လားရှိုးမြို့နယ်အတွင်း အစိုးရတပ်မတော်ထိုးစစ်ဆင်သည့်အတွက် ဒေသခံ ၁၀၀ ကျော်စစ်ဘေးရှောင်ရောက်

0

လားရှိုးမြို့နယ် မိုင်းယော်တိုက်နယ်အတွင်း တအာင်းအမျိုးသားလွှတ်မြောက်ရေးတပ်မတော် TNLA အား အစိုးရတပ်မတော်ထိုးစစ်ဆင်တိုက်ခိုက်သဖြင့် ဒေသခံရွာသား ၁၀၀ ကျော် နေရပ်မှထွက်ပြေးတိမ်းရှောင် နေရကြောင်း သိရသည်။

Photo by KLP

အောက်တိုဘာလ ၃၀ ရက်နေ့ မနက် ၄ နာရီခန့်ကတည်းက မိုင်းယော်တိုက်နယ် တောင်ဘက် ပန်လော့ရွာနှင့်လွယ်စန်းရွာတို့ဘက်တွင် ပစ်ခတ်တိုက်ခိုက်သံများလက်နက်ကြီးကျည် ပစ်ခတ်သံများကြား ရပြီးနောက် မိုးလင်းချိန်တွင် မိုင်းယော်သို့ စစ်ဘေးရှောင်ရွာသား ၁၀၀ ခန့်ရှိနေကြောင်း မိုင်းယော်ဒေသခံ စိုင်းကမ် ကပြောသည်။

“ရွာကလာတဲ့စစ်ဘေးရှောင် အခုဆိုရင် ၁၀၀ ကျော်ပြီ။ တချို့လည်းမိုင်းယော်ထဲက အမျိုးတွေဆီမှာခိုလှုံတယ်။ တချို့လည်း လားရှိုးဆက်ဆင်းသွားတာ ကား ၃-၄ စီးလောက်ရှိတယ် ။ ပန်လော့ရွာ နဲ့ လွယ်စန်းရွာကြား လောက်မှာဖြစ်တယ်။ အသံက မိုင်းယော်ကနေတောင်ကြားနေရတယ်။ ” – ဟု သျှမ်းသံတော်ဆင့်အားပြောသည်။

တိုက်ပွဲဖြစ်ပွါးသည့်နေရာသည် မိုင်းယော် တောင်ဘက် ၃ မိုင်ခန့်အကွာတွင်ရှိပြီး ယမန်နေ့ညနေပိုင်း ကတည်းက ပန်လော့ရွာသို့ အစိုးရတပ်များဝင်ရောက်လာကာ ပန်လော့ရွာသူကြီးနှင့်ရွာသားများထံ တအာင်းလက်နက်ကိုင်တပ်ဖွဲ့များအကြောင်းစုံစမ်းမေးမြန်းကြောင်း စစ်ဘေးရှောင်ရွာသား တဦးထံမှသိရသည်။

မည်သည့်တပ်ကမသိရသော်လည်း လွန်ခဲ့သည့် ၃-၄ ရက်ကတည်းကအစိုးရတပ်များ မိုင်းယော်အရှေ့ဘက် သံလွင်မြစ်အနီး မိုင်းကျက်- ပန်ရှော်ဘက်သို့ အစိုးရတပ်များအင်အားဖြည့်တင်းဝင်ရောက်လာကြောင်း လားရှိုးရောက် မိုင်းကျက်ဒေသခံကလည်းပြောပါသည်။

အောက်တိုဘာလ အတွင်းသျှမ်းပြည်မြောက်ပိုင်း နမ္မတူမြို့နယ် ၊ လားရှိုးမြို့နယ်တို့တွင် လည်း မြောက်ပိုင်း မဟာမိတ်တပ်ဖွဲ့နှင့် သျှမ်းပြည်တပ်မတော် RCSS တို့အကြား တိုက်ပွဲများဆက်တိုက်ဖြစ်ပွါးသဖြင့် ဒေသခံထောင်နှင့်ချီ နေရပ်မှစွန့်ခွါကာ စစ်ဘေး ရှောင်နေခဲ့ရသည်။

တဖက်တွင်လည်း အစိုးရငြိမ်းချမ်းရေးကော်မရှင်နှင့်မြောက်ပိုင်းမဟာမိတ်တပ်ဖွဲ့ဝင်သုံးဖွဲ့ဖြစ်သည့် တအာင်း TNLA၊ ကိုးကန့် MNDAA နှင့် ရခိုင် AA တို့ တရုတ်နိုင်ငံ ကူမင်းမြို့၌ အောက်တိုဘာလ ၃၁ ရက်နေ့တွင် တွေ့ဆုံဆွေးနွေးကြမည်ဖြစ်ကြောင်းသိရသည်။

Leave a Comments

LEAVE A REPLY

Please enter your comment!
Please enter your name here