သျှမ်းပြည် တောင်ပိုင်း မိုင်းရှူးမြို့တွင် ရွှေဆိုင်တစ်ဆိုင်သည် ယနေ့ (သြဂုတ် ၁၂)ရက် ညနေ ၄နာရီခွဲဝန်းကျင်၌ ဓားပြတိုက်ခံရပြီး ရွှေ ၆၀ ကျပ်သား နှင့် မြန်မာကျပ်သိန်း (၂၀၀) ကျော်ပါသွားကြောင်း သတင်းရရှိသည်။

ယနေ့ (သြဂုတ်လ ၁၂ ရက်) ညနေ ၄ ခွဲဝန်းကျင်တွင် မိုင်းရှူးမြို့ ရပ်ကွက် (၃) မြို့မဈေး အရှေ့ဘက်ရှိ မောင်ဟိန်းရွှေဆိုင်ကို အမည်မသိ လက်နက်ကိုင် အမျိုးသားနှစ်ဉီးက သေနတ်ရှည်ဖြင့် ဝင်လာပြီး ဓားပြတိုက်သွားသည်။

ထိုဓားပြတိုက်ရာတွင် ရွှေ ၆၀ကျပ်သား နှင့် မြန်မာကျပ်ငွေသိန်း ၂၀၀ ပါသွားကြောင်း မိုင်းရှူးဒေသခံ အမျိုးသမီး တစ်ဉီးက သျှမ်းသံတော်ဆင့်ကိုပြောသည်။​

“ဆိုင်ပိတ်ဖို့ လုပ်နေချိန် ရွှေတွေ သိမ်းနေတဲ့အချိန်ကြီး ကားအဖြူရောင်နဲ့ လူနှစ်ယောက်
ဝတ်စုံအမဲတွေနဲ့ ဝင်ပြီးဓားပြတိုက်သွားတာ။ သေနတ်လည်းပါတယ်။ ရွှေ ၆၀ ကျပ်သားနဲ့ ငွေသား ကျပ်သိန်း ၂၀၀ ပါသွားတယ်။ ”ဟု မိုင်းရှူးမြို့ဒေသခံအမျိုးသမီးတစ်ဦးက ပြောသည်။

မိုင်းရှူးမြို့သည် စစ်ကောင်စီထိန်းချုပ်သည့် ဒေသဖြစ်ပြီး၊ စစ်အာဏာသိမ်းပြီးနောက်ပိုင်း လောင်းကစားရုံများနှင့် အွန်လိုင်း ငွေလိမ်းဂိုဏ်းများ၊ အွန်လိုင်း လောင်းကစားများပေါများလာကြောင်းသိရသည်။