သျှမ်းပြည်မြောက်ပိုင်း သီပေါမြို့နယ် နားမခေါ်အုပ်စုအတွင်း တိုက်ပွဲဖြစ်ပွါးခဲ့ရာ ဒေသခံလူထု ၃၀၀ ကျော်မှာ ဘုန်းကြီးကျောင်းသို့ ရောက်ရှိခိုလှုံနေရကြောင်းသိရသည်။
သီပေါမြို့နယ် နားမခေါ်အုပ်စုဝင် ခိုင်းဟျိုးရွာအရှေ့ဘက်တွင် ဒီဇင်ဘာလ ၁ ရက်နေ့ ညပိုင်းကတည်းက တိုက်ပွဲဖြစ်ပွါးခဲ့ခြင်းဖြစ်ပြီး စစ်ဘေးရှောင်များမှာလည်း ညပိုင်းကတည်းက ခိုင်းဟျိုးရွာဘုန်းကြီးကျောင်းသို့ ရောက်ရှိနေခြင်းဖြစ်ကြောင်း ရွာသား စိုင်းထင်အောင်ကပြောသည်။
“RCSS နဲ့ SSPP ကြား တိုက်ပွဲဖြစ်တာ။ မနေ့ညက ရ နာရီလောက်မှာ တိုက်ပွဲတခါဖြစ်တယ်။ သေနတ်သံကြားရတယ်။ ဖြစ်တဲ့နေရာနဲ့နီးတဲ့ရွာသားတချို့ဘုန်းကြီးကျောင်းကိုညတွင်းချင်းပြေးတယ်။ တိုက်ပွဲက တညလုံးငြိမ်နေပြီးဒီမနက် ရ နာရီမှထပ်ကြားတယ်။ ရွာသားတွေ ထပ်ပြေးလာတယ်။ မနက်အစောပိုင်းတုန်းက ၃၀၀ လောက်ရှိမယ်ဘုန်းကြီးကျောင်းမှာ ။ လယ်ယာသီးနှံဆွတ်ချိန်မို့ နေ့ခင်းပိုင်းမှာကျတော့တချို့အခြေအနေပြန်သွားကြည့်တယ်။တချို့တော့ကျောင်းမှာဘဲရှိနေတုန်းဘဲ။”- ဟု စိုင်းထင်အောင်ကပြောသည်။
သျှမ်းလက်နက်ကိုင်တပ် အချင်းချင်း ဖြစ်ပွားသည်ဟု ဒေသခံများက ပြောသော်လည်း RCSS နှင့် SSPP နှစ်တပ်လုံးနှင့်ဆက်သွယ်မရခဲ့ပေ။
လက်ရှိအခြေအနေတွင် ၂ ဦး ၂ ဘက်လုံး ရွာအပြင်ပိုင်းတွင်သာလှုပ်ရှားနေသေးသဖြင့် ရွာသားအားလုံးနေအိမ်မပြန်ရဲကြသေးတာဖြစ်ကြောင်း ဆိုပါသည်။
နားမခေါ်ရွာ သည် သီပေါမြို့နယ်၏ တောင်ဘက်တွင်တည်ရှိပြီး အဆိုပါရွာတဝိုက်တွင် အစိုးရတပ်၊ RCSS နဲ့ SSPP တို့လှုပ်ရှားသွားလာပါသည်။ တိုက်ပွဲသည်နားမခေါ်ရွာနှင့် ၁၀ မိုင်ခန့်ဝေးသည့်နေရာတွင်ဖြစ်ပွါးခဲ့ပြီး ခိုင်းဟျိုးအုပ်စုအရှေ့ ဘက်တောတွင်းတွင်ဖြစ်ပွါးခဲ့ပါသည်။ ခိုင်းဟျိုးရွာတွင် ယခင်က ပေါက်ကွဲမှုသာဖြစ်ပွါးခဲ့ပြီး ပစ်ခတ်တိုက်ခိုက်မှုမှာမူ ယခု ပထမအကြိမ်ဖြစ်ပွါးခဲ့ခြင်းဖြစ်သည်။
ခိုင်းဟျိုးရွာအနီးတိုက်ပွဲမှ ယမ်းငွေ့နှင့်ပစ်ခတ်မှုများအားတွေ့ရစဉ်
Leave a Comments