ဂုတ်တွင်းလမ်းနှင့် ဂုတ်တွင်းရှောင်လမ်း စီမံကိန်းတွင် လယ်သမား ၆၂ဦးလျော်ကြေးငွေ မရရှိသေး

သျှမ်းပြည်နယ် မြောက်ပိုင်းကျောက်မဲခရိုင် ဂုတ်တွင်းလမ်းနှင့် ဂုတ်တွင်းရှောင်လမ်း စီးမံကိန်းတွင် နစ်နာရသော လယ်သမား ၆၂ ဦး လျော်ကြေးငွေ မရသေးကြောင်း သတင်းရရှိသည်။

ကျောက်မဲခရိုင် အတွင်း လမ်းသစ်ဖောက်လုပ်ရန် အတွက် OHC (Oriental Highway Company) ကုမ္ပဏီ မှ တာဝန်ယူထားပြီး၊ လယ်ယာမြေ များ သိမ်းဆည်းရာ လယ်သမား ၆၂ ဦးမှာ တောင်းဆိုထားသည့် လျော်ကြေးငွေ ပမာဏ မရရှိသေးကြောင်း လယ်သမားများ က ပြောသည်။

“လျော်ကြေးငွေ ကို တဧကကို ကျပ်သိန်း ၁၀၀ နဲ့ ၁၅၀ ကြားပဲပေးပါတယ်။ မယူရင် မြေသိမ်းမယ်ဆိုလို့ အဲ့ဒါနဲ့ လယ်သမား တွေက ကြောက်ပြီး ယူလိုက်ရတယ်။ အခု လျော်ကြေးငွေ မရသေးတဲ့ ၆၂ ယောက်ကတော့ တောင်းထားတဲ့ တဧက ၂၀၀၊ ၃၀၀ ရမှ ယူမယ်ဆိုပြီး စောင့်နေတာပါ” ဟု လယ်သမား ၆၂ ဦးအား အောက်တိုဘာလ ၉ ရက်နေ့က နောင်ချိုမြို့ ကျားခေါင်းပါတီရုံးတွင် တွေ့ဆုံခဲ့သည့် နောင်ချိုမြို့ SNLD ပါတီဥက္ကဌ စိုင်းအောင်မှိုင်းက ဆိုသည်။

ယခင်က အစိုးရ မှ လယ်သမားများကို တဧကလျှင် ကျပ်သိန်း ၂၀၀ ကျပ်မှ ကျပ်သိန်း ၃၀၀ ထိ ပေးမည်ဟု သဘောတူထားသော်လည်း လက်တွေ့မှာ တဧကလျှင် ကျပ်သိန်း ၁၀၀ သာပေးခဲ့ကြောင်း၊ ထို့ကြောင့် လယ်သမား ၆၂ ဦးမှာ လယ်ယာမြေသိမ်းပါက မြေသိမ်းဥပဒေ နှင့်အညီ ဆောင်ရွက်သွားမည်ဟု ပြောဆိုကာ လယ်သမားများ တောင်းဆိုထားသည့် လျော်ကြေးငွေ ကို စောင့်ဆိုင်းနေခြင်းဖြစ်သည် ဟု စိုင်းအောင်မှိုင်း က ပြောသည်။

“အရင်က သူတို့က လမ်းသစ်ဖောက်ဖို့ ပြည်သူတွေ လာဆွေးနွေးတယ်။ လယ်သမားတွေ ဘယ်လောက်လိုချင်လဲ ဆိုတာမေးတယ်။တကယ် လျော်ပေးတော့ တဧက သိန်း ၁၀၀ နဲ့ပါ။ ပြည်သူကို ပွင့်လင်းမှု မရှိဘူူး” ဟု ထပ်လောင်းပြောသည်။

လျော်ကြေးငွေ မရသေးသည့် လယ်သမား ၆၂ ဦး ကိစ္စနှင့် ပတ်သတ်ပြီး အောက်တိုဘာ ၁၁ ရက်နေ့တွင် နေပြည်တော်တွင် လွှတ်တော်ကိုယ်စားလှယ်၊ အစိုးရ ၊ ဆောက်လုပ်ရေး ဝန်းကြီးဌာန နှင့် OHC တို့နှင့် သွားရောက်ညှိနှိုင်းရန် ရှိကြောင်းလည်း သိရသည်။

အဆိုပါကိစ္စနှင့် ပတ်သတ်ပြီး ယခုနှစ် စက်တင်ဘာလ တွင် မဲဆန္ဒနယ် အမှတ် ၄ မှ SNLD ပါတီ မှ အမျိုးသား လွှတ်တော်ကိုယ်စားလှယ် စိုင်းအုန်းကျော် က နောင်ချိုမြို့ ရှောင်လမ်းဆောက်မည် ဟု ၂၀၁၆ ခုနစ်က ကြားသိရပြီး ၊ ၂၀၁၇ ခုနစ်တွင် ဂုတ်တွင်း ရှောင်သည့် တံတားတစင်း ဆောက်မည့် ဟု အစိုးရ ပြောဆိုခဲ့သော် လည်း လက်ရှိ အချိန်ထိ အကောင်အထည် မဖော်ဆောင်သေးကြောင်း၊ ထို့ပြင် ဒေသခံများနစ်နာကြေး အကုန်မရရှိသေးသည်ကို အစိုးရအနေဖြင့် မည်ကဲ့သို့ ဆောင်ရွက်သွားမည်ကိုလည်း မေးမြန်းခဲ့သည် ဟုသိရသည်။

စိုင်းအုန်းကျော်၏ မေးမြန်းချက်ကို ဆောက်လုပ်ရေး ဒုဝန်ကြီး ဦးကျော်လင်း က လမ်းချဲ့ တံတား ဆောက်လုပ်ရာတွင် လယ်ယာမြေ သိမ်းခံရသည့် နစ်နာသူ တောင်သူလယ်သမားများ အား လျော်ကြေးပေးပြီးပါက စီမံကိန်း စတင်မည် ဖြစ်ကြောင်း၊ စီမံကိန်း ၃နှစ် ဖြစ်ကြောင်း ပြန်လည်ဖြေကြားခဲ့သည်။

ဂုတ်တွင်း ရှောင်လမ်းဖောက်ရန် အတွက် ကျောက်မဲမြို့ နယ် ဒေသခံ များ၏ လယ်ယာမြေ ၁၆၉ ဧက၊ နောင်ချို မြို့ခံ များလယ်ယာမြေ ၃၂၉ ဧက၊ စုပေါင်း ၄၉ ၉ ဧကကို ပါ အသုံးပြုခဲ့ရကြောင်း ထို့အနက် ၃၆ ဧက မှာ အစိုးရ၏ လယ်ယာမြေ ပါဝင်နေကြောင်းသိရသည်။