သျှမ်းပြည်အတွင်း မိုးဆက်တိုက်ရွာသွန်းခဲ့ပြီးနောက် မြို့နယ်အသီးသီး တို့တွင် လူနေအိမ်ခြေအတွင်း ရေများ လွှမ်းခဲ့ရာ သျှမ်းပြည်တောင်ပိုင်း လင်းခေးမြို့တွင်လည်း တိန်းချောင်းရေမြင့်တက်ကာ ချောင်းဘေး တလျှောက် နေထိုင်သူများ ကုန်းမြင့်ရာသို့ ပြောင်းရွှေ့ခဲ့ရကြောင်းသိရသည်။
အောက်တိုဘာလ ၁၀ ရက်နေ့ မနက်ပိုင်းက တိန်းချောင်းရေ စတင်မြင့်တက်ကာ လင်းခေးမြို့နယ် တိန်းချောင်းဘေးနေ ရပ်ကွက်များအတွင်းလယ်ယာခြံမြေများအတွင်း ရေဝင်သဖြင့် ပြောင်းပိုင်ရှင်များလည်း စိုးရိမ်ပူပန်မှုများရှိခဲ့ကြောင်းသိရသည်။
“မိုးကဆက်တိုက်ရွာနေတာ တပတ်လောက်ရှိပြီ။ ညပိုင်းဆိုပိုသည်းတယ်။ ချောင်းရေကတော့ နှောက်နေတာ ၂ ရက် ၃ ရက်ရှိပြီ ဒီမနက်မှ ရုတ်ချည်းတက်လာတာ။ ကျမတို့ရွာထဲဝင်လာပြီ။ ခြံတွေထဲလည်းဝင်တယ်။ ပြောင်းတွေမချိုးရသေးဘူး။ ပြောင်းခြံထဲက ရေက ဒူးခေါင်းလောက်အထိ မြင့်တယ်။ လောလောဆယ်တော့ ကုန်းပိုင်းဘက်ပြောင်းသူပြောင်း။ တချို့လဲ တောင်ခြေဘက်က ခြံထဲသွားနေကြတယ် ”- ဟု လင်းခေးမြို့အဝင် တိန်းချောင်းနံဘေးရှိ နမ့်အွန်ရွာ ပြောင်းခြံပိုင်ရှင် အေယိင်းကပြောသည်။
မြို့တွင်းရပ်ကွက်များတွင်မူ ဒါးဆိပ်ကျေးရွာ ၊ ပန်ဆနောင်းရွာ၊ ၀မ့်မပျဉ်းရပ်ကွက်၊ ၀မ့်လုံရပ်ကွက်၊ စျေးတန်းရပ်ကွက်တို့ရှိ တိန်းချောင်းဘေးနေထိုင်သူများ နေအိမ်းအတွင်းရေများ တရိပ်ရိပ်တက်နေကြောင်း မိုးဆက်လက်ရွာသွန်းပါက ပြီးခဲ့သည့် ၂၀၀၄ ခုနှစ်ကကဲ့သို့ ရေကြီးမှုဖြစ်ပေါ်မည်ကိုစိုးရိမ်နေကြောင်း ဒေသခံများပြောဆိုနေကြသည်။
“ခုချိန်က ကမ္မဌာန်းကျောင်းမှာ တရားစခန်းဖွင့်ထားတော့ ယောဂီကျောင်းဆောင်တွေ အထိရေဝင်မှာစိုးလို့စောင့်ကြည့်နေကြတယ်။ မိုးဆက်ရွာရင်တော့ ၂၀၀၄ ခုနှစ်တုန်းကလောက် ဖြစ်လောက်တယ် ” – ဟုလည်း ၀မ့်လုံရပ်ကွက်နေ နန်းလောဝ်ကပြောသည်။
သျှမ်းပြည်တောင်ပိုင်း မိုင်းကိုင်မြို့တွင် တိန်းချောင်းမြစ်ဖျားခံစတင်စီးဆင်းသည်ဖြစ်ရာ မိုင်းကိုင်တွင်ယနေ့အထိမိုးမပြတ်ရွာသွန်းနေသေးသဖြင့် တိန်းချောင်းရေထပ်မြင့်တက်မည်ကို လင်းခေးဒေသခံများ အထူးစိုးရိမ်လျှက်ရှိကြောင်း မြို့ခံများကပြောဆိုနေကြသည်။
လင်းခေးမြို့တောင်ဘက်ရှိ ၀မ့်ဟတ် နားကုန်းအသွားလမ်းပိုင်းတွင်လည်း ချောင်းရေလျှံကာ ရပ်ရွာနေအိမ်အတွင်း ရေဝင်သဖြင့် သွားလာဆက်သွယ်မှု ခက်ခဲရကြောင်းသိရသည်။
လွန်ခဲ့သည့် ၁၀ နှစ်ကျော် ၂၀၀၄ ခုနှစ် ကျိုင်းတောင်းရေတံခွန်တွင်ဓါတ်အားပေးစက်ရုံ တည်ဆောက်စဉ် ကလည်း ထိုသို့မိုးမပြတ်ရွာသွန်းရာ လင်းခေးမြို့သမိုင်းတွင်စံချိန်တင် ရေကြီးမှုဖြစ်ပွါးခဲ့သည်။ ထိုစဉ်က လယ်ယာခြံနှင့် ကုန်းပိုင်းရပ်ကွက်ရှိ နေအိမ်များအထိပါ ရေများလွှမ်းခဲ့ရာ ဒေသခံ ၂ ဦး သေဆုံးခဲ့သည်။
အလားတူ မိုင်းပန်မြို့တွင်လည်း မိုးသည်းမှုကြောင့် တောင်ကျချောင်းရေများ လယ်မြေအတွင်းစီးဝင်ရာ လယ်မြေဧကပေါင်းများစွာ ဆုံးရှုံးမှုရှိခဲ့ကြောင်း၊ ယမန်နေ့ကအထိ လင်းခေးမြို့အသွားလမ်းပိုင်းရေကြီးမှု ကြောင့် ကားအသွားအလာများခေတ္တရပ်နားထားရကြောင်း သိရပါသည်။
ဘင်္ဂလားပင်လယ်အော်အတွင်း မုန်တိုင်းအရှိန်ကြောင့် မြန်မာနိုင်ငံ အတွင်း အောက်တိုဘာလ ၁၃ ရက်နေ့ခန့်အထိ မိုးများ ဆက်တိုက်ရွာသွန်းဦးမည်ဖြစ်ကြောင်း မိုးလေဝသနှင့်ဇလဗေဒပညာရှင် ဒေါက်တာထွန်းလွင်ကလည်း သတိပေးပြောကြားထားသည်။
