ထိုင်း-မြန်မာနယ်စပ်တစ်လျှောက်ရှိ ဒုက္ခသည်စခန်းများတွင် နေထိုင်ကြသော မြန်မာဒုက္ခသည်များအား ထိုင်းအစိုးရက အလုပ်အကိုင်ကန့်သတ်ချက်များ ဖြေလျှော့ပေးခဲ့ပြီးနောက် လူပေါင်း ၅,၅၀၀ ကျော် အလုပ်အကိုင်ရရှိခဲ့သည်။

ထို လုပ်ဆောင်ချက်သည် ဒုက္ခသည်ပြဿနာရင်ဆိုင်နေရသည့် အာရှဒေသတွင်းနိုင်ငံများအတွက် ရှေ့ဆောင်လမ်းပြစံပြနမူနာတစ်ခု ဖြစ်လာကြောင်း ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ပြောကြားလိုက်သည်။

အမေရိကန်သမ္မတ ဒေါ်နယ်ထရမ့်က နိုင်ငံခြားအကူအညီများကို ဖြတ်တောက်ခဲ့ခြင်းကြောင့် ကမ္ဘာလုံးဆိုင်ရာ လူသားချင်းစာနာမှုဆိုင်ရာ ရန်ပုံငွေများ သိသိသာသာ ကျဆင်းသွားခဲ့သည့် တချိန်တည်းမှာပင် ထိုင်းနိုင်ငံအတွင်း၌လည်း ကမ္ဘောဒီးယားနှင့် ဖြစ်ပွားခဲ့သည့် လက်နက်ကိုင်ပဋိပက္ခများကြောင့် လုပ်သားရှားပါးမှုပြဿနာ ပိုမိုဆိုးရွားလာခဲ့ရာ ယင်းအခြေအနေနှစ်ရပ်ကို တုံ့ပြန်သည့်အနေဖြင့် ထိုင်းအစိုးရက မူဝါဒကို ပြောင်းလဲကျင့်သုံးခဲ့ခြင်း ဖြစ်သည်။

ယခုမူဝါဒအပြောင်းအလဲအရ ထိုင်းအစိုးရသည် နယ်စပ်တလျှောက်ရှိ ယာယီခိုလှုံရာစခန်း ကိုးခုတွင် ဆယ်စုနှစ်ပေါင်းများစွာ အကူအညီများကိုသာ မှီခိုနေခဲ့ရသည့် မြန်မာဒုက္ခသည် ၈၀,၀၀၀ ခန့်ကို တရားဝင်အလုပ်လုပ်ကိုင်ခွင့် ပြုခဲ့ခြင်းဖြစ်သည်။

UNHCR ၏ လုပ်ငန်းဆောင်ရွက်မှုဆိုင်ရာ ဒုတိယမဟာမင်းကြီး မစ္စတာ ရောက်ဖ် (Raouf Mazou) က ရိုက်တာသတင်းဌာနနှင့် အင်တာဗျူးတွင် “တကယ်လို့ ဒါက ဒီမှာ အောင်မြင်ခဲ့ရင် ဒေသတွင်းအပေါ် သက်ရောက်မှုရှိလာမှာပါ” ဟု ပြောကြားခဲ့သည်။

ထို့ပြင်၊ ဒုက္ခသည်အမြောက်အမြားကို လက်ခံထားရသည့် ဘင်္ဂလားဒေ့ရှ်နှင့် မလေးရှားကဲ့သို့သော နိုင်ငံများအတွက် အဖိုးတန်သင်ခန်းစာ ဖြစ်လာနိုင်ကြောင်း ၎င်းကထည့်သွင်းပြောဆိုခဲ့သည်။

ပြီးခဲ့သည့် အောက်တိုဘာလတွင် စီမံကိန်းစတင်ခဲ့ကတည်းက ဒုက္ခသည်အလုပ်သမားများအနေဖြင့် ဥပဒေကြောင်းအရ အကာအကွယ်များ၊ ကျန်းမာရေးစောင့်ရှောက်မှုနှင့် အနိမ့်ဆုံးလုပ်ခလစာ (Minimum Wage) တို့ကို အပြည့်အဝရရှိစေရန် ထိုင်းအာဏာပိုင်များနှင့် အလုပ်ရှင်များ ပူးပေါင်းဆောင်ရွက်ခဲ့ကြသည်။

ထို့အပြင် ဒုက္ခသည်များအား ဘဏ်အကောင့်ဖွင့်လှစ်ခြင်း၊ မိုဘိုင်းဆင်းကတ်ဝယ်ယူခြင်းနှင့် ၎င်းတို့၏ တရားဝင်အဆင့်အတန်းကို စိစစ်နိုင်မည့် အထူးသက်သေခံကတ်ပြား (Identity Cards) များ ထုတ်ပေးလျက်ရှိကြောင်း သိရသည်။

ဆက်လက်ပြီး ၎င်းတို့အား တရားဝင်စီးပွားရေးကဏ္ဍအတွင်းသို့ ဘေးကင်းစွာ ပေါင်းစည်းနိုင်ရန်အတွက် အလွန်အရေးကြီးသော ခြေလှမ်းဖြစ်ကြောင်း မစ္စတာ မာဇူးက ရှင်းပြသည်။

ကုလသမဂ္ဂအရာရှိများ၏ ခန့်မှန်းချက်အရ လာမည့်နှစ်အတွင်း ဒုက္ခသည် ၁၀,၀၀၀ မှ ၂၀,၀၀၀ အထိ ထပ်မံအလုပ်ရရှိနိုင်ကြောင်း သိရသည်။

ဆယ်စုနှစ်ပေါင်းများစွာ စခန်းတွင်း၌သာ နေထိုင်ခဲ့ရသည့် ဒုက္ခသည်များအနေဖြင့် လွတ်လပ်စွာ သွားလာခွင့် ကန့်သတ်ချက်အချို့ ရှိနေသေးခြင်းနှင့် စခန်းပြင်ပ လူနေမှုဘဝသစ်နှင့် လိုက်လျောညီထွေဖြစ်အောင် လေ့ကျင့်ယူရခြင်း စသည့် စိန်ခေါ်မှုများကို ရင်ဆိုင်နေရဆဲဖြစ်သည်။

သို့သော်လည်း မစ္စတာ မာဇူးက “ကိုယ့်ခြေထောက်ပေါ်ကိုယ် ရပ်တည်နိုင်ခြင်းဟာ လူတွေကို ၎င်းတို့ရဲ့ ဌာနေနိုင်ငံကို ပြန်လည်ရောက်ရှိတဲ့အချိန်မှာ အဆင်သင့်ဖြစ်နေစေသလို၊ သို့မဟုတ် အခြားနေရာသစ်တစ်ခုမှာ ပြန်လည်အခြေချရင်ဖြစ်စေ၊ သို့မဟုတ် လက်ရှိရောက်နေတဲ့ လူ့အဖွဲ့အစည်းအတွင်း ပေါင်းစည်းနေထိုင်ရရင်ဖြစ်စေ ဘယ်နေရာမှာ မဆို အထောက်အကူဖြစ်စေပါတယ်” ဟု ထည့်သွင်းပြောကြားခဲ့သည်။

ကိုးကား – Bangkok Post