သျှမ်းပြည်တောင်ပိုင်း၊ ဆီဆိုင်မြို့နယ် ဆိုက်ခေါင်စံပြကျေးရွာတွင် အသက် (၃၀) နှစ်အရွယ်ရှိ အမျိုးသမီးတစ်ဦးက သက်ကြီးရွယ်အို အမျိုးသမီးကို ဓားပြတိုက်သွားကြောင်း သတင်းရရှိသည်။
ဖြစ်စဉ်မှာ မတ်လ ပထမပတ်တွင် ဆီဆိုင်မြို့နယ် ဆိုက်ခေါင်စံပြကျေးရွာ ဘုရားဖြူရပ်ကွက်တွင် နေထိုင်သော အသက်(၆၀)ကျော် အမျိုးသမီးတစ်ဦးသည် နေအိမ်တွင် တစ်ဦးတည်း ရှိနေစဉ် အသက် (၃၀) ဝန်းကျင် အမျိုးသမီးတစ်ဦးက နေအိမ်အတွင်း ဝင်ရောက်လာပြီး ဓားဖြင့်ထောက်ကာ နှစ်ကျပ်သားခန့်ရှိသည့် ရွှေဆွဲကြိုး ဓားပြတိုက်သွားကြောင်း သိရသည်။
“အိမ်မှာက သက်ကြီးတစ်ဦးပဲ ကျန်ခဲ့တာ၊ သူလည်း မီးဖိုချောင်မှာ ထိုင်နေတာထင်တယ်။ အဲတာ အမျိုးသမီးက မျက်နှာအုပ်ပြီး မီးဖိုချောင်က ဓားနဲ့ ထောက်ပြီး ဆွဲကြိုးလုသွားတယ်။ လူတော့ ဘာမှ မလုပ်သွားလို့ တော်သေးတယ်၊ မိန်းကလေးတွေလည်း တော်တော်မလွယ်ဘူး”ဟု ဆီဆိုင်မြို့နယ်မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ နေအိမ်အတွင်း အမျိုးသမီးတစ်ဦးမှ ဓားပြဝင်တိုက်ရာတွင် ၎င်းအိမ်၏ နေ့စဉ် အခြေအနေကို စောင့်ကြည့်နေသူ ဖြစ်နိုင်ပြီး သက်ကြီးရွယ်အိုများကို နေအိမ်တွင် တစ်ယောက်တည်း မချန်ထားသင့်ကြောင်း ၎င်းအမျိုးသားက ဆက်ပြောသည်။
ထို့အပြင် ဆိုက်ခေါင်ကျေးရွာအတွင်း စလော့ဂိမ်း ဆော့ကစားသူများနှင့် မူးယစ်ဆေး သုံးစွဲသူ များလာသောကြောင့် ယခုကဲ့သို့ ဓားပြတိုက်မှုများ ဖြစ်ပေါ်လာကြောင်း ဆိုက်ခေါင်ဒေသခံ အမျိုးသမီးတစ်ဦးက ပြောသည်။
“ခုခေတ်က ကျွဲဂိမ်းဆော့တဲ့သူတွေများ၊ အကြွေးတွေလည်း များတော့ သူတို့တွေ လုယက်ဖို့လည်း ဝန်မလေးတော့ဘူးပေါ့။ ဆေးသုံးသူဆို ပိုဆိုးတယ်၊ ပိုက်ဆံမရှိရင် အကုန်ကြံစည်ပြီး ပိုက်ဆံရှာ ဆေးသုံးကြတာ။ မိန်းကလေးမို့လို့လည်း မယုံတာ အကောင်းဆုံးပဲ၊ ဓားပြတိုက်တာ မိန်းကလေးဆိုတော့ မယုံနိုင်စရာကြီး”ဟု ဆိုက်ခေါက်ဒေသခံ အဆိုပါ အမျိုးသမီးက ပြောသည်။
လက်ရှိ နိုင်ငံရေးအခြေအနေ ဆိုးဝါးမှုကို အခွင့်ကောင်းယူ၍ ဓားပြတိုက် လုယက်သူများ ပေါများလာနေပြီး နေအိမ်တံခါးများကို အမြဲတမ်း မဖွင့်ထားသင့်ဘဲ ပိတ်ထားသင့်ကြောင်း၊ ကိုယ်နှင့်မသိသူ မျက်နှာစိမ်းများကို နေအိမ်အတွင်း ဧည့်မခံသင့်ကြောင်း အဆိုပါ အမျိုးသမီးက ဆက်ပြောသည်။
အလားတူ ယမန်နှစ် ၂၀၂၅ ဩဂုတ်လတွင်လည်း ဆိုက်ခေါင်စံပြကျေးရွာအတွင်း အမျိုးသမီးတစ်ဦးမှ နေအိမ်တစ်အိမ်အတွင်း ဓားပြတိုက်ခဲ့ပြီး ထိုအချိန်၌ ရွှေနှင့် ငွေကျပ် သိန်း(၂၀)ဝန်းကျင် ပါသွားကြောင်း ဒေသခံများထံမှ သိရသည်။
လက်ရှိ ဆီဆိုင်မြို့နယ်တွင် စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် (PNO)တို့ နယ်မြေစိုးမိုးထားပြီး အဆိုပါ ဒေသအတွင်း ခိုးဆိုးလုယက်မှုနှင့် ဓားပြမှုများကို ကူညီဖြေရှင်း ဆောင်ရွက်ပေးမှုများ မရှိကြောင်း ဒေသခံများက ပြောသည်။
Leave a Comments