သျှမ်းပြည် နမ္မတူမြို့နယ်မှ အမျိုးသမီးတစ်ဦးသည် လက်နက်ကြီကျည်စထိမှန်ပြီး ခွဲစိတ်ကုသနေရသဖြင့် ငွေကြေးအခက်အခဲလိုအပ်နေကြောင်း ၎င်း၏ မိခင်ဖြစ်သူက ပြောသည်။
ဖြစ်စဉ်မှာ ပြီးခဲ့တဲ့ (ဒီဇင်ဘာလ ၂၅ ရက်) တွင် နမ္မတူမြို့နယ်ရှိ ၎င်းတို့နေအိမ်ခြံဝန်းအတွင်းသို့ လက်နက်ကျရောက်ပေါက်ကွဲမှုကြောင့် အသက် ၁၉ နှစ်အရွယ် သမီးဖြစ်သူ မရွှေရည်လင်း၏ တင်းပါး၌ လက်နက်ကြီးကျည်စထိမှန်ပြီး အရေးပေါ်ဆေးရုံသို့ပို့ဆောင်ကုသခဲ့ရကြောင်း ဆိုသည်။
လက်ရှိတွင် ပြင်ဦးလွင်မြို့ ပြည်သူဆေးရုံမှာ လာရောက်ကုသမှုခံယူနေပြီး ဆေးဝါးကုန်ကျစရိတ် ခက်ခဲနေသဖြင့် အကူညီလိုအပ်နေသည်ဟု မိခင်ဖြစ်သူ မဒိန်ခေါက သျှမ်းသံတော်ဆင့်ကို ပြောသည်။
“ခက်ခဲတာတော့ အကုန်ခက်ခဲတယ်။ ဘာမှလည်း မပါလာတော့ အမျိုးမျိုးကနေ ကူညီပေးကြ ပါတယ်။ စောင်တောင် တစ်ထည်တည်း ပါလာတယ်။ ဆေးလည်း နေ့တိုင်းဝယ်ရတယ်။ ငွေကြေးလိုအပ်တယ်။ ဆေးကုသဖို့ ငွေမရှိတော့ဘူး” ဟု ၎င်းမိခင်ဖြစ်သူက ပြောသည်။
လက်နက်ကြီးကျည်စထိမှန်အပြီး (ဒီဇင်ဘာလ ၂၇ ရက်) တွင် လူနာဖြစ်သူ မရွှေရည်လင်းသည် ခွဲစိတ်ခန်းဝင်ပြီး တစ်ကြိမ်ခွဲစိတ်ခဲ့ရသည်။
အလားတူ (ဇန်နဝါရီလ ၉ ရက်)တွင် ခွဲစိတ်ထားသော ဒဏ်ရာများကို ပြန်ချုပ်ထားလိုက်ပြီး လက်ရှိအချိန်ထိ ကုတင်ပေါ်သို့ လှဲလှောင်းကာ ဆေးဝါးကုသနေရဆဲကြောင်း ဆိုသည်။
ထို့အပြင် မရွှေရည်လင်း၏ ဖခင်ဖြစ်သူကလည်း မူဆယ်မြို့တွင် မြေမြုပ်မိုင်းနင်းမိပြီး ၎င်း၏ညာဘက် ခြေထောက်တစ်ဖက် ဖြတ်လိုက်ရသဖြင့် လက်ရှိအချိန်ထိ အလုပ်မလုပ်နိုင် သေးပေ။
Leave a Comments