သျှမ်းပြည် လဲချားမြို့ရှိ ဈေးအတွင်း၌ ဖွင့်လှစ်ထားသော “ခမ်းလီ”ရွှေဆိုင်အား အမည်မသိ အမျိုးသားတစ်ဦး၏ သေနတ်ဖြင့်ခြိမ်းခြောက်ကာ ဓားပြတိုက်ခြင်းခံရကြောင်း စုံစမ်းသိရသည်။

ယနေ့ (ဇန်နဝါရီလ ၃ ရက်) နေ့လယ် ၂ နာရီခွဲခန့်က လဲချားမြို့ ရပ်ကွက်(၁)မှ ဈေးအရှေ့ဘက်တွင် လာရောက်ဖွင့်လှစ်ထားသော “ခမ်းလီ”ရွှေဆိုင်ကို အမည်မသိ အမျိုးသားတစ်ဦးက သေနတ်ဖြင့်ခြိမ်းခြောက်ပြီး ဆိုင်အတွင်းရှိ ရွှေ ၃ ကျပ်သားခန့်နှင့် ငွေသားများကို ဓားပြတိုက် လုယူသွားကြောင်း လဲချားမြို့ ဒေသခံများက ပြောသည်။

“ဓားပြတိုက်သွားတဲ့တစ်ယောက်က နှာခေါင်းစည်း တပ်ထားပြီးတော့ ဆိုင်ကယ်ဦးထုပ်လဲ ဆောင်းထားတာ ရွှေဝယ်မယ့်ပုံစံနဲ့ ဆိုင်ထဲဝင်လာတယ်။ ဆိုင်ရှင်က ထုတ်ပြတော့ ၂ ကျပ်သားကျော်လောက်ရှိတဲ့ ရွှေဆွဲကြိုးကို သူ့အိတ်ထဲ ထည့်ပြီး ဆိုင်ရှင်ကို သေနတ်ပြ ခြိမ်းခြောက်သွားတာ။ ငွေသားကတော့ ဘယ်လောက်ပါသွားလဲ မသိရဘူး”ဟု လဲချားမြို့မှ ‌ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

လဲချားမြို့ရှိ “ခမ်းလီ”ရွှေဆိုင်ကို ‌ သေနတ်ဖြင့်ခြိမ်းခြောက်ပြီး ဓားပြတိုက်ခံရမှုကြောင့် ၂ ကျပ်သားခန့်ရှိ ရွှေဆွဲကြိုးတစ်ကြိုးနှင့် ၄ မူးခန့်ရှိ ရွှေလက်စွပ် ၃ ကွင်းတို့အပြင် ငွေသားများလည်း လုယူခံခဲ့ရကြောင်း လဲချားမြို့မှ ဖြစ်စဉ်သိရှိသူ ၎င်းအမျိုးသားက ဆက်ပြောသည်။

လက်ရှိအချိန်ထိ ပြစ်မှုကျူးလွန်သည့် အသက် ၅၀ နှစ်ခန့်ရှိ အမျိုးသားကို ဖမ်းဆီးရမိခြင်း မရှိသေးဘဲ ထွက်ပြေးလွတ်မြောက်နေဆဲဖြစ်ကြောင်း သိရသည်။

ပြီးခဲ့သည့် ဒီဇင်ဘာလ (၂၇) ရက်ကလည်း လွိုင်လင်မြို့နယ် ပင်လုံမြို့ရှိ စျေးအရှေ့ဘက်တွင် ဖွင့်လှစ်ထားသော လျှပ်စစ်ပစ္စည်းနှင့် ဖုန်းအပိုပစ္စည်းအရောင်းဆိုင်ကို အမည်မသိ လူတစ်စုက သေနတ်ဖြင့် ဝင်ရောက်ပစ်ခတ်ခဲ့ရာ ဆိုင်ရှင်အပါအဝင် (၄) ဦး ပွဲချင်းပြီး သေဆုံးသွားခဲ့ကြောင်း ပင်လုံမြို့ဒေသခံများထံမှ သိရသည်။

ထို့အပြင် ပင်လုံ – လဲချားလမ်းပိုင်းတွင် သေနတ်ဖြင့် ခြိမ်းခြောက်ပြီး ဓားပြတိုက်မှုများ မကြာခဏ ဖြစ်ပွားလျက်ရှိကာ လမ်းသွားလမ်းလာ ပြည်သူများ၏ ဆိုင်ကယ်များလည်း မကြာခဏ လုယက်ခံနေရကြောင်း ဒေသခံများက ပြောဆိုသည်။