သျှမ်းပြည်တောင်ပိုင်း မိုင်းပန်မြို့နယ်အတွင်း ၀င်ရောက်လှုပ်ရှားလာသော   PNLA တပ်ဖွဲ့နှင့်  သျှမ်းပြည်တပ်မတော် RCSS/SSA တို့ တရက်အတွင်း ၂ ကြိမ် တိုက်ပွဲဖြစ်ပွါးခဲ့ကြောင်းသိရသည်။

အောက်တိုဘာလ ၁၆ ရက် မနက် ၅ နာရီ ၄၅ မိနစ်က   PNLA တပ်ဖွဲ့နှင့်   RCSS/SSA တို့ မိုင်းပန်မြို့နယ် နားမွန်အုပ်စု ၀မ့်မိုက်ပုတ်ရွာအနောက်ဘက် လွယ်ကောင်းမူးတွင်တိုက်ပွဲဖြစ်ပွါး ခဲ့ခြင်းဖြစ်ကြောင်းသိရသည်။

RCSS/SSA ပြောခွင့်ရ ဒု ဗိုလ်မှူးကြီးစိုင်းဦးက – “အဲဒီဒေသမှာ RCSS/SSA ကနေ အမြဲလှုပ်ရှားနေတဲ့ဒေသဖြစ်တယ်။ PNLA တွေက လင်းခေးတောင်ဘက်ပိုင်း ကန်တူးလုံ ဘက်မှာလှုပ်ရှားတာအရင်က ။ ဒီဘက်ပိုင်းကိုသူတို့ မလာဘူး။ PNLA ဆက်သွယ်ရေးရုံးကိုဆက်သွယ်မေးမြန်းကြည့်တော့ သူတို့မသိရဘူးလို့ဖြေတယ်ဒီကိစ္စ။ တိုက်ပွဲကနေ ၂ ဖက်ထိခိုက်ဒဏ်ရာရတာတော့ရှိတယ် ။ ကျနော်တို့အတိအကျမသိရဘူး။ သူတိုကဘက်က အင်အား ၁၅ – ၁၆ ယောက်လောက်ရှိတယ်လို့ကြားရပါတယ်။” – သျှမ်းသံတော်ဆင့်အားပြောသည်။

အောက်တိုဘာလ ၁၆ ရက်တွင်ပင် အဆိုပါဒေသ၌ PNLA နှင့် RCSS/SSA တို့တိုက်ပွဲ ၂ ကြိမ်ဖြစ်ပွါးခဲ့ကြောင်း နားမွန်ဒေသခံများကပြောသည်။

အလားတူ မြို့တွင်းရောက် နားမွန်ဒေသခံများကမူ လက်နက်ကိုင်ဆောင်သည့်ပအို၀်းအဖွဲ့လူအင်အားအများအပြား တွေ့ရကြောင်းပြောဆိုခဲ့သော်လည်းအရေအတွက်ကိုမူအတည်ပြုချက်မရခဲ့ပေ။

သျှမ်ပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA ၏ Tai Freedom သတင်းဌာနကလည်း PNLA တပ်ဖွဲ့ဝင်များသည် RCSS/SSA ၏ထိန်းချုပ်နယ်မြေ ၀မ့်မိုက်ပုတ် ပန်ပိရွာပိုင်းတွင် စခန်းချလှုပ်ရှားနေကြောင်း ၊ သို့သော် RCSS/SSA ၏ ဆက်သွယ်ရေးရုံးသို့ ဆက်သွယ်အကြောင်းကြားမှုမရှိကြောင်း၊ ထို့ကြောင့်ထိပ်တိုက်ရင်ဆိုင် မှုများဖြစ်ပွါးခဲ့ရကြောင်း ၄င်းတို့၏ ၀က်ပ်ဆိုက်တွင် ရေးသားပြောဆိုထားပါသည်။

တဖက်တွင်လည်း အောက်တိုဘာလ ၁၅ နှင့် ၁၆ ရက်နေ့တွင် ပအို၀်းနှင့် သျှမ်းတပ်ဖွဲ့လက်နက်ကိုင်ထိပ်သီးခေါင်းဆောင် ၂ ဦးအပါအဝင် NCA အပစ်ရပ်လက်မှတ်ရေးထိုးထားသော တိုင်းရင်းသားလက်နက်ကိုင်တပ်ဖွဲ့၏ ထိပ်သီးခေါင်းဆောင်များ စုစုပေါင်း ၁၀ ဦးသည် NCA အပစ်ရပ်လက်မှတ်ရေးထိုးခြင်း ၃ နှစ်ပြည့် အထိမ်းအမှတ် ထိပ်သီးခေါင်းဆောင်များ အစည်းအဝေးတက်ရောက်နေသည့်အချိန်ဖြစ်သည်။ အဆိုပါအစည်းအဝေးတွင် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ တပ်မတော်ကာကွယ်ရေးဦးစီးချုပ်နှင့် ဒု စစ်ဦးစီးချုပ်၊ လွှတ်တော်ကိုယ်စားလှယ်များ ပါ၀င်ပါသည်။

PNLA နှင့် RCSS/SSA တို့ ၂ ဖွဲ့လုံးသည် NAC လက်မှတ်ရေးထိုးထားသည့်အဖွဲ့များဖြစ်ကြသည့်အပြင် ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST တွင်လည်း ပါ၀င်ပါသည်။