သျှမ်းပြည်နယ် မြောက်ပိုင်း ကျောက်မဲမြို့နယ် ခုံငင်းကျေးရွာ အနီးတွင် အမျိုးသမီး ၂ ဦး မိုင်းနင်းမိကာ သေကြေဒဏ်ရာရမှုရှိခဲ့ကြောင်းသိရသည်။
နို၀င်ဘာလ ၁၁ ရက် နံနက် ၉ နာရီက ခုံငင်းကျေးရွာ မှ ကျောက်မဲမြို့ သို့ ဆိုင်ကယ်ဖြင့် အသွား ခုံငင်း တံတား အနီးတွင် မိုင်းနင်းမိပြီး အသက် ၂၀ နှစ်အရွယ် လွေးခမ်းယဉ် နှင့် အသက် ၂၆ နှစ်အရွယ် လွေးငွေခိုင် တို့ ဒဏ်ရာ ပြင်းထန်စွာ ရရှိခဲ့သည်။
လွေးငွေခိုင်သည် ပေါင်၊ လက်မောင်း နှင့် လည်ပင်း များတွင်မိုင်းစ ထိမှန်ဒဏ်ရာရရှိပြီး လွေးခမ်းယဉ် သည် ဦးခေါင်း နှင့် လည်ပင်းတို့တွင် ထိမှန်ကာ ယမန်နေ့ ည ၁၁ နာရီ အချိန်တွင်ပင် မန္တလေး ဆေးရုံ ၌ သေဆုံးသွားကြောင်း ကျောက်မဲမြို့ အိုမ်တမောဝ် လူမှုကူညီရေးအသင်း မှ အဘမ်းက ပြောသည်။
“ မိုင်းထိမှန်တဲ့သူတွေကို အစက ကျောက်မဲဆေးရုံပို့တယ်။ ခွဲစိတ်တဲ့ ပစ္စည်းတွေ မစုံလို့မန္တလေး ဆေးရုံကိုလွှဲပေးလိုက်တယ်။ ည ရ နာရီမှာ မန္တလေး ဆေးရုံရောက်တယ်။ မိုင်းစတွေ ဦးနှောက်ထိပြန့်သွားလို့ ည ၁၁ နာရီမှာ လွေးခမ်းယဉ် ဆုံးသွားတယ်။ နောက် တယောက်ကတော့ သက်သာတယ်။ လမ်းတောင်လျှောက် နေပြီ” ဟု အဘမ်း က ဆိုသည်။
အဆိုပါ ကျောက်မဲမြို့နယ် ခုံငင်း ကျေးရွာ အနီးတွင် မိုင်းနင်းမိသူ ၃ ဦးရှိခဲ့ကြောင်း ၊ ယခုနှစ်အတွင်း ကျောက်မဲမြို့နယ် အတွင်း မိုင်းနင်းမိ သူ ဦးရေ ၁၀ ဦး အထက် ရှိကြောင်း အဘမ်း က ပြောသည်။
“ ကျနော်တို့ လူမှုရေးအဖွဲ့ကနေ မိုင်းနင်းမိသူတွေကို ကူညီပေးခဲ့တာ ၁၀ ဦး အထက်ပါပဲ။ သံဃာတော်တွေ၊ အမျိုးသမီးတွေ၊ အမျိုးသားတွေရော၊ ကလေးတွေပါပါတယ်” ဟု အဘမ်းက ဆိုသည်။
ကျောက်မဲမြို့နယ် အတွင်း မြန်မာ တပ်မတော်၊ တအာင်း(ပလောင်) အမျိုးသားလွတ်မြောက်ရေးတပ်မတော်( TNLA)၊ သျှမ်းပြည် တိုးတက်ရေးပါတီ၊ သျှမ်းပြည်တပ်မတော် (SSPP/ SSA )၊ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် ( RCSS /SSA )တို့လှုပ်ရှားသွားလာပါသည်။ မည်သည့်လက်နက်ကိုင်တပ်ဖွဲ့မှထောင်ထားသောမိုင်းမှန်းမသိရသေးပေ။
