သျှမ်းပြည်မြောက်ပိုင်း သီပေါမြို့နယ်အတွင်း မြောက်ပိုင်းမဟာမိတ်တပ် နှင့် RCSS တပ်တို့ ကြားတိုက်ပွဲကြောင့် စစ်ဘေးရှောင်ဒေသခံလူထု ၁၀၀၀ ကျော် အထိ ယနေ့တိုးလာနေကြောင်းသိရသည်။

၂ ဦး ၂ ဖက်ကြားတိုက်ပွဲများမှာ နိုဝင်ဘာလ ၂ ရက်နှင့် ၃ ရက်နေ့  ၂ရက်တာအတွင်းဖြစ်ပြီး စစ်ဘေးရှောင်များမှာ လည်း နားမခေါ်ကျောင်းတိုက်နှင့်ဝမ့်ဟုန့်ရွာကျောင်းတိုက်တို့တွင် စစ်ဘေးရှောင်ခိုလှုံနေကြခြင်းဖြစ်သည်။

နားမခေါ်ရွာ ဒေသခံလူငယ် စိုင်းဝမ်းဟိန်းက – “ဒီနေ့မနက်တုန်းက ဝမ့်ဟုမ့်ကရွာသားတွေ စစ်ဘေးရှောင် ထပ် ရောက် လာတယ်။ တိုက်ပွဲတွေဘာတွေတော့အခု ငြိမ်နေတယ်။ တဖက်တပ်တွေလည်းအသီးသီး ဆုတ်ခွါကြပြီလို့ ပြောတယ်။ ဒါပေမယ့် အခြေအနေက လုံး၀ စိတ်မချရသေးတာကြောင့်နေရပ်ပြန်ပို့ဖို့ စောင့်ကြည့်ရဦးမယ် “-ဟု သျှမ်းသံတော်ဆင့်အားပြောသည်။

နားမခေါ်ဘုန်းကြီးကျောင်းရောက်စစ်စစ်ဘေးရှောင်များမှာ နားမခေါ်အုပ်စုဝင်များဖြစ်သော ဝမ့်ဟိုနားရွာ၊ ဝမ့်နိုင်းလုံရွာ၊ ဝမ့်တုန့်ကျိုင်းရွာ၊ တာ့လုံရွာ ခိုင်းဟျိုးရွာမှ  ၂၂၈  အိမ်ထောင်၊ ဒေသခံ ၆၅၂ ဦး၊  ဝမ့်ဟုန်ရွာသား အိမ်ခြေ ၉၄ အိမ်နှင့် လူဦးရေ ၄၁၀ စုစုပေါင်းလူဦးရေ ၁၀၅၂ ဦး  အိမ်ထောင်စုပေါင်း ၃၂၂ စုဖြစ်ကြောင်း သိရသည်။

စိုင်းဝမ်းဟိန်းက- “အစားအသောက် အဝတ်အထည်နဲ့နေထိုင်ဖို့ကျတော့ သီပေါမြို့နယ်ထဲက နိုင်ငံရေးပါတီတွေ၊ လူမှုအဖွဲ့အစည်းတွေကနေ လာပြီးကူညီထေက်ပံ့မှုပေးပါတယ်။ “- ဟုပြောသည်။

ယခုတပတ်အတွင်း မြောက်ပိုင်းမဟာမိတ်တပ်ဝင်များ နှင့် RCSS/SSA တို့ကြား တိုက်ပွဲများမကြာခနဖြစ်ပွါးသဖြင့် နမ္မတူမြို့နယ် နှင့် လားရှိုးမြို့နယ်တို့မှ ရွာသား ၂၀၀၀ ကျော် စစ်ဘေးတိမ်းရှောင်ခဲ့ရသည်။ လက်ရှိတွင် ၎င်းတို့သည်နေရပ်အသီးသီးပြန်သွားကြပြီဟုဆိုသော်လည်း မကြာခဏ စစ်ဘေးတိမ်းရှောင်ခဲ့ရသဖြင့် လယ်ယာခြံထွက်သီးနှံများ သိမ်းဆည်းခြင်းမပြုနိုင်ဘဲ  ဝမ်းရေးအတွက် စိုးရိမ်နေကြေကြောင်းလည်း၎င်းတို့က ပြောသည်။