင်စုမြန်မာနိုင်ငံတွင် ကိုဗစ်-၁၉ ကပ်ရောဂါ ကူးစက်သူ ၆၀၀ ကျော်ရှိပြီး ယခုအပတ် အတွင်းမှာပင် ကူးစက်ခံရသူ တရာကျော်ရှိပြီဖြစ်ကြောင်း အစိုးရ၏ အားကစားနှင့်ကျန်းမာရေး၀န်ကြီးဌာနက ထုတ်ပြန်ပါသည်။ ထိုအနက်တွင် အသက် ၄၅ နှစ်ရွယ် တောင်ကြီးမြို့ ဘုရားဖြူရပ်ကွက်နေ အမျိုးသမီးတစ်ဉီးပါ၀င်ပါသည်။
