သျှမ်းတိုင်းရင်းသားများဒီမိုကရေစီအဖွဲ့ချုပ် SNLD တည်ထောင်ခြင်း နှစ် ၃၀ ပြည့် အထိမ်း အမှတ်အခမ်းအနား တရပ်ကို သျှမ်းပြည်မြို့တော်တောင်ကြီးရှိ သျှမ်းစာပေနှင့် ယဉ်ကျေး မှုရုံးတွင် ကျင်းပ မည်ဖြစ်ကြောင်း သိရသည်။
အောက်တိုဘာလ ၂၅ နှင့် ၂၆ ရက်နေ့တွင် ကျင်းပမည်ဖြစ်ပြီး ဂုဏ်ပြုဆုချီးမြင့်ခြင်းနှင့်အတူ စာပေဟော ပြောခြင်းအစီအစဉ်လည်းရှိသည်ဟုသိရသည်။
“ပါတီတည်ထောင်ခြင်း နှစ် ၃၀ ပြည့်အခမ်းအနားကို ကျနော်တို့ တောင်ကြီးမှာ ကျင်းပမှာဖြစ်တယ်။ အသက် ၃၀ နှစ်အောက် လူငယ်ထူးချွန်ဆု၊ သူရဲကောင်းဆု၊ သစ္စာရှင်ဆု၊ အထူးဆု တွေချီးမြှင့်မယ်။ ပါတီကို၀န်းရံတဲ့သူတွေ ပါတီအတွက်စွန့်လွှတ်အနစ်နာခံတဲ့သူတွေကို ဂုဏ်ပြုချီးမြှင့်မယ်။ မျိုးဆက်သစ်လူငယ်တွေ ကိုအားပေးတဲ့ အနေနဲ့ပါ။ သျှမ်းပြည်တွင်း မြို့နယ်အားလုံးကအပြင် ကချင်ပြည်နယ် ကယားပြည်နယ် ကပါတီဝင်တွေ အကုန်လုံးကိုဖိတ်ထားပါတယ် “– ဟု သျှမ်းပြည်တောင်ပိုင်း SNLD ပါတီဥက္ကဌ စဝ်ခမ်းပိုင်ဖှက ပြောသည်။
အဆိုပါ နှစ် ၃၀ ပြည့်အခမ်းအနား ၂ ရက်လုံးတွင် ပါတီတိုးတက်ရေးအတွက်ဆွေးနွေးခြင်းများ၊ ဆုချီးမြှင့်ခြင်း များ၊ လွှတ်တော်ကိုယ်စားလှယ်များ၏ လွှတ်တော်အတွေ့အကြုံရှင်းလင်းခြင်းများအပြင် နိုင်ငံရေး၊ စီးပွါးရေး ၊အမျိုးသားရင်ကြားစေ့ရေး၊ ငြိမ်းချမ်းရေး၊ လက်နက်ကိုင်ပဋိပက္ခချုပ်ငြိမ်းရေးအစရှိ ဆွေးနွေးပွဲများရှိဖြစ်ကြောင်း သိရသည်။
ထို့အပြင် သျှမ်းရိုးရာ အသုံးအဆောင်၊ အစားအသောက်၊ အဝတ်အထည်များ ရောင်းချသည့် သျှမ်းရိုးရာ စျေးပွဲ တော် လည်း ပြုလုပ်သွားမည်ဖြစ်ကြောင်း၊ ပွဲတော် ၂ ရက်လုံး ညပိုင်းအစီအစဉ်တွင် နာမည်ကြီး Power 3 Band တီးဝိုင်းအဖွဲ့မှ သံစုံတီးဝိုင်းဖြင့် တီးခတ်ဖျော်ဖြေခြင်းများ ရှိမည်ဖြစ်ကြောင်းလည်းသိရသည်။
သျှမ်းတိုင်းရင်းသားများဒီမိုကရေစီအဖွဲ့ချုပ် Shan Nationalities League for Democracy SNLD အား ၁၉၈၈ အောက်တိုဘာလ ၂၆ ရက်နေ့တွင် စတင်တည်ထောင်ခဲ့သည်။ လက်ရှိတွင် ဥက္ကဌအဖြစ် ခွန်ထွန်းဦး ၊ ဒု ဥက္ကဌ စဝ်ခမ်းပိုင်ဖှ၊ အထွေထွေအတွင်းရေးမှူး စိုင်းညွန့်လွင် (စိုင်းနွတ်း) ၊ အတွင်းရေးမှူး ၁ စိုင်းလိတ် ၊ အတွင်းရေး မှူး ၂ စိုင်းကျော်ညွန့် တို့မှ တာဝန်ယူ ထားကြောင်းသိရသည်။