မိုးဆက်တိုက်သည်းထန်စွာရွာသွန်းမှုကြောင့် နမ္မတူမြို့နယ် မိုင်းတတ်ရွာတွင်တောင်ကျချောင်းရေလျှံကာ နေအိမ်များရေလွှမ်းပြီး တံတားတစင်းကျိုးကျပျက်စီးကြောင်းသိရသည်။
မိုးဆက်တိုက်ရွာသွန်းမှုကြောင့် အောက်တိုဘာလ ၄ ရက်နေ့က တောင်ကျချောင်းရေလျှံကာ နမ္မတူမြို့နယ် မိုင်းတတ်ရွာ တံတားတစင်းကျိုးကျပျက်စီးရေနှင့်မျောပါသဖြင့် ဒေခံလူထု သွားလာမှုခက်ခဲရကြောင်း၊ ဖောင်စီးဖြတ်သန်းရကြောင်း မိုင်းတတ်ဒေသခံနန်းဟွမ်ကပြောသည်။
မိုင်းတတ်အဝင် နမ့်တတ်ချောင်းကူး သံ၊ပျဉ် တံတားကြီးကျိုးပျက်သွားတော့ လူထုသွားရလာရခက်ခဲတာပေါ့။ ဖောင်စီးပြီးဖြတ်သန်းသွားလာနေရတယ်။ နေ့ခင်းကတည်းက ရေကြီးတာ ညပိုင်းအထိရေမကျသေးဘူး။ မိုင်းတတ်ရွာထဲအထိရေလျှံတယ် – ဟု နန်းဟွမ်က သျှမ်းသံတော်ဆင့်အားပြောပြသည်။
မိုင်းတတ်နှင့်ကပ်လျက်ရှိ မိုင်းဆိန်ရွာအတွင်းသို့ပါ ရေများဝင်ကာလူနေအိမ်အတွင်း ဈေးဆိုင်များအတွင်း လျှံဝင်ကုန်ကြောင်း၊ အကြီးမားဆုံးရေကြီးမှုဖြစ်ကြောင်း မိုင်းတတ်ဒေသခံ နန်းနု ကလည်းပြောသည်။
“ဘ၀မှာ ရေအကြီးမားဆုံးလျှံတာဘဲ။ ကုန်းပိုင်းမှာကျတဲ့ သင်္ချိုင်းကုန်းခြေရင်းအထိတောင်ရောက်တယ် “- ဟု ပြောသည်။
မိုင်းတတ်ရွာတွင် အိမ်ခြေ ၁၀၀ ကျော်ရှိပြီး နမ္မတူမြို့မြောက်ဘက် ၇ မိုင်ခန့်အကွာတွင်တည်ရှိပါသည်။
အလားတူ အောက်တိုဘာလ ၁ ရက် ၂ ရက်အတွင်း ကျသည့်မိုးကြောင့် တောင်ကျချောင်းရေလျှံကာ သျှမ်းပြည်တောင်ပိုင်း မိုင်းပန်မြို့ အဝင်၊ မြို့အနောက်ဘက်ရှိ လွယ်နွဲ့တောင်နှင့်မြို့အဝင်ပေါက် အကြား ဒေသခံများလယ်ယာမြေပိုင်ရှင် ၇ ဦး၏ လယ်ယာမြေများ အတွင်းစီးဝင်ဖြင့် ပျက် စီးဆုံးရှုံးရကြောင်းသိရသည်။ ညနေပိုင်းအထိရေမကျသဖြင့် ရေကျပြီးမှသာ ဆုံးရှုံးမှုတန်ဖိုးကိုသိရှိနိုင်မည်ဖြစ်ကြောင်းသိရသည်။
