သျှမ်းပြည်တောင်ပိုင်း လဲချားမြို့နယ် လစ်လပ်နေသော ပြည်သူ့လွှတ်တော်ကိုယ်စားလှယ်နေရာအတွက် ယှဉ်ပြိုင်ကြမည့် ကျားဖြူပါတီနှင့်ကျားခေါင်းပါတီတို့ တပြိုင်တည်း စည်းရုံးရေးဆင်းနေကြကြောင်း လဲချားမြို့ခံများကပြောသည်။

နို၀င်ဘာလ ၁ ရက်နေ့ ည ၁၂ နာရီအချိန်တွင် ကြားဖြတ်ရွေးကောက်ပွဲအတွက် စည်းရုံးရေးကာလ ကုန်ဆုံးပြီဖြစ်ရာ ပြည်သူ့လွှတ်တော်ကိုယ်စားလှယ်နေရာအတွက် လဲချားမြို့နယ်တွင် ယှဉ်ပြိုင်မည့် နိုင်ငံရေးပါတီများ အပြိုင်စည်းရုံး ရေးဆင်းနေကြခြင်းဖြစ်ပြီး သျှမ်းပါတီ ၂ ခုဖြစ်သော ကျားခေါင်းနှင့်ကျားဖြူပါတီမှာ ယခုတလောတပြိုင်တည်း စည်းရုံး ရေးဆင်းနေခြင်းဖြစ်သည်ဟု လဲချားမြို့နယ်လူငယ်စိုင်းအိုက် ကပြောသည်။

“၂ ပါတီကတော့ အပြိုင်ပေါ့။ သူ့ပရိသတ်နဲ့သူ ထိုက်သင့်တဲ့သူ့အင်အားနဲ့သူတော့ရှိပါတယ်။ ဘယ်သူနိုင် နိုင်ဖွယ် ရှိလဲဆိုတော့ခန့်မှန်းမပြောတတ်ဘူးလောလောဆယ်။ မဲပေးတဲ့နေ့ဘဲစောင့်ကြည့်ရမယ်လေ။ “– ဟုသျှမ်းသံတော်ဆင့်အားပြောသည်။

SNLD ကျားခေါင်းပါတီ မှာ တရွာဝင်တရွာထွက်စည်းရုံးရေးဆင်းနေပြီး SNDP ကျားဖြူပါတီမှာမူ အောက်တိုဘာလ ၃၀ ရက်နေ့ ယနေ့မနက်ပိုင်းကတည်းက ပါတီဥက္ကဌ စိုင်းအိုက်ပေါင်းကိုယ်တိုင် လဲချားတွင်စည်းရုံးရေးဆင်းနေကြောင်း ၊ အမျိုးသားဒီမိုကရေစီအဖွဲ့ချုပ်မှာမူ သာမာန်အားဖြင့်သာ စည်းရုံးရေးဆင်းမှုပြုကြောင်း စိုင်းအိုက် ကပြောသည်။

“ကျားဖြူပါတီကအသံချဲ့စက်နဲ့ ဆော်သြစည်းရုံးနေတယ်။ NLD ကတော့ သာမာန်လောက်ပါဘဲ။ လက်ကမ်းစာစောင်လေးတွေဝေတယ်အဲလောက်ဘဲ “– ဟုစိုင်းအိုက်ကပြောသည်။

လဲချားမြို့နယ်တွင် ကြားဖြတ်ရွေးကောက်ပွဲဝင်ရောက်ယှဉ်ပြိုင်မည့်သူများမှာ ရှမ်းတိုင်းရင်းသားများဒီမိုကရေစီအဖွဲ့ချုပ် SNLD မှ စိုင်းကောင်ခမ်း(ခေါ်)စိုင်းဥက္ကာ ၊ ရှမ်းတိုင်းရင်းသားဒီမိုကရက်တစ်ပါတီ SNDP မှစိုင်းရွှေဆိုင်း နှင့် အမျိုးသားဒီမိုကရေစီအဖွဲ့ချုပ် NLD မှ စိုင်းအောင်ထွန်းလေး တို့ဖြစ်ကြပြီး ကြံ့ခိုင်ရေးပါတီ USDP မှာမူ ယှဉ်ပြိုင်ခြင်းမရှိကြောင်း သိရသည်။

၂၀၁၅ ရွေးကောက်ပွဲတွင် အနိုင်ရရှိ ခဲ့သော လဲချားပြည်သူ့လွှတ်တော်ကိုယ်စားလှယ် ကျားခေါင်းပါတီဝင်စိုင်းမွန်းမှာ ယမန်နှစ်နှောင်းပိုင်းက ကွယ်လွန်သွားခဲ့သဖြင့်၄င်းနေရာလစ်လပ်နေခြင်းဖြစ်သည်။

NLD အစိုးရလက်ထက် ဒုတိယအကြိမ်မြောက်ကြားဖြတ်ရွေးကောက်ပွဲကို နို၀င်ဘာလ ၃ ရက်နေ့တွင်ကျင်းပမည်ဖြစ်ရာ မြန်မာတနိုင်ငံလုံးလစ်လပ်နေသောမဲဆန္ဒနယ် ၁၃ နယ်ရှိပြီး ၄င်းအတွက် ၀င်ရောက်ယှဉ်ပြိုင်မည့် လွှတ်တော်ကိုယ်စားလှယ် လောင်း ၆၉ ဦးရှိကြောင်းသိရသည်။

လစ်လပ်နေရာ ၁၃ နေရာအနက် သျှမ်းနှင့်သက်ဆိုင်သောလစ်လပ်နေရာ ၂ နေရာရှိပါသည်။ လဲချားမြို့နယ်ပြည်သူ့လွှတ်တော်ကိုယ်စားလှယ်အတွက်တနေရာနှင့် မန္တလေးတိုင်းဒေသကြီး သျှမ်းတိုင်းရင်းသားရေးရာဝန်ကြီးအတွက်တနေရာတို့ဖြစ်ပါသည်။