သျှမ်းပြည်မြောက်ပိုင်း နမ့်ခမ်းမြို့နယ်အတွင်း ဟိုနောင်ရပ်ကွက်သူ ကလေး ၃ ယောက်မိခင် နန်းမိုဟွမ်အား TNLA တအာင်းတပ်ဖွဲ့မှ ဖမ်းဆီးသွားသည်မှာ ရက်ပေါင်း ၅၀ ကျော်ကြာခဲ့ပြီဖြစ်သော် လည်း ပြန်မလွှတ်ပေးသေးသဖြင့် မိသားစုဝင်များက အထူးစိုးရိမ်ပူပန်နေကြကြောင်းသိရသည်။
“သူ့ကိုဖမ်းသွားတာ ၂ လပြည့်တော့မယ်။သတင်းမကြားဘာမကြားနဲ့ သူ့ကျန်းမာရေးအတွက်စိတ်ပူရပါတယ်။ သူ့ကလေး ၃ ယောက် ၊ ကျမ တူ၊တူမ လေးတွေလည်းသူတို့အမေဘယ်တော့ပြန်လာမလဲလို့ နေ့တိုင်း မေးနေတယ်။ နောက် ၂ ရက် ၃ ရက်ဆိုပြန်လာပါပြီ လို့လိမ်ပြောနေရတာ နေ့တိုင်းဘဲ။ ဆောင်းတွင်းဝင်လာပြီမို့ သူ့ကျန်းမာရေးအတွက်စိုးရိမ်ရပါတယ်။ သူ့ကိုအမြန်ဆုံးပြန်လွှတ်ပေးပါလို့ သက်ဆိုင်ရာတာဝန်ရှိသူတွေကို အနူးအညွတ်တောင်းချင်ပါတယ် ”- ဟု အမ ဖြစ်သူ နန်းမိုခမ်းကပြောသည်။
နန်းမိုဟွမ်ပြန်လည်လွှတ်မြောက်ရေးအတွက် မြောက်ပိုင်းမဟာမိတ်တပ်ဖွဲ့အနေဖြင့် နန်းမိုဟွမ်၏ မိဘဆွေမျိုးများရှေ့မှောက်တွင် ကူညီညှိနှိုင်းဆွေးနွေးပေးမည်ဟုဆိုသဖြင့် လက်ရှိတွင် နမ့်ခမ်းမြို့ရှိလူမှုအခြေပြု အဖွဲ့အစည်းများက ကိုယ်စားလှယ်စေလွှတ်ရန် ရွေးချယ်နေကြောင်း၊ ပန်ဆန်းသို့သွားရောက်ကာ FPNCC ခေါင်းဆောင်များနှင့် တွေ့ဆုံမည်ဖြစ်ကြောင်းသိရသည်။
“FPNCC ဘက်ကနေလည်း ကူညီပေးမယ်လို့ အာမခံပေးလို့ကျနော်တို့လည်း ပန်ဆန်းကို သွားဖို့အားရှိတာပေါ့။ နန်းမိုဟွမ်ကို ကျန်းကျန်းမာမာနဲ့ပြန်ခေါ်လာနိုင်မယ်လို့ကျနော်တို့မျှော်လင့်သလို ဆုတောင်းနေပါတယ်။” – ဟု နမ့်ခမ်းလူငယ် စိုင်းပီး က ပြောသည်။
သို့သော် ပန်ဆန်းသို့ သွားမည့်ကိုယ်စားလှယ်များစာရင်းနှင့် တွေ့ဆုံရမည့်နေ့ရက်အသေးစိပ် အကြောင်းအရာတို့ကိုမူ မသိရသေးပေ။
ကလေး ၃ ဦး၏ မိခင် နန်းမိုဟွမ် အသက် ၃၆ နှစ်သည် ဩဂုတ်လ ၁၇ ရက်နေ့က လက်နက်ကိုင် တအာင်းတပ်ဖွဲ့ဝင် ၅ ဦးက နေအိမ်အတွင်းဝင်ရောက်ကာ သေနတ်ထောက်ပြီး ဖမ်းဆီး ခေါ်ဆောင် သွားခြင်းခံရပြီး ယနေ့တိုင် ရက် ၅၀ ကျော်ပြီဖြစ်သော်လည်း ပြန်မလွှတ်လာသေးပေ။
တအာင်းတပ်ဖွဲ့ဘက်က – ယမန်နှစ်က နန်းမိုဟွမ်တို့အိမ်ဆိုင်ထံကျပ် ၁၁ သိန်းအခွန်ကောက်ခံသော တအာင်းတပ်ဖွဲ့ဝင် ၂ ဦး အိမ်မှပြန်အထွက် အစိုးရတပ်သားများချောင်းမြောင်းပစ်ခတ်မှုကြောင့် တအာင်းတပ်သား ၁ ဦးသေဆုံးကာ ၁ ဦးမှာ ဖမ်းဆီးခံခဲ့ရသည်။ ၎င်းတို့သည် အစိုးရတပ်မတော်ထံ နန်းမိုဟွမ်မှသတင်းပေးမှုကြောင့်ဖြစ်သဖြင့် ဖမ်းဆီးခဲ့ခြင်းဖြစ်သည် – ဟု ၎င်းတို့၏ကြေငြာ ချက်တွင် ဖော်ပြထားသည်။
နန်းမိုဟွမ် အားအမြန်ဆုံးပြန်လည်လွှတ်မြောက်ရေးအတွက် လူမှုအခြေပြုအဖွဲ့အစည်းအသီးသီး ၊ သျှမ်းပြည်တွင်းရှိ နိုင်ငံရေးပါတီနှင့် လက်နက်ကိုင်အဖွဲ့အသီးသီးတို့အပြင် အစိုးရ၏ ငြိမ်းချမ်းရေးနှင့် အမျိုးသားပြန်လည်သင့်မြတ်ရေးဗဟိုဌာနက ကြေငြာချက်များ ထုတ်ပြန်ခဲ့ဖူးသည်။
