သျှမ်းပြည် မြောက်ပိုင်း နမ္မတူမြို့နယ်အတွင်း တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှုကြောင့် ဒေသခံများ စိုးရိမ်ထိတ်လန့်မှု ဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ နို၀င်ဘာလ ၂၀ ရက်ယနေ့မနက် ၆ နာရီမှ ၈ နာရီခွဲကြားတွင် သျှမ်းပြည် ပြန်လည်ထူထောင်ရေး ကောင်စီ (RCSS/SSA) နှင့် တအာင်း(ပလောင်) အမျိုးသားလွတ်မြောက်ရေး တပ်မတော်တို့ ထိပ်တိုက်တွေ့ဆုံ မှုဖြစ် ပွားမှုကြောင့် ဒေသခံများ ထိတ်လန့်မှု ဖြစ်ပွားခဲ့ကြောင်း သီပေါမြို့နယ် လူမှုကယ်ဆယ်ရေးအဖွဲ့မှ ကိုမျိုး ကပြောသည်။
“ မနက်က တိုက်ပွဲဖြစ်တော့ ကျနော်တို့ လူမှုကယ်ဆယ်ရေးက အခြေအနေ သွားကြည့်တယ်။ ၈ နာရီခွဲထိ ပန်လုံကျေးရွာထိ လက်နက်သံကြားရတယ်။ တိုက်ပွဲက ပြင်းပြီး ရွာနဲ့ နီးရင် ဒေသခံတွေ ခေါ်ထုတ်မလို့ပါ။ ဒါပေမယ့် တိုက်ပွဲက တည်ငြိမ်သွားတယ်” ဟု ကိုမျိုးကဆိုသည်။
နမ္မတူမြို့နယ် အတွင်း တိုက်ပွဲများ ဆက်တိုက်ဖြစ်ပွားသည်အတွက် ဒေသခံများ စိုးရိမ် ထိတ်လန့်မှုဖြင့်နေထိုင်နေရကြောင်း၊ လယ်ယာစိုက်ပျိုးသည့် အချိန်ဖြစ်သည့်အတွက် ကျေးရွာနှင့် ဝေးသည့်နေရာတွင်လည်း ထွက်ပြေးတိမ်းရှောင်ခြင်းမပြုလုပ်လိုကြောင်း နမ္မတူ မြို့နယ် စစ်ရှောင်များက ဆိုသည်။
အောက်တိုဘာ လ မှစတင်ကာ မြောက်ပိုင်းမဟာမိတ် တပ်ပေါင်းစု နှင့် RCSS တို့ တိုက်ပွဲများ ဆက်တိုက်ဖြစ်ပွားကာ အရပ်သား ၃ ဦးသေဆုံးခဲ့ကြောင်း သိရသည်။
နိုဝင်ဘာ ၁၇ ရက်နေ့တွင်လည်း တိုင်းရင်းသား လက်နက်ကိုင်အချင်းချင်း နမ္မတူမြို့နယ် မန်ပိန်း ကျေးရွာ အနီးတွင် တိုက်ပွဲဖြစ်ပွားမှုကြောင်း စစ်ရှောင် ၂၀၀ကျော် မန်ပိန်း အောက်ရွာတွင် စစ်ရှောင်ကာ စားဝတ်နေရေးခက်ခဲ နေကြောင်း စစ်ရှောင်ကူညီပေးနေသည့် သူများက ဆိုသည်။
တိုင်းရင်းသား အချင်းချင်း ဖြစ်ပွားနေသည့် တိုက်ပွဲများ ရပ်တန့်ရန်နှင့် လယ်ယာ ကောင်းမွန်ပြန်လုပ်လိုကြောင်း အရပ်သား ပြည်သူများ ကလည်း တိုက်တွန်းတောင်းဆိုလိုက်သည်။
Leave a Comments