နိုဝင်ဘာလ ၃ ရက်နေ့ကျင်းပမည့် ကြားဖြတ်ရွေးကောက်ပွဲအတွက် သျှမ်းပြည်တောင်ပိုင်း လဲချားမြို့နယ်တွင် ပြည်သူ့လွှတ်တော်ကိုယ်စားလှယ် မဲဆန္ဒနယ်အတွက်မဲပေးပိုင်ခွင့်ရှိသူ  ၃၉၀၀၀ ကျော်ရှိကြောင်း မြို့နယ်ရွေးကောက်ပွဲကော်မရှင်က ထုတ်ပြန်ထားသည့်စာရင်းအရသိရသည်။

လဲချားဒေသခံ စိုင်းနွံ က- ကျနော်တို့လေ့လာကြည့်သလောက်တော့ ၃၀ ရာခိုင်နှုန်းလောက်က သျှမ်းပါတီတွေ မပေါင်းလို့မဲမထည့်ချင်ဘူး လို့ပြောကြတဲ့သူတွေဘဲ။ ကျနော့်သဘောထားကတော့ မဲပေးပိုင်ခွင့် အခွင့်အရေးကကိုယ့်အတွက်တကယ့်အခွင့်အရေးဘဲ။ ဒါကြောင့်လူတိုင်းကို ကျနော် တိုက်တွန်းတယ် ရပ်ကွက်တိုင်း အုပ်စုတိုင်းရွာကတိုင်းကလူတွေ မဲသွားပေးဖို့ပေါ့- ဟု သျှမ်းသံတော်ဆင့်အား ပြောသည်။

နိုဝင်ဘာလ ၃ ရက်နေ့တွင် ပြည်ထောင်စုရွေးကောက်ပွဲကော်မရှင်က မြန်မာတနိုင်ငံလုံး    လစ်လပ်နေသည့် လွှတ်တော်ကိုယ်စားလှယ်များနေရာ ၁၃ နေရာအတွက်  ကြားဖြတ်ရွေးကောက်ပွဲကျင်းပပေးမည်ဖြစ်ရာ ဝင်ရောက်ယှဉ်ပြိုင်မည့်ကိုယ်စားလှယ်လောင်း ၆၉ ဦးရှိကြောင်းသိရသည်။

လဲချားမြို့အတွင်း ရပ်ကွက် ၄ ခုနှင့် အုပ်စု ၁၉ ခုရှိပြီး စုစုပေါင်း မဲပေးပိုင်ခွင့်ရှိသူ ၃၉၇၆၀ ဦးရှိကြောင်း မဲရုံစုစုပေါင်း ၃၆ နေရာထားရှိပေးမည်ဖြစ်ကြောင်း သိရသည်။

စာရေးဆရာ ဟိဏ်း ကာယန်းကမူ-  သျှမ်းပါတီမပေါင်းလို့ မဲမပေးတော့ဘူးဆိုပြီး မဲသွားမပေးရင် ကျနော်တို့ မြို့ရွာဒေသအတွက် ရသင့်တဲ့အခွင့်အရေးတွေဆုံးရှုံးရပါမယ် ။ – ဟု ပြောဆိုသည်။

လဲချားမြို့တွင်ယှဉ်ပြိုင်မည့် ပြည်သူ့လွှတ်တော်ကိုယ်စားလှယ်လောင်းများမှာ ကျားခေါင်းပါတီမှ စိုင်းဥက္ကာ၊ ကျားဖြူပါတီမှ စိုင်းရွှေဆိုင်းနှင့် အမျိုးသားဒီမိုကရေစီအဖွဲ့ချုပ်မှ စိုင်းအောင်ထွန်းလေး တို့ဖြစ်ကြောင်းသိရသည်။