သျှမ်းပြည် လဲချားမြို့နယ်အတွင်း စစ်ကောင်စီ သည် ဂျက်ဖိုက်တာဖြင့် (၄) ကြိမ်ထက်မနည်း လာရောက် ပျံဝဲကြောင်း စုံစမ်း သိရှိရသည်။

.

ပြီးခဲ့သည့် သြဂုတ် (၆) ရက်နေ့က စတင်ပြီး ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် စစ်ကောင်စီတို့ တိုက်ပွဲ ဖြစ်ပွားပြီးနောက် ယမန်နေ့ သြဂုတ် (၁၅) ရက်ထိ စစ်ကောင်စီသည် ဂျက်လေယာဥ်ဖြင့် (၄) ကြိမ်ထက်မနည်း လာရောက် ပျံဝဲနေကြောင်း စုံစမ်း သိရှိရသည်။

“မနေ့ နေ့လည် ၁၂ နာရီလောက်က ဂျက်လေယာဥ် ပျံဝဲလာတာ တွေ့ရတယ်။ ဒီတစ်ခါတော့ သူတို့ မြင့်မြင့် ပျံဝဲသွားတယ်။ စစ်ကောင်စီဘက် အင်အားဖြည့်တင်းတာတော့ မကြားမိသေးဘူး။ SSPP ဘက်တော့ စစ်အင်အားဖြည့်လာတာတော့ တွေ့ရတယ်။ တိုက်ပွဲပြင်းထန်လာမှာကိုတော့ ကျနော်တို့ ဒေသခံတွေတော့ စိုးရိမ်တယ်” ဟု လဲချားဒေသခံ တစ်ဦး ကပြောသည်။

ပြီးခဲ့သည့် သြဂုတ် (၉) ရက် မနက် ၁၀ နာရီခွဲ ဝန်းကျင်က နမ့်စန်ဘက်မှ ပျံလာသည့် ဂျက်လေယာဥ် တစ်ကြိမ် ပျံဝဲလာကြောင်း၊ နေ့လည် ၁၂ နာရီဝန်းကျင်မှာ ထပ်မံပြီး တစ်ကြိမ် ပျံဝဲလာကြောင်း၊ သြဂုတ် (၁၀) ရက် နေ့လည်ပိုင်းအချိန်မှာ ထပ်မံပြီး တစ်ကြိမ် လာရောက် ပျံဝဲခဲ့ကြောင်း လဲချားမြို့နယ်အတွင်း SSPP စစ်ရေးလှုပ်ရှားသည့် အရာရှိတစ်ဦး ကပြောသည်။

“မနေ့က တိုက်လေယာဥ် နဲ့ ၂ ကြိမ်တောင် လာရောက် ပျံဝဲတာရှိတယ်။ နမ့်စန်ဘက်ကနေ လာတာတွေ့ရတယ်။ သူတို့က ကန်းအွန်၊ ဟိုင်းဆိုင် နဲ့ လဲချား ဘက် လာပတ်တာရှိတယ်။ တကယ်လို့ သူတို့ စစ်အင်အားဖြည့်တင်းပြီး တိုက်ခိုက် လာရင်တော့ တိုက်ပွဲက ကြီးလာနိုင်တယ်။ လက်ရှိ တိုက်ပွဲကတော့ ငြိမ်နေတယ်။ နှစ်ဖက်စစ်ရေး တင်းမာမှု ရှိနေတယ်” ဟု SSPP စစ်ရေးလှုပ်ရှားသည့် အရာရှိ တစ်ဦး ကပြောသည်။

စစ်ကောင်စီတပ်သည် လဲချားမြို့နယ်အတွင်း နယ်မြေတိုးချဲ့ စစ်ရေးလှုပ်ရှားရန်အတွက် ပြည်သူ့စစ်တပ်ဖွဲ့များဖြစ်ကြသော PNO အပါအဝင် SSS (မဟာဂျာ) ပြည်သူ့စစ်၊ မက်ကျန်းပြည်သူ့စစ် နှင့် နားရိုင်းပြည်သူ့စစ်များ ဖြစ်ကြောင်း သိရသည်။

စစ်ကောင်စီ နှင့် SSPP တို့ တိုက်ပွဲ မဖြစ်ပွားစေရန်အတွက် နေပြည်တော်မှ သက်ဆိုင်ရာတိုင်းမှူး နှင့် တာဝန်ရှိသူများကို ညွှန်ကြားမှု ရှိလာသည်။

လဲချားမြို့နယ်မှ SSPP/SSA နှင့် စစ်ကောင်စီတို့ ဖြစ်ပွားခဲ့သည့် တိုက်ပွဲကြား စစ်ကောင်စီဘက်မှ တပ်သား ၁၀ ဦး ကျော် သေဆုံးသည့်အပြင် အရှင်ဖမ်းမိသူ ၂ ဦး၊ သေနတ် ၂ လက် နှင့် ကား တစ်စီးကို လည်း ဖမ်းဆီးရမိကြောင်း SSPP/SSA က သြဂုတ် ၇ ရက်တွင် ထုတ်ပြန်ထားသည်။