သျှမ်းပြည်မြောက်ပိုင်း ကျောက်မဲမြို့နယ် ဂုတ်တွင်းတံတားလမ်းအနီးမှ အထက်ရဲရွာ လမ်းပိုင်းတစ်လျှောက်တွင် လမ်းသွားလမ်းလာများနှင့် ကားသမားများ လုယက်တိုက်ခိုက်ခံရမှု ရှိနေကြောင်း သတင်းသိရသည်။

ပြီးခဲ့သည့် ရက်ပိုင်းအတွင်းတွင် ကျောက်မဲမြို့နယ် နောင့်ပြစ်ကျေးရွာအနီး ဖြတ်သန်းသွားလာသည့် ကားသမားများ လုယက်တိုက်ခိုက်ခံရကြောင်း အဆိုပါ အနီးရှိ ဒေသခံများက သျှမ်းသံတော်ဆင့်ကို ပြောသည်။

“သူတို့ကို လက်နက်ကိုင်လူတစ်စုလို့ပြောဖို့လည်းခက်တယ်၊ ဘာဖြစ်လဲဆိုရင် သူတို့ကလက်နက်ဆိုလို့ ဓားပဲကိုင် တာတွေ့တယ်၊ ပြီးတော့ သူ့တို့က သုံးလေးယောက်လောက်ပဲ ရှိတယ်၊ ဆိုင်ကယ်နဲ့ ကားသမားတွေ လမ်းသွား လမ်းလာတွေကို တားပြီး လုယက်တာ ဓားပြတိုက်တာပေါ့” ဟု ဖြစ်စဥ်များကို သိရသည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ လုယက်သူတို့သည် သုံးယောက်မှ လေးယောက်အထိသာရှိနေပြီး ပျောက်ကြားအင်္ကျီဝတ်ဆင်ကာ ဆိုင်ကယ်နှစ်စီးဖြင့် သွားလာလှုပ်ရှားလေ့ရှိကြောင်း မျက်မြင်တွေ့ရသူတစ်ဦးက သျှမ်းသံတော်ဆင့်ကို ပြောသည်။

“ပင်တိန်ရွာအနီးမှာ ကျနော်တို့ သူငယ်ချင်းရဲ့ကားကို သူတို့တားပြီး ပိုက်ဆံတောင်းတုန်းက ကျနော့်သူငယ်ချင်းနဲ့ သူတို့က နည်းနည်းထိုးကြိတ်တာရှိတယ်၊ အဲ့တုန်းက သေနတ်ပြပြီး ခြိမ်းခြောက်လို့ ကျနော့်သူငယ်ချင်းက ပိုက်ဆံပေးလိုက်ရတယ်၊ ဒါပေမဲ့ နောက်မှ သိရတာက သူတို့ကိုင်တဲ့သေနတ်က အတုပဲတဲ့၊ ကြည့်ရတာ ဒီလူတွေကလည်း ဒီနားကျေးရွာက လူတွေပဲဖြစ်မယ်” ဟု ပင်တိန်ကျေးရွာမှာ လုယက်မှုဖြစ်ပွားစဥ် မြင်တွေ့ရသူ တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် လုယက်ဓါးပြတိုက်ခံရသည့် ကားသမား ၅ ဦးခန့်ရှိနေပြီး တခြား ခရီးသည် လမ်းသွားလမ်းလာ ပြည်သူများလည်း မကြာခဏလုယက်ဓါးပြတိုက်ခံရကြောင်း သိရသည်။

ယင်း လုယက်မှုဖြစ်ပွားသည့် နေရာအနီးပတ်ဝန်းကျင်တွင် နယ်မြေခံရဲစခန်းမရှိသည့်အပြင် လက်ရှိ နိုင်ငံရေးအခြေအနေများအရ တရားဥပဒေစိုးမှုများလည်းမရှိသည့်အတွက် ယခုလိုဖြစ်စဥ်များဖြစ်ပွားရခြင်း ဖြစ်ကြောင်းလည်း ဒေသခံများက ဝေဖန်ပြောဆိုသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်း သျှမ်းပြည် အပါအဝင် နိုင်ငံတစ်ဝှမ်းလုံးတွင် ခိုးဆိုးလုယက်မှုများ တိုးများလာပြီး ပြည်သူများအနေဖြင့်လည်း လုံခြုံမှု မရှိသလိုခံစားရကြောင်း သတင်းသိရသည်။