သျှမ်းပြည်မြောက်ပိုင်းသီပေါမြို့နယ် နားမခေါ်အုပ်စုအနီး တိုက်ပွဲဖြစ်ပွါးရာ ဒေသခံရွာသား ၆၀၀ ကျော် နားမခေါ်အုပ်စုဘုန်းကြီးကျောင်းသို့ရောက်ရှိစစ်ဘေးခိုလှုံနေ ကြောင်း သိရသည်။

သီပေါနှင့်နမ့်လန်ကြား နားမခေါ်အုပ်စုအတွင်း နို၀င်ဘာလ ၂ ရက်နေ့မနက်ပိုင်းကစပြီး နေ့ခင်းပိုင်းအထိ မြောက်ပိုင်းမဟာမိတ်တပ်ဖွဲ့နှင့် RCSS တို့အကြား ပစ်ခတ်မှုဖြစ်ပွါးခဲ့ခြင်းဖြစ်ကြောင်း သီပေါ မြို့နယ် ပြည်နယ် လွှတ်တော်ကိုယ်စားလှယ် စိုင်းခမ်းအောင်က အတည်ပြုပြောဆိုသည်။

နားမခေါ်ရွာဘုန်းကြီးကျောင်းသို့ရောက်ရှိကာ စစ်ဘေးရှောင်များအားကူညီမှုပေးနေသည့် သီပေါမြို့ခံ လူငယ် စိုင်းလျန်းက -” အခု နားမခေါ်ဘုန်းကြီးကျောင်းကိုစစ်ဘေးရှောင် ၆၀၀ လောက်ရောက်နေတယ်။ ၀မ့်နိုင်းလုံ ၊ ၀မ့်တာ့ လုံ၊ ၀မ့်ဟိုနား ရွာသားတွေဖြစ်တယ်။ နိုင်းလုံရွာနဲ့ ၁ မိုင်လောက်အကွာမှာဘဲ ပစ်ခတ်ကြတာလို့ ဘုန်းကြီး ကျောင်းကိုရောက်လာတဲ့ရွာသားတွေကပြောပါတယ်။ အခုထိ စစ်ဘေးရှောင်တွေ တဖွဲဖွဲ ရောက် လာနေတုန်း “- ဟု သျှမ်းသံတော်ဆင့် အားပြောသည်။

အဆိုပါတိုက်ပွဲဖြစ်ပွါးသည့် နိုင်းလုံရွာသည် သီပေါမြို့တောင်ဘက် နားမခေါ်အုပ်စုနှင့် နမ့်လန်အုပ်စု (၁၆ မိုင်ခန့်အကွာ) ကြား နားမခေါ်ရွာ၏ တောင်ဘက် ၄ မိုင်အကွာ၊ ၀မ့်ဟုမ့်ရွာတောင်ဘက် ၁ မိုင်ခန့်အကွာ တွင်ဖြစ်ကြောင်းသိရသည်။

တိုက်ပွဲက ၀မ့်ဟုမ့်ရွာနဲ့တအားနီးတယ်။ မနက် ၁၀ နာရီ ၄၀ လောက်တုန်းကတကြိမ်နဲ့ မွန်းလွဲ ၁ နာရီကျော်ကျော်မှာတုန်က ၂ ကြိမ်။ စုစုပေါင်း ၃ ကြိမ်ဖြစ်တယ်။ ၀မ့်ဟုမ့်ရွာသားတွေထွက်လာတော့ တိုက်ပွဲဖြစ်နေလို့ မလွတ်မြောက်လာနိုင်ဘဲ ရွာဘက်ပြန်လှည့်သွားရတယ်။ခု ကျောင်းရောက်လာတာ ၀မ့်ဟုမ့်ရွာသားတွေမပါသေးဘူး။ သူတို့ထွက်လာနိုင်ရင်သွားကြိုဖို့အခု နမ့်လန် ကကူညီရေးကား ၂ စီးရောက်နေတယ် ဘုန်းကြီးကျောင်းကို – ဟု စိုင်းလျန်းက ပြောပြသည်။

လက်ရှိတွင် ၂ ဖက်တပ်စလုံးက အင်အားဖြည့်တင်းမှုများရှိနေသဖြင့် တိုက်ပွဲဆက်လက်ဖြစ်ပွါးမည်ကို စိုးရိမ်ကာ ရွာသားများ ထွက်ပြေးတိမ်းရှောင်ကြခြင်းဖြစ်ကြောင်းပြောသည်ဟု ဆိုပါသည်။

ယခုအတောအတွင်း မြောက်ပိုင်းမဟာမိတ်တပ်ဖွဲ့နှင့် RCSS/SSA တို့သည် သျှမ်းပြည်မြောက်ပိုင်း နမ္မတူမြို့နယ်၊ လားရှိုးမြို့နယ်နှင့် သီပေါမြို့နယ်တို့တွင်တိုက်ပွဲများဆက်တိုက်ဖြစ်ပွါးခဲ့ပြီး ပြီးခဲ့သည့်အပတ်ကပင် စစ်ဘေးရှောင်လူထု ၂၀၀၀ ကျော်ရှိခဲ့သည်။ တနှစ်ပတ်လုံးစစ်ဘေးရှောင်နေရသဖြင့် လယ်ယာလုပ်ငန်းခွင်မဝင်နိုင်ဘဲ လာမည့်နှစ် မိသားစု စားဝတ်နေရေးအတွက် တွေးပူနေရကြောင်း ယခင်အပတ်က လားရှိုးမြို့ မန်ဆူဘုန်းကြီးကျောင်းရောက် စစ်ဘေးရှောင်များကပြောသည်။