သျှမ်းပြည် သိန္နီမြို့ရှိ မြို့မဈေးထဲတွင် ငါးခြောက်ရောင်းသည့် အမျိုးသမီးတစ်ဉီးကို အမည်မသိအမျိုးသားတစ်ဉီးက ဓားပြတိုက်ပြီး ရိုက်နှက်ဒဏ်ရာဖြင့် သေဆုံးသွားခဲ့ကြောင်း စုံစမ်းသိရသည်။
ယမန်နေ့ (မတ်လ ၁၂ ရက်) ညနေပိုင်းတွင် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ရှိ မြို့မဈေး (ဈေးဟောင်း) တွင် ငါးခြောက်ရောင်းနေသော အသက် (၅၀) ကျော်အရွယ် အမျိုးသမီးတစ်ဦးကို အမည်မသိ အမျိုးသားတစ်ဦးက ဓားပြတိုက်သွားပြီး တုတ်ဖြင့် ရိုက်နှက်ခဲ့ခြင်းကြောင့် ဒဏ်ရာများဖြင့် သေဆုံးသွားခဲ့ကြောင်း ဒေသခံများက ပြောသည်။
“မနေ့ညက ဘယ်အချိန် ဆုံးလဲတော့ မသိလိုက်ဘူး၊ ဒီမနက် သွားကြည့်တော့ ရိုက်နှက်ထားတဲ့ ဒဏ်ရာနဲ့ ဆုံးနေတာ။ တုတ်နဲ့ ရိုက်ထားတာ ဘေးနားမှာ ရှိနေသေးတယ်။ ဒီအန်တီက အိမ်ငှားနေတာ သိန္နီဇာတိတော့ မဟုတ်ဘူး၊ ဆုံးတဲ့အချိန်က ငါးခြောက်လာထည့်နေတဲ့အချိန် ဖြစ်သွားတာ။ အခုတော့ လုပ်တဲ့လူကို မသိသေးဘူး”ဟု သိန္နီမြို့မဈေးမှ ဈေးသည်အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်ထိ ပြစ်မှုကျူးလွန်သူကို ကိုးကန့်တပ်ဖွဲ့မှ ဖမ်းဆီးရမိခြင်း မရှိသေးဘဲ လွတ်မြောက်နေဆဲဖြစ်ပြီး အသတ်ခံရသူ အမျိုးသမီး၏ ဆွေမျိုးများမှာ လားရှိုးမြို့မှ သိန္နီမြို့သို့ သွားရောက်နေကြောင်း ဒေသခံများက ပြောဆိုသည်။
သိန္နီမြို့တွင် ဓားပြတိုက်ခံရပြီး လူသတ်ခံရသည့် ဖြစ်စဉ်များ ယခင်က မဖြစ်ခဲ့ဖူးဘဲ ကိုးကန့်တပ်ဖွဲ့မှ လောင်းကစားဝိုင်းများကို အကြီးအကျယ် ဖွင့်ခွင့်ပြုပြီးနောက် ယခု ပထမဆုံး အကြိမ် ဖြစ်ပွားခြင်းကြောင့် လုံခြုံရေး စိုးရိမ်ရကြောင်း သိရသည်။
“မြို့မှာတော့ ဒီတခေါက်ပဲ ကြုံရသေးတာ၊ လောင်းကစားဝိုင်းရှိတော့ စိတ်ပူရတယ်။ လောင်းကစားဝိုင်းက လေလံဆွဲထားတော့ အခုထိ ရှိသေးတယ်။ ဘယ်သူမှလည်း သွားပြောလို့ မရဘူးလေ၊ အရင်က ဖမ်းတာတောင် အခု လုပ်ရဲသေးတာ။ ကိုးကန့်ဘက်ကတော့ တရားခံ ဖမ်းမိဖို့ ပြည်သူတွေ ပူးပေါင်းပေးဖို့တော့ ပြောတယ်”ဟု ၎င်းဈေးသည် အမျိုးသားက ဆက်ပြောသည်။
လက်ရှိတွင် သိန္နီမြို့ တပေါင်းပွဲကို ကိုးကန့်တပ်ဖွဲ့ MNDAA ဦးဆောင်မှုဖြင့် မတ်လ (၁၀) ရက်နေ့မှ စတင်ကျင်းပနေပြီး လောင်းကစားဝိုင်းများကို အကြီးအကျယ် ဖွင့်လှစ်ခွင့် ပြုထားခြင်းကြောင့် ခိုးဆိုးလုနှိုက်နှင့် ဓားပြတိုက်မှု အန္တရာယ်ကို စိုးရိမ်ရပြီး လုံခြုံမှုပျက်ယွင်းနေသည်ဟု ခံစားရကြောင်း ဒေသခံများက ပြောဆိုသည်။
Leave a Comments