သျှမ်းပြည်နယ် မြောက်ပိုင်း နမ္မတူ မြို့နယ် မိုင်းရင် ကျေးရွာ တွင် သီတင်းကျွတ်လပြည့်နေ့ အဘိဓမ္မအခါတော်နေ့တွင် တိုက်ပွဲများကြောင့် နမ္မတူမြို့နယ်ရွှေမြင်သာ ကျောင်းသို့ စစ်ရှောင်များရောက်ရှိနေကြောင်း သိရသည်။
မြောက်ပိုင်းမဟာမိတ်တပ် နှင့် သျှမ်းပြည် ပြန်လည် ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့ အောက်တိုဘာလ ၂၄ ရက် သီတင်းကျွတ် လပြည့်နေ့ မနက် ၃ နာရီခွဲခန့်က တိုက်ပွဲဖြစ်ပွားခဲ့ကြောင်း နမ္မတူ မြို့ သျှမ်းစာပေနှင့် ယဉ်ကျေးမှု ဥက္ကဌ လုံးစံပွင့် က သျှမ်းသံတော်ဆင့်သို့ ပြောသည်။
“ တိုက်ပွဲ က မနက် ၃ နာရီခွဲ လောက်က စဖြစ်တယ်။ မနက် ၉ နာရီလောက် ရပ်သွားတယ်။ ဒါပေမယ့် ကြိုကြားကြိုကြားတော့ဖြစ်တယ်။ သီတင်းကျွတ်လပြည့်နေ့မှာ ဘယ်သူမှလည်း သီလ မယူနိုင်တော့ဘူး။ ထွက်ပြေးနေရတယ်” ဟု လုံးစံပွင့် က ဆိုသည်။
မိုင်းရင် ကျေးရွာ ရှိ ဘုန်းကြီးကျောင်းတွင် ရက်ကြီးရက်မြတ် ဖြစ်သည့် သီတင်းကျွတ်လပြည့်နေ့ဖြစ်သော်လည်း သီလဆောက်တည်မည့် သူမရှိကြောင်း၊ တိုက်ပွဲကြောင့် ဒေသခံများ ထိတ်လန့်မှုဖြစ်ပွားနေကြောင်းလည်း လုံးစံပွင့် ကပြောသည်။
“ သူတို့တွေက လေးလုံးထိုးတွေ ထော်လဂျီတွေနဲ့ လာကြတယ်။ နမ္မတူကို မနက် ၁၀ နာရီက ရောက်လာကြတယ်“ ဟု လုံးစံပွင့် က ဆိုသည်။
တိုက်ပွဲကြောင့် နမ္မတူမြို့ ရွှေမြင်သာ ကျောင်းတိုက်သို့ ရောက်လာသည့် စစ်ရှောင်များစုသည့် မိုင်းရင်းကျေးရွာ အုပ်စု ဖြစ်သည့် ဝမ့်တီး၊ ကောင်းကေးနှင့် လွယ်ကောင်းမူး ကျေးရွာ မှ ဒေသခံများဖြစ်ပြီး စစ်ဘေးရှောင် ၃၅၀ လောက်ရှိကြောင်းသိရသည်။
ပွင့်လင်းရာသီ အချိန်ရောက်လာပြီး ဒေသခံ ပြည်သူများလယ်ယာ စိုက်ပျိုးချိန်ဖြစ်သဖြင့် တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှု မဖြစ်အောင် အချင်းချင်း ရှောင်ပေးစေချင်ကြောင်းလည်း နမ္မတူမြို့ စစ်ရှောင်လာသည့် ဒေသခံများက ပြောကြသည်။
“ ပွင့်လင်းရာသီ ရောက်လာပြီဆိုတော့ တိုက်ပွဲတွေ ပိုဖြစ်လာမှာကိုပဲ စိုးရိမ်ရတယ်။တိုက်ပွဲတွေကြောင့် ပြည်သူတွေစိုက်ပျိုးရေးမလုပ်နိုင်ဘူး။တိုက်ပွဲတွေ မဖြစ်ဖို့ ပြည်သူတွေကို ငဲ့ညှာဖို့ ပြောချင်တယ်” ဟု နမ္မတူဒေသခံ စိုင်းအိုက် က ပြောသည်။
ပြီးခဲ့သည့် သြဂုတ်လ တွင်လည်း တိုက်ပွဲကြောင့် ပန်လုံအုပ်စု၊ ပန်ဆော့ အုပ်စု နှင့် မိုင်းမု အုပ်စုမှ ဒေသခံများ နမ္မတူမြို့နယ် အတွင်းသို့ ထွက်ပြေးခိုလှုံခဲ့ရကြောင်းသိရသည်။
နမ္မတူမြို့နယ် အတွင်း ယခုနှစ်အတွင်းတိုက်ပွဲများ မကြာခဏဖြစ်ပွားမှုကြောင်းဒေခံများ စိုက်ပျိုးရေး လုပ်ကိုင်ရန် အခက်အခဲများစွာ ရင်ဆိုင်နေရသည်။
Leave a Comments