ကမ္ဘာတဝှမ်း ဖြစ်ပေါ်သည့် COVID-19 ကြောင့် သင်္ကြန်ကာလအတွင်း စုပေါင်းပြီး ဘုန်းကြီးကျောင်းတက်ဆွမ်းပန်းကပ်လှူခြင်းမပြုရန် သျှမ်းပြည်လုံး ဆိုင်ရာ သံဃာ့အဖွဲ့ချုပ် မှ ထုတ်ပြန်ကြေညာလိုက်သည်။

ဧပြီ ၃ ရက် က သျှမ်းပြည်လုံး ဆိုင်ရာ သံဃာ့အဖွဲ့ချုပ်က ထုတ်ပြန်ထားခြင်းဖြစ်သည်။

သင်္ကြန်ကာလ နှစ်ဟောင်း မှ နှစ်သစ်သို့ ကူးပြောင်းချိန် မြန်မာလူမျိုး ဗုဒ္ဓဘာသာဝင်များဘုရားကျောင်းကန်တက် ဥပုပ်သီလဆောက်တည်ကြရာ ယခုနှစ်တွင်စုပေါင်းကျောင်းတက်ခြင်းကို ရပ်ဆိုင်းထားရန် နှင့် ဆရာဒကာ စုပေါင်း ကာ တရွာပြီးတရွာ ဘုန်းကြီးကျောင်း လှည့်ပတ်ကန်တော့ခြင်းများ မပြုလုပ်ရန် ထုတ်ပြန်ချက်တွင်ရေးသားထားသည်။

ထိုနည်းတူ သျှမ်းပြည်နယ် ဗုဒ္ဓတက္ကသိုလ်၏ ၄ ကြိမ်မြောက် COVID-19 နှင့် ပတ်သက်ပြီး ဆွေးနွေးချက်တွင် သင်္ကြန်ကာလအတွင်း လူစုလူဝေး မဖြစ်စေရန် ဘုန်းကြီးကျောင်း မတက်ရောက်ကြရန်၊ ဘုန်းကြီးကျောင်းသို့ရောက်လာပါကလည်း တသုတ်လျှင် ၁၅ ယောက်ခန့်သာ တက်ရောက်တရားနာရန် သျှမ်းပြည် ဗုဒ္ဓတက္ကသိုလ်မှ မေတ္တာရပ်ခံ ထားသည်။

ထိုပြင် လူစုလူဝေး မဖြစ်အောင် နေရာများ ခွဲပြီး စီစဉ်ထားရှိရန်လည်း ထုတ်ပြန်ထားသည်။

“ ဒီလို အချိန်မှာတော့ အိမ်မှာပဲနေစေချင်တယ်။ COVID-19 ထက်မဖြစ်စေဖို့အတွက်အိမ်မှာနေတာအကောင်းဆုံးပါ” ဟု တောင်ကြီးမြို့တွင် နေထိုင်သည့် အသက် ၆၀ နှစ် အရွယ်ရှိ ဦးစိုင်းလုံ က ပြောသည်။

သင်္ကြန်ကာလအတွင်း ဗုဒ္ဓဘာသာများ ဘုရားကျောင်းသွား ကုသိုလ်ယူ အလှူအတန်းပြုကြသည့် ဓလေ့ရှိကြသော်လည်း ယခုနှစ် အတွင်း ရောဂါကပ်ဆိုးကြောင့် မသွားရသည့်အတွက် စိတ်မကောင်းကြောင်း လည်း ဦးစိုင်းလုံ က ပြောသည်။

COVID-19 ကြောင့် သင်္ကြန်ပွဲတော်ပါ မကျင်းပရသည်မှာ ယခုနှစ်သည် သမိုင်းဝင် သင်္ကြန် မကျင်းပရသည့် နှစ်ဖြစ်ကြောင်းလည်း ဗုဒ္ဓဘာသာဝင် များက ပြောဆိုမှတ်ချက်ပြုကြသည်။