သျှမ်းပြည် လဲချားမြို့နယ်အတွင်း စစ်ကောင်စီမှ စစ်အင်အား ဆက်တိုက် တိုးချဲ့နေသည့်အပြင် ပြည်သူ့စစ်တပ်ဖွဲ့ တစ်ဖွဲ့လျှင် တပ်သား ၁၀၀ ပါဝင်ပေးရန်လည်း တောင်းယူနေကြောင်း စုံစမ်းသိရသည်။
.
စစ်ကောင်စီ နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် ( SSPP/SSA) တို့ တိုက်ပွဲဖြစ်ပွားပြီးနောက်ပိုင်း လဲချားမြို့နယ်အတွင်း စစ်ရေးတင်းမာ နေလျက်ရှိသည့်အပြင် စစ်ကောင်စီဘက်မှလည်း စစ်အင်အား ဖြည့်တင်းပြီး ဒေသတွင်း ပြည်သူ့စစ်များကို တပ်ဖွဲ့ တဖွဲ့လျှင် အင်အား ၁၀၀ ဖြင့် ပါဝင်ပေးရန် တောင်းခံခဲ့ကြောင်း အမည်မဖော်လိုသည့် သတင်းရင်းမြစ်တစ်ဦး က သျှမ်းသံတော်ဆင့်ကို ပြောသည်။
“အခု လောလောဆယ်တော့ ပြည်သူ့စစ်ဘက်က အင်အား ၃၀၀ ကျော်ရှိပြီလို့ သိရတယ်။ PNO ၊ SSS (မဟာဂျာ) ပြည်သူ့စစ်၊ မက်ကျန်း ပြည်သူ့စစ် ပါတယ်။ နောက်ပြီး နားရိုင်းပြည်သူ့စစ်တွေ ကောပါတယ်။ ပြည်သူ့စစ်တပ်ဖွဲ့ တစ်ခုကို အင်အား ၁၀၀ ပါဖို့ တောင်းထားတယ်လို့တော့ ကြားတယ် “ ဟု အမည်မဖော်လိုသည့် သတင်းရင်းမြစ် တစ်ဦး ကဆိုသည်။
လက်ရှိမှာ စစ်ကောင်စီတပ်အတွက် လဲချားမြို့နယ်အတွင်း နယ်မြေတိုးချဲ့ လှုပ်ဆောင်ရန်အတွက် ပါဝင်လာသည့် ပြည်သူ့စစ်တပ်ဖွဲ့သည် PNO အပါအဝင် SSS (မဟာဂျာ) ပြည်သူ့စစ်၊ မက်ကျန်း ပြည်သူ့စစ် နှင့် နားရိုင်းပြည့်စစ်များ ဖြစ်ကြောင်း သိရသည်။
ယခင် လဲချားမြို့ အဝင် နှင့် အထွက်ရှိ စစ်ဆေးရေးဂိတ်တွင် စစ်ကောင်စီတပ်သားများ မဟုတ်သည့် ပြည်သူ့စစ်တပ်ဖွဲ့တပ်သားများ လုံခြုံရေးအတွက် စောင့်ဆိုင်းနေလျက်ရှိကြောင်း လဲချားမြို့ဒေသခံ တစ်ဦးက ထပ်လောင်းပြောသည်။
“မနေ့က ထပ်ကြားတာ မြို့အဝင်၊ အထွက် လမ်းမကြီးမှာ သဲကျောက်တွေ ခင်းထားလို့ ကားတွေ ဖြတ်သန်းသွားတာ မရတော့ဘူးလို့ ပြောတယ်။ နောက်ပြီး ဂိတ်တွေမှာလည်း အရင်တုန်းက ပြည်သူ့စစ်တွေ စောင့်နေတာ ရှိတယ်လေ။ ဒါက စစ်ရေးအရဆိုတော့ မပြောတတ်ဘူး“ ဟု ၎င်း ဒေသခံတစ်ဦးက ပြောသည်။
လဲချားမြို့နယ်အတွင်း တိုက်ပွဲသည် ပြီးခဲ့သည့် သြဂုတ် ၆ ရက်တွင် SSPP/SSA နှင့် စစ်ကောင်စီတို့ တိုက်ပွဲပြင်းထန်ခဲ့ရာ စစ်ကောင်စီဘက်မှ အကျအဆုံးများခဲ့သည်။ လက်ရှိမှာလည်း နှစ်ဘက်တပ်ဖွဲ့ စစ်ရေးတင်းမာနေပြီး တိုက်ပွဲပြန်ဖြစ်မည်ကို ပြည်သူများ ကစိုးရိမ်နေကြသည်။
