RCSS/SSA နှင့်ပတ်သက်ဆက်နွယ်သူများအား ၁၇-၁ ဖြင့် အရေးယူမည်ဟု ကျေးလက်အုပ်ချုပ်ရေးမှူးများအး သျှမ်းပြည်မြောက်ပိုင်း ကျောက်မဲအခြေစိုက် စကခ ၁ မှ အောက်တိုဘာလ ၃၁ ရက်နေ့က ခေါ်ယူပြောဆို လိုက်သည့် အပေါ် ဗိုလ်မှူးကြီးစိုင်းငင်း က ထိုသို့ပြောဆိုလိုက်သည်။
“RCSS/SSA က NCA အပစ်ရပ်လက်မှတ်ရေးထိုးထားတဲ့အဖွဲ့ဖြစ်တယ်။ NCA ထဲမှာတဲ့ အခန်း ၆ ပုဒ်မ ၂၄ ပါ အချက် ၄ ချက် ပါအတိုင်းဆိုရင် RCSS/SSA ကိုအဲလိုစွပ်စွဲလို့မရဘူး။ စွပ်စွဲပိုင်ခွင့်မရှိဘူး။ တကယ်လို့ စကခ ၁ က လူထုကို အမှန်တကယ်ပြောရတယ်ဆိုရင်လည်း ပြန်ပြီးတော့ ရုပ်သိမ်းပေးပါ။ ဒါမှမဟုတ်ရင်တော့ ဒီစွပ်စွဲ ချက်ဟာ NCA နဲ့လုံးဝ မကိုက်ညီဘူးဆိုတာကိုကျနော်တို့ တရားဝင်စာရေးသားပေးပို့ရမှာဖြစ်ပါတယ်။ ”- ဟု RCSS/SSA ပြောခွင့်ရ ဗိုလ်မှူးကြီးစိုင်းငင်းက သျှမ်းသံတော်ဆင့်အားပြောသည်။
ပြီးခဲ့သည့် အောက်တိုဘာလ ၃၁ ရက်နေ့က ကျောက်မဲမြို့နယ်အတွင်းရှိ ကျေးလက်၊ အုပ်စု အကြီးအကဲ များအားခေါ်ယူကာ RCSS/SSA နှင့်ပတ်သက်ဆက်နွယ်ပါက ဥပဒေ ပြင်ပအဖွဲ့အစည်းနှင့် ဆက်သွယ်မှု ဟုဆိုကာ ၁၇-၁ ဥပဒေဖြင့်အရေးယူမည်ဖြစ်ကြောင်း ပြောဆိုသည်ဟု RCSS/SSA ပိုင် Taifreedom ၀က်ပ်ဆိုက်တွင်ဖော်ပြသကဲ့သို့ နိုင်ငံရေးပါတီဝင် ကျောက်မဲဒေသခံတဦးကလည်း သျှမ်းသံတော်ဆင့် အားပြောသည်။
“NCA သဘောတူညီချက်စာချုပ်ပါအရေးကြီးအချက်အလက်များကောက်နှုတ်ရေးသားထားသည့် စာအုပ်တွင် အခန်း ၆ ယုံကြည်မှုတည်ဆောက်ခြင်းနှင့်စပ်လျဉ်းသည့်ဆောင်ရွက်ရမည့်အချက်များ အချက်နံပတ် ၂၄ (က နှင့် ခ) တွင် NCA လက်မှတ်ရေးထိုး သူများနှင့်ပတ်သက်သည့် မည်သည့်ပုဂ္ဂိုလ်သို့မဟုတ် အဖွဲ့အစည်း ကိုမျှ နိုင်ငံရေးပါတီများမှတ်ပုံတင်ခြင်းဥပဒေအရဖြစ်စေ၊ မတရားအသင်း အက်ဥပဒေအရဖြစ်စေ အရေးမယူရန် ” – ဟု ပါရှိသည်။
သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA သည် ဦးသိန်းစိန်အစိုးရ လက်ထက် ၂၀၁၅ အောက်တိုဘာလ ၁၂ ရက်နေ့က အကြမ်းဖက်သူများအဖြစ်မှ ပယ်ဖျက်လိုက်ကြောင်း အစိုးရက ထုတ်ပြန်ကြေငြာထားသည်။
